പേര് പ്രിന്സിപ്പല് ജോലി തൂപ്പ്!
താന് വലിയ പ്രിന്സിപ്പലാണെന്ന് പറഞ്ഞിട്ട് ഒരു കാര്യവുമില്ല. കേരളത്തിലെ ഹയര്സെക്കന്ഡറി സ്കൂള് പ്രിന്സപ്പല്മാരുടെ ജീവിതചക്രം വായിക്കുക.
അതിരാവിലെ കഴിയുമെങ്കില് പുലര്ച്ചെ സ്കൂളിലെത്തണം. തൂപ്പുകാരില്ലാത്തതിനാല് സ്കൂള്മുറ്റം തൂക്കണം. കക്കൂസ് കഴുകാന് ആളില്ലാത്തതിനാല് കക്കൂസ് കഴുകണം. അപ്പോള് സമയം ഒന്പതാകും. ഒന്പതു മണിക്കാണ് ഇപ്പോള് ഹയര്സെക്കന്ഡറി തുടങ്ങുന്നത്. പിള്ളാര് വരുമ്പോള് ക്ലാസ് മുറികള് തുറന്നു കൊടുക്കണം. അധ്യാപകര് വരുമ്പോള് ഒന്പതരയും പത്തുമൊക്കെയാവും. അതുവരെ പിള്ളാരെ കൈകാര്യം ചെയ്യണം.
ഇതിനിടയില് ഹയര്സെക്കന്ഡറി ഡയറക്ടറേറ്റില് നിന്നും ഫോണ് വരും. അതിന് കൃത്യമായി മറുപടി നല്കിയില്ലെങ്കില് മെമ്മോ കിട്ടും. ഒന്പതടിക്കുമ്പോള് സ്കൂള് ബെല്ലടിക്കണം. അധ്യാപകരൊക്കെ വന്നോയെന്ന് ഹാജര് ബുക്ക് നോക്കി ഉറപ്പിക്കണം. ഉച്ചയ്ക്ക് കുട്ടികള് ഭക്ഷണം കഴിക്കുന്ന കാര്യം നോക്കണം. ചില വിദ്വാന്മാര് സിഗററ്റ് വലിക്കും. അത് തടയണം. പെണ്കുട്ടികളെ കമന്റടിക്കുന്നവരുണ്ട്. അവരെയും കൈകാര്യം ചെയ്യണം.
ഇതിനിടയില് പെണ്കുട്ടികളുടെ ശുചിമുറിയില് പ്രിന്സിപ്പലിന്റെ അശ്ലീല ചിത്രം ആരെങ്കിലും വരച്ചാല് അത് മായ്ച്ചു കളയണം. ഹയര് സെക്കന്ഡറിയില് ഒരു പ്യൂണിനെയും ക്ലാര്ക്കിനെയും നിയമിക്കണമെന്ന ആവശ്യത്തിന് വര്ഷങ്ങളുടെ പഴക്കമുണ്ട്. പക്ഷേ ആരു കേള്ക്കാന് ? സര്ക്കാര് യഥേഷ്ടം ഹയര് സെക്കന്ഡറി സ്കൂളും ബാച്ചും അനുവദിക്കും. എന്നാല് പ്യൂണിനെയും ക്ലാര്ക്കിനെയും കൊടുക്കില്ല. അതിന് കൈക്കൂലി കിട്ടില്ലല്ലോ.
ഹൈസ്കൂളിലെ ഗുമസ്തനെ വിനിയോഗിച്ചോ എന്ന് സര്ക്കാര് പറയും എന്നാല് ഹൈസ്കൂളിന്റെ മേലധികാരി ഹെഡ്മാസ്റ്റര് ആയതിനാല് പ്രിന്സിപ്പല് പറയുന്നത് ആരും കേള്ക്കാറില്ല. ഹയര് സെക്കന്ഡറിയിലെ ജോലിക്ക് സര്ക്കാര് നല്കുന്ന പിച്ചക്കാശ് തങ്ങള്ക്കു വേണ്ടെന്നാണ് ഗുമസ്തനും ശിപായിയും പറയുന്നത്.
ഇതിനിടയില് പ്രിന്സിപ്പല് 24 പിരീഡ് ആഴ്ചയില് പഠിപ്പിക്കണം. സമയം കിട്ടാത്തതിനാല് ഗസ്റ്റിനെ വച്ച് പഠിപ്പിക്കുന്നവരും കുറവല്ല. അതേസമയം വി.എച്ച്.എസ്.സി സ്കൂളുകളിലെ പ്രിന്സിപ്പല്മാരെ സഹായിക്കാന് മൂന്നു പേരുണ്ട്. ആശ്ചര്യം എന്നല്ലാതെ എന്തു പറയാന്.
ഡെറ്റോളിട്ട് കഴുകിയാലും കൈയിലെ നാറ്റം പോകുന്നില്ലെന്നാണ് പ്രിന്സിപ്പല്മാര് പറയുന്നത്!
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
