യുവാവിനെ ആക്രമിച്ച ശേഷം ഉടുമുണ്ടഴിച്ച് ഫോട്ടോയെടുത്ത സംഭവത്തില്‍ മൂന്ന് പേര്‍ അറസ്റ്റില്‍. മകരവിളക്ക് ദിവസം തിരുവനന്തപുരം നെടുമങ്ങാട് പേരയം ജംഗ്ഷനിലെ മുട്ടംപാല കാവില്‍ വിളക്ക് കത്തിച്ച സമയത്ത് ഉച്ചത്തില്‍ ശരണം വിളിച്ച് തൊഴുതതിനാണ് എം. ബാബുരാജിനെ കമ്പികൊണ്ടും മറ്റും അടിച്ച് ദേഹോപദ്രവം ഏല്‍പ്പിക്കുകയും ഉടുമുണ്ട് അഴിച്ചു കളഞ്ഞ് മൊബൈലില്‍ ഫോട്ടോയെടുക്കുകയും ചെയ്തത്. ഒന്നാം പ്രതി ചെല്ലഞ്ചി തടത്തരികത്ത് വീട്ടില്‍ ബിജു എന്ന വിനോദ് (41), മൂന്നാം പ്രതി പാലോട് കരിഞ്ചയില്‍ സിമി ഭവനില്‍ സുബി നായര്‍ (33), അഞ്ചാം പ്രതി പേരയം പൊടിക്കിലാം കിഴക്കുംകര പുത്തന്‍ വീട്ടില്‍ അനു എന്ന അനീഷ് (23) എന്നിവരാണ് അറസ്റ്റിലായത്.

പേരയം യുപിഎസിന് സമീപം മേക്കുംകര പുത്തന്‍ വീട്ടില്‍ പട്ടികജാതി വിഭാഗത്തില്‍പെട്ട എം.ബാബുരാജ് (42) നെയാണ് മകരവിളക്ക് ദിവസമായ ജനുവരി 14 ന് വൈകിട്ട് ആറംഗ സംഘം ദേഹോപദ്രവം ഏല്‍പ്പിച്ചതും കമ്പികൊണ്ടടിച്ചതും. ശേഷം ഉടുമുണ്ട് അഴിച്ചുകളഞ്ഞ് മൊബൈലില്‍ ഫോട്ടോയെടുത്തെന്നും പൊലീസ് അറിയിച്ചു. ഇതു സംബന്ധിച്ച് പാലോട് പൊലീസ് സ്‌റ്റേഷനില്‍ ബാബുരാജ് നല്‍കിയ പരാതി നല്‍കിയിരുന്നു. മൂവരേയയും കോടതിയില്‍ ഹാജരാക്കി റിമാന്റ് ചെയ്തു. ഇനി മൂന്ന് പ്രതികളെ പിടികിട്ടാനുണ്ട്.