എല്ലാ തെരഞ്ഞെടുപ്പുകളിലും സമദൂരം പാലിക്കുന്ന നായര്‍ സര്‍വ്വീസ് സൊസൈറ്റി ചെങ്ങന്നൂരില്‍ ബി.ജെ.പിയുമായി അകല്‍ച്ചയില്‍. എന്‍.എസ്.എസിന്റെ ചങ്ങനാശേരിയിലെ ആശുപത്രിയെ തകര്‍ക്കാന്‍ ബി.എം.എസ് ശ്രമിച്ചെന്ന് ആരോപിച്ചാണ് ചെങ്ങന്നൂരില്‍ ഒരു പിന്തുണയും നല്‍കില്ലെന്ന ചൂചന മുഖപത്രമായ സര്‍വീസിലൂടെ വ്യക്തമാക്കി. രാഷ്ട്രീയത്തിന്റെ പിന്‍ബലത്തില്‍ എന്‍.എസ്.എസിനെ ആരും അലോസരപ്പെടുത്താന്‍ നോക്കണ്ട- എന്ന തലക്കെട്ടിലെഴുതിയ മുഖപ്രസംഗത്തിലാണ് കാര്യങ്ങള്‍ വ്യക്തമാക്കുന്നത്. എന്‍.എസ്.എസ് ആസ്ഥാനമായ പെരുന്നയിലുള്ള മെഡിക്കല്‍ മിഷന്‍ ആശുപത്രിയില്‍ ബി.എം.എസ് യൂണിയന്റെ നേതൃത്വത്തില്‍ പ്രശ്‌നങ്ങള്‍ ഉണ്ടാക്കാന്‍ ശ്രമിച്ചെന്നാണ് ആക്ഷേപം. സമുദായനേതാക്കള്‍ സമയോചിതമായി ഇടപെട്ടത് കൊണ്ടാണ് സംഭവം പരിഹരിക്കാനായതെന്നും എഡിറ്റോറിയലില്‍ പറയുന്നു.

തങ്ങളോട് രാഷ്ട്രീയ പാര്‍ട്ടികള്‍ സ്വീകരിക്കുന്ന സമീപനങ്ങള്‍ക്കും നയങ്ങള്‍ക്കും അനുസരിച്ചായിരിക്കും തിരിച്ചുള്ള സമീപനമെന്ന് എന്‍.എസ്.എസ് നേതൃത്വം വ്യക്തമാക്കി കഴിഞ്ഞു. ഇത് ബി.ജെ.പിയെ ലക്ഷ്യം വെച്ചാണെന്ന് എല്ലാവര്‍ക്കും അറിയാം. പെരുന്ന ആശുപത്രിയില്‍ പ്രശ്‌നങ്ങള്‍ സൃഷ്ടിച്ചത് ബി.എം.എസ് ആണെങ്കിലും അത് ഏറ്റത് ബി.ജെ.പിക്കാണ്. ആശുപത്രിക്ക് എതിരെ നടന്ന സംഭവം ഒറ്റപ്പെട്ടതല്ലെന്നാണ് എന്‍.എസ്.എസ് നേതൃത്വം വ്യക്തമാക്കുന്നത്. സമുദായത്തെ രാഷ്ട്രീയമായി കീഴ്‌പ്പെടുത്താനുള്ള ചിലരുടെ സംഘടിത ശ്രമമായാണ് അതിനെ കാണുന്നത്. അവസരം കിട്ടുമ്പോഴെല്ലാം എന്‍.എസ്.എസിനെതിരെ ആഞ്ഞടിക്കുകയും അലോസരപ്പെടുത്തുകയും ചെയ്യുന്നത് അടുത്തിടെയൊന്നും തുടങ്ങിയതല്ല. മുമ്പ് പല രാഷ്ട്രീയ പാര്‍ട്ടികളും ഇത് പരീക്ഷിച്ചിട്ടുണ്ട്. അപ്പോഴൊക്കെ ചെറുത്ത് തോല്‍പ്പിച്ച പാരമ്പര്യമാണ് എന്‍.എസ്.എസിനുള്ളതെന്നും സര്‍വീസില്‍ പറയുന്നു.

എന്‍.എസ്.എസിന് നിര്‍ണായ സ്വാധീനമുള്ള മണ്ഡലമാണ് ചെങ്ങന്നൂര്‍. പ്രത്യേകിച്ച് മുണ്ടന്‍കാവ് യൂണിയന്‍ വളരെ ശക്തമാണ്. അതിനാല്‍ ബി.എം.എസ് നിലപാട് ബി.ജെ.പിക്ക് ദോഷം ചെയ്യുമെന്ന് ഉറപ്പാണ്. ഒരു പാര്‍ട്ടിയുടെയും ആഭ്യന്തരപ്രശ്‌നങ്ങളില്‍ എന്‍.എസ്.എസ് ഇടപെടാറില്ലെന്നും അതിനാല്‍ സമുദായത്തിന്റെ ആഭ്യന്തരപ്രശ്‌നങ്ങളില്‍ മറ്റാരും ഇടപെടേണ്ടെന്നും സംഘടന മുന്നറിയിപ്പ് നല്‍കുന്നു. ഈ നിലപാട് എല്‍.ഡി.എഫിനാണ് കൂടുതല്‍ ഗുണം ചെയ്യുക. കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് രമേശ് ചെന്നിത്തലയെ താക്കോല്‍ സ്ഥാനത്ത് കൊണ്ടുവരാന്‍ എന്‍.എസ്.എസ് ജനറല്‍ സെക്രട്ടറി സുകുമാരന്‍ നായര്‍ ശ്രമിച്ചിരുന്നു എന്നത് പരസ്യമായ രഹസ്യമാണ്. കാര്യം കഴിഞ്ഞപ്പോള്‍ ചെന്നിത്തല കാലുവാരിയെന്നാണ് ആക്ഷേപം. കോണ്‍ഗ്രസുമായും യു.ഡി.എഫുമായും എന്‍.എസ്.എസ് നേതൃത്വം അത്രരസത്തിലല്ല. എന്നാല്‍ ദേവസ്വം ബോര്‍ഡിലെ നിയമനങ്ങളില്‍ മുന്നോക്കക്കാരിലെ പിന്നോക്കക്കാര്‍ക്ക് 10 ശതമാനം സംവരണം കൊണ്ടുവരാന്‍ മുഖ്യമന്ത്രി പിണറായി വിജയന്‍ ശ്രമിക്കുന്നതിനാല്‍ എന്‍.എസ്.എസ് എല്‍.ഡി.എഫിനൊപ്പമാണ്.