കേരള ഹൈക്കോടതിക്കെതിരെ സി പി എമ്മിൽ അമർഷം പുകയുന്നു. ഇക്കാര്യത്തിൽ സി പി എമ്മിന് ഐക്യദാർഢ്യം പ്രഖ്യാപിച്ച് സീറോ മലബാർ സഭയും രംഗത്തെത്തി. ഇത് ചിലപ്പോൾ ഒരു രാഷ്ട്രീയ പ്രണയമായി പൂത്തുലയാനുള്ള സാധ്യത ഏറെയാണ്. സീറോ മലബാർ സഭാംഗമായ കെ.എം.മാണിയുടെ കേരള കോൺഗ്രസ് ഇതിനകം സി പി എമ്മിനോട് ആഭിമുഖ്യം വ്യക്തമാക്കി കഴിഞ്ഞു.

കണ്ണൂരിലെ ഷുഹൈബ് വധവും മാർ ജോർജ് ആലഞ്ചേരിക്ക് എതിരായ വിധിയുമാണ് തികച്ചും അപ്രതീക്ഷിതമായി ഇരുവിഭാഗങ്ങളെയും ഒരുമിപ്പിച്ചിരിക്കുന്നത്. ഷുഹൈബ് വധത്തിൽ കേരള ഹൈക്കോടതി സർക്കാരിനെതിരെ ആഞ്ഞടിക്കുകയായിരുന്നു. തികച്ചും അപ്രതീക്ഷിതമായ പ്രഹരമാണ് സർക്കാരിന് ലഭിച്ചത്. സർക്കാർ പ്രതിരോധത്തിലാവുകയും ചെയ്തു.

ഏതാനും വർഷങ്ങൾക്ക് മുമ്പ് ഇതേ ഹൈക്കോടതിയും ഇതേ ജഡ്ജിയും പറഞ്ഞ ചില വാചകങ്ങളാണ് അന്നത്തെ ധനമന്ത്രി കെ എം മാണിയെ കൊണ്ട് മന്ത്രിസ്ഥാനം രാജിവയ്പിച്ചത്. അൽപത് വർഷത്തെ നിയമസഭാ പരിചയമുള്ള മാണിയുടെ എല്ലാ നേട്ടങ്ങളും വിസ്മരിച്ചു കൊണ്ടാണ് സീസറിന്റെ ഭാര്യയെ കൂട്ടുപിടിച്ച് കേരള ഹൈക്കോടതിയിലെ ഒരു ജഡ്ജി മാണിയെ പുറത്താക്കിയത്.

അന്ന് കേരള ഹൈക്കോടതിയും ജഡ്ജിയും സി പി എമ്മിന്റെ തമ്പുരാൻ കർത്താവായിരുന്നു. കാലം മൂന്ന് വർഷത്തിനുള്ളിൽ തിരിച്ചടിച്ചു. അതേ ജഡ്ജി സർക്കാരിലെ പ്രമാണിമാരെ കൊലപാതകത്തിലെ ഗൂഢാലോചനക്കാരാക്കി. ഇപ്പോൾ സി പി എമ്മിന് ജഡ്ജിയും കോടതിയും മോശം. കോടതിയുടെ നിലപാടിനെ കുറിച്ച് സഖാക്കൾക്ക് അമർഷം പുകയുന്നു.

അതായത് സ്വന്തം കാര്യം പറയുമ്പോൾ ജഡ്ജി കൊള്ളാം. പൊല്ലാ കാര്യം പറയുമ്പോൾ ജഡ്ജി മോശം. മാണിക്കെതിരെ ജഡ്ജി പറഞ്ഞ വാചകങ്ങൾ കേട്ട് മാണിയുടെ വണ്ടി തടഞ്ഞവർ ഇന്ന് മാളത്തിൽ ഒളിച്ചിരിക്കന്നു.

ഹൈക്കോടതി ഇത്തരം വിമാശനങ്ങൾ സാധാരണ ചെവി കൊള്ളാറില്ല. അവർക്ക് മുമ്പിൽ വിധിന്യായങ്ങൾ മാത്രമാണുള്ളത്. വിധി പാസാക്കി കഴിഞ്ഞ് വരുന്ന വെടിക്കെട്ടുകൾ അവർ ചെവി കൊള്ളാറില്ല. മുഖ്യമന്ത്രിയും സി പി എം ജില്ലാ സെക്രട്ടറിയും ഹൈക്കോടതിക്കെതിരെ രംഗത്തെത്തി. കോടതി ഉത്തരവുകൾ തങ്ങൾ ശ്രദ്ധിക്കാറില്ലെന്നാണ് ഇവരുടെ വാദം. ഏതായാലും സർക്കാരും പാർട്ടിയും പ്രതിസന്ധി.

മാർ ആലഞ്ചേരിക്കെതിരായ കോടതി വിമർശനം സി പി എമ്മിനെ പോലുള്ള പ്രതിസന്ധിയിലാണ് സഭയെ കൊണ്ട് എത്തിച്ചത്. സഭ ഹൈക്കോടതിക്കെതിരെ പരസ്യമായി രംഗത്തെത്തി. തങ്ങൾ കോടതിയെ അനുസരിക്കില്ലെന്ന് വൈദികർ തുറന്നു പറഞ്ഞു. തങ്ങൾക്ക് കാനോൻ നിയമമാണ് ബാധകമെന്നാന്ന് അവരുടെ കണ്ടെത്തൽ. കോടതിയുടെ ക്രമസമാധാനം തങ്ങൾക്ക് മേൽ ചുമത്തേണ്ടെന്നും അവർ തുറന്നടിച്ചു. സി പി എമ്മും സഭയും ഒരുമിച്ചാൽ കേരളത്തിൽ അത്ഭുതങ്ങൾ സംഭവിക്കും. രാഷ്ട്രീയ സമവാക്യങ്ങൾ മാറിമറിയും.