പതിനഞ്ചാം ധനകാര്യകമ്മിഷന് വേണ്ടി തയ്യാറാക്കിയ പരിഗണനാ വിഷയങ്ങള്‍ മാറ്റണമെന്ന് മുഖ്യമന്ത്രി പിണറായി വിജയന്‍ ആവശ്യപ്പെട്ടു. ഈ ആവശ്യമുന്നയിച്ച് സംസ്ഥാന സര്‍ക്കാര്‍ വിളിച്ചുകൂട്ടിയ ദക്ഷിണേന്ത്യന്‍ ധനമന്ത്രിമാരുടെ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ധനകാര്യ കമ്മിഷന്റെ ഇപ്പോഴത്തെ പരിഗണനാവിഷയങ്ങള്‍ വ്യക്തമാക്കുന്നത് കേന്ദ്രസര്‍ക്കാരിന്റെ ആശയങ്ങള്‍ സംസ്ഥാനങ്ങളുടെ മേല്‍ അടിച്ചേല്പിക്കുകയാണെന്നാണ്. ജി.എസ്. ടി വന്നതോടെ സംസ്ഥാനങ്ങള്‍ക്ക് ധനസമാഹരണം നടത്താനുള്ള മാര്‍ഗങ്ങള്‍ കുറഞ്ഞു.
സംസ്ഥാന ആസൂത്രണ ബോര്‍ഡ് നടത്തിയ പഠനത്തില്‍ സഹകരണ രംഗത്തുള്‍പ്പെടെ പല മേഖലയിലും നോട്ട് നിരോധനം തിരിച്ചടിയുണ്ടാക്കിയതായും മുഖ്യമന്ത്രി പറഞ്ഞു. കേന്ദ്ര നികുതി വരുമാനം സംസ്ഥാനങ്ങള്‍ക്ക് വീതിച്ച് നല്‍കുന്നത് ഫെഡറിലസത്തിന്റെ തത്വങ്ങള്‍ക്കനുസരിച്ചായിരിക്കണം. സംസ്ഥാനങ്ങളുടെ വികസന പ്രകിയയില്‍ സൂക്ഷ്മതലത്തില്‍ വരെ ഇടപെടാന്‍ കേന്ദ്രത്തിന് കഴിയുന്ന വിധത്തിലാണ് പരിഗണനാ വിഷയങ്ങള്‍ തയ്യാറാക്കിയിരിക്കുന്നത്.
കേന്ദ്രത്തിന് വേണ്ടതിന്റെ ബാക്കി സംസ്ഥാനങ്ങള്‍ക്ക് നല്‍കുക എന്നതാകരുത് നയം. നല്ല പ്രകടനം കാഴ്ച വച്ചതിന് സംസ്ഥാനങ്ങള്‍ക്ക് പ്രത്യേക പരിഗണന നല്‍കുന്നതിന് പകരം അവരെ ശിക്ഷിക്കാനാണ് കേന്ദ്രം ശ്രമിക്കുന്നത്.
ജനസംഖ്യാ നിയന്ത്രണം നടപ്പിലാക്കിയ സംസ്ഥാനങ്ങളെ അതിന്റെ പേരില്‍ ശിക്ഷിക്കരുത്. ഇതുമൂലം കേരളത്തില്‍ വൃദ്ധരുടെ തോത് കൂടിയിട്ടുണ്ട്. അവരുടെ ക്ഷേമ പ്രവര്‍ത്തനങ്ങള്‍ക്ക് കൂടുതല്‍ തുക വേണം. ഭരണഘടനാ തത്വങ്ങളായിരിക്കണം, അല്ലാതെ കേന്ദ്രം ഉണ്ടാക്കിയ പരിഗണനാ വിഷയങ്ങളല്ല ധനകാര്യ കമ്മിഷനെ നിയന്ത്രിക്കേണ്ടത് . ഭരണഘടനാ താല്പര്യങ്ങള്‍ക്കനുസരിച്ച് പരിഗണനാ വിഷയങ്ങളില്‍ മാറ്രം വരുത്തണം. കേന്ദ്രം അതിന്റെ നികുതി വിഹിതം സംസ്ഥാനങ്ങള്‍ക്ക് നല്‍കുന്നതില്‍ വിവേചനം കാണിക്കുകയാണെന്നും മുഖ്യമന്ത്രി കുറ്രപ്പെടുത്തി.

നാട്ടിന്റെ വികസനത്തില്‍ കൂടുതല്‍ പങ്കും സംസ്ഥാനങ്ങളുടെതാണ്. എന്നാല്‍ അതിനനുസരിച്ചുളള വിഹിതം കിട്ടുന്നില്ല. കമ്മി കുറയ്ക്കുക എന്നു പറയുന്നത് അത്ര എളുപ്പമുള്ള കാര്യമല്ല. പതിന്നാലാം ധനകാര്യ കമ്മിഷന്‍ കേന്ദ്രനികുതിയുടെ 42% ആണ് സംസ്ഥാനങ്ങള്‍ക്ക് നികുതി വിഹിതമായി തന്നത്. ഇത്തവണ അതില്‍ കുറയാന്‍ പാടില്ലെന്നും പിണറായി ആവശ്യപ്പെട്ടു.