ഹിന്ദുസ്ഥാന് ലൈഫ് കെയര് പൊതുമേഖലയില് നിലനിറുത്തണമെന്ന് മുഖ്യമന്ത്രി നിയമസഭയില്
ആരോഗ്യമേഖലയിലെ ഉല്പ്പന്നങ്ങള്, ഹെല്ത്ത് സര്വീസ് കണ്സള്ട്ടന്സി രംഗത്ത് തുടര്ച്ചയായി ലാഭമുണ്ടാക്കുന്ന ഹിന്ദുസ്ഥാന് ലൈഫ് കെയര് പൊതുമേഖലയില് നിലനിറുത്തണമെന്നാവശ്യപ്പെട്ട് കേന്ദ്രത്തില് സമ്മര്ദ്ദം ചെലുത്തുന്നതായി മുഖ്യമന്ത്രി പിണറായി വിജയന് നിയമസഭയില് പറഞ്ഞു.
വിവിധ യൂണിറ്റുകള് തുടങ്ങാന് 19 ഏക്കറോളം സ്ഥലം സംസ്ഥാന സര്ക്കാര് സൗജന്യമായി അനുവദിച്ചിട്ടുണ്ട്. സ്വകാര്യവല്ക്കരിക്കാനുള്ള കേന്ദ്രസര്ക്കാര് നീക്കം ഉപേക്ഷിക്കണമെന്ന് ആവശ്യപ്പെട്ട് പ്രധാനമന്ത്രിക്ക് കത്തയച്ചിരുന്നു. എന്നാല് കമ്പനിയുടെ മുഴുവന് ഓഹരികളും വിറ്റഴിക്കാനുള്ള നടപടികളുമായി കേന്ദ്രം മുന്നോട്ട് പോകുകയാണ്.
ഹിന്ദുസ്ഥാന് ലൈഫ് കെയര് ലിമിറ്റഡിന്റെയും ഹിന്ദുസ്ഥാന് ന്യൂസ് പ്രിന്റ് ലിമിറ്റഡിന്റെയും ഓഹരികള് വിറ്റഴിക്കാന് തത്വത്തില് തീരുമാനിച്ച നടപടി പുനഃപരിശോധിക്കണമെന്ന് ആവശ്യപ്പെട്ട് കഴിഞ്ഞമാസം കേന്ദ്ര ധനകാര്യമന്ത്രിക്ക് കത്തയച്ചിരുന്നു. സര്ക്കാര് ഭൂമി ലഭ്യമാക്കിയും നികുതിയിനത്തില് പരമാവധി ഇളവ് നല്കിയും പ്രവര്ത്തന മൂലധനത്തിന് ബാങ്കുകളില് സര്ക്കാര് ഗ്യാരണ്ടി നല്കിയും സൗകര്യങ്ങള് ഒരുക്കാമെന്ന് കേന്ദ്രത്തെ അറിയിച്ചിട്ടും അനുകൂലമായ പ്രതികരണം ഉണ്ടായിട്ടില്ല.
മറ്റ് ചില കേന്ദ്ര പൊതുമേഖലാ സ്ഥാപനങ്ങളും സ്വകാര്യവല്ക്കരിക്കാനുള്ള നീക്കം നടക്കുന്നുണ്ട്. ഇവയെല്ലാം പൊതുമേഖലയില് തന്നെ നിലനിറുത്താന് ശക്തമായ ഇടപെടല് സംസ്ഥാന സര്ക്കാര് നടത്തുന്നുണ്ടെന്നും ഡി.കെ.മുരളിയുടെ ശ്രദ്ധക്ഷണിക്കലിന് മുഖ്യമന്ത്രി മറുപടി നല്കി.
https://www.facebook.com/Malayalivartha
