ചേര്‍ത്തല കെ.വി.എം ആശുപത്രിയിലെ നഴ്സുമാരുടെ സമരം തുടരും. ഇന്ന് ലേബര്‍ കമ്മീഷണറുടെ മധ്യസ്ഥതയിൽ തിരുവനന്തപുരത്ത് നടന്ന ചർച്ച പരാജയപ്പെട്ടതോടെയാണ് സമരവുമായി നഴ്സുമാർ മുന്നോട്ട് പോകാൻ തീരുമാനിച്ചത്. പുറത്താക്കിയ മുഴുവന്‍ നഴ്സുമാരെയും തിരിച്ചെടുക്കണമെന്ന യു.എന്‍.എയുടെ ആവശ്യം മാനേജ്മെന്റ് നിരസിക്കുകയായിരുന്നു.

പതിനഞ്ച് പേരെ മാത്രമേ തിരിച്ചെടുക്കാന്‍ കഴിയൂ എന്ന് മാനേജ്മെന്റ് വാശി പിടിച്ചതാണ് ചർച്ച പൊളിയാന്‍ കാരണമായത്. അടുത്ത ബുധനാഴ്ച ലേബര്‍ കമ്മീഷണറുടെ നേതൃത്വത്തില്‍ വീണ്ടും ചര്‍ച്ച നടത്താമെന്ന ധാരണയിലാണ് പിരിഞ്ഞത്.

മെച്ചപ്പെട്ട സേവന വേതന വ്യവസ്ഥകള്‍ ആവശ്യപ്പെട്ട് മാസങ്ങളായി കെ.വി.എം ആശുപത്രിക്കു മുന്നില്‍ നഴ്സുമാര്‍ സമരം തുടരുകയാണ്.110 നഴ്സുമാരെ പുറത്താക്കിയിരുന്നു. ഇവരെ തിരിച്ചെടുക്കണമെന്നാണ് യു.എന്‍.എയുടെ ആവശ്യം. ഇത് അംഗീകരിക്കാന്‍ മാനേജ്മെന്റ് തയ്യാറായില്ല. സമരം 200 ദിവസത്തോട് അടുക്കുകയാണ്.