ശ്രീജിത്തിന്റെ കസ്റ്റഡി മരണത്തില്‍ മൂന്ന് പോലീസ് ഉദ്യോഗസ്ഥര്‍ക്ക് സസ്‌പെന്‍ഷന്‍. എസ്.പിയുടെ നിയന്ത്രണത്തിലുള്ള റൂറല്‍ ടൈഗര്‍ ഫോഴ്‌സിലെ ഉദ്യോഗസ്ഥര്‍ക്കെതിരെയാണ് നടപടി. ശ്രീജിത്തിനെ വീട്ടില്‍നിന്ന് കസ്റ്റഡിയിലെടുത്തതില്‍ പോലീസ് ഉദ്യോഗസ്ഥര്‍ക്ക് വിഴ്ചയുണ്ടായതായി കണ്ടെത്തിയതിനെ തുടര്‍ന്നാണ് സസ്‌പെന്‍ഷന്‍. അന്വേഷണ വിധേയമായാണ് മൂന്ന് പോലീസ് ഉദ്യോഗസ്ഥരെ സസ്‌പെന്‍ഡ് ചെയ്തിട്ടുള്ളതെന്ന് റൂറല്‍ എസ്.പി എ.വി ജോര്‍ജ് മാധ്യമങ്ങളോട് പറഞ്ഞു.

കൂടുതല്‍ പേര്‍ക്കെതിരെ നടപടി വേണമോയെന്ന് പിന്നീട് തീരുമാനിക്കും. അറസ്റ്റുചെയ്ത സമയത്ത് പോലീസ് ഉപദ്രവിച്ചതായി പരാതി ഉയര്‍ന്നിട്ടുണ്ട്. ശ്രീജിത്ത് നിരപരാധിയാണോ അല്ലയോ എന്നകാര്യം ഇപ്പോള്‍ പറയാനാകില്ല. പ്രത്യേക അന്വേഷണസംഘത്തെ ഡി.ജി.പി ചുമതലപ്പെടുത്തിയിട്ടുണ്ട്. അന്വേഷണം പൂര്‍ത്തിയായ ശേഷമെ കൂടുതല്‍ കാര്യങ്ങള്‍ പറയാനാകൂവെന്നും റൂറല്‍ എസ്.പി എ.വി ജോര്‍ജ് കൂട്ടിച്ചേര്‍ത്തു.

ശ്രീജിത്തിന് മര്‍ദനമേറ്റതായും ആന്തരിക അവയവങ്ങള്‍ക്ക് മുറിവേറ്റതായും പോസ്റ്റുമോര്‍ട്ടം റിപ്പോര്‍ട്ടില്‍ വ്യക്തമാക്കിയിട്ടുണ്ട്. അതിനിടെ മൃതദേഹവുമായി വരാപ്പുഴയില്‍ ബി.ജെ.പി പ്രവര്‍ത്തകര്‍ ദേശീയപാത ഉപരോധിച്ചു. കസ്റ്റഡി മരണത്തില്‍ പോലീസ് ഉദ്യോഗസ്ഥര്‍ക്കെതിരെ നടപടി ആവശ്യപ്പെട്ടായിരുന്നു ബി.ജെ.പിയുടെ റോഡ് ഉപരോധം.

ജില്ലാ കളക്ടറും റൂറല്‍ എസ്.പിയും വരാപ്പുഴയിലെത്തി പ്രതിഷേധക്കാരുമായി സംസാരിച്ചശേഷമാണ് റോഡ് ഉപരോധം അവസാനിച്ചത്. മൂന്ന് പോലീസ് ഉദ്യോഗസ്ഥരെ സസ്‌പെന്‍ഡ് ചെയ്തത് അടക്കമുള്ള നടപടികള്‍ അധികൃതര്‍ പ്രതിഷേധക്കാരെ അറിയിച്ചു. ഇതോടെയാണ് റോഡ് ഉപരോധം അവസാനിപ്പിച്ചത്.