സഖാവ് ബിനോയി കോടിയേരിയും അങ്ങനെ ഭക്തനായി. വെറും ഭക്തനല്ല അയ്യപ്പഭക്തന്‍. സഖാവിനെ ഭക്തിമാര്‍ഗത്തിലേക്ക് കൂട്ടികൊണ്ട് പോയതാകട്ടെ അഭിവക്തകമ്മ്യൂണിസ്റ്റ് പാര്‍ട്ടിയിലെ ജീവിച്ചിരിക്കുന്ന ഏക നേതാവായ വി.എസിന്റെ മകന്‍ വി.എ അരുണ്‍കുമാര്‍. അരുണ്‍ കുമാര്‍ പണ്ടേ ഭക്തനാണ്. ഇടയ്ക്കിടെ ക്ഷേത്രദര്‍ശനം നടത്താറുണ്ട്. അരുണ്‍കുമാറിനൊപ്പം ബിനീഷ് വിഷുപ്പുലരിയില്‍ ശബരിമലകയറി ദര്‍ശനം നടത്തി. വിഷുപ്പുലരിയില്‍ നാലിന് നടതുറന്നപ്പോള്‍ അയ്യപ്പസ്വാമിയെ കണ്ട് തൊഴുത് പ്രാര്‍ത്ഥിക്കാന്‍ സഖാവ് ബിനോയി എത്തിയത് തന്ത്രിയെ പോലും ഞെട്ടിച്ചു. വി.ഐ.പി ദര്‍ശനമാണ് സഖാവ് ബിനോയി കോടിയേരി നടത്തിയത് എന്നതും ശ്രദ്ധേയമാണ്. സോപാനത്ത് നിന്ന് തൊഴാനുള്ള വി.ഐ.പികളുടെ പട്ടികയില്‍ ബിനോയിയും അരുണ്‍കുമാറും ഇടംപിടിച്ചിരുന്നു.

തന്ത്രി കണ്ഠരര് മഹേഷ് മോഹനരില്‍ നിന്നും വിഷുകൈനീട്ടവും വാങ്ങി ഗണപതിഹോമത്തിലും പങ്കാളിയായാണ് സഖാവ് ബിനോയി കോടിയേരി മലയിറങ്ങിയത്. മുമ്പ് കോടിയേരി ബാലകൃഷ്ണന്റെ പേരില്‍ കാടാമ്പുഴ ക്ഷേത്രത്തില്‍ ശത്രുസംഹാരത്തിന് പൂമൂടല്‍ വഴിവാട് നടത്തിയത് വിവാദമായിരുന്നു. അദ്ദേഹം ആഭ്യന്തരമന്ത്രിയായ സമയത്തായിരുന്നു അത്. പിന്നീട് കോടിയേരി കയ്യില്‍ ഏലസ് കെട്ടിയിട്ടുണ്ടെന്ന വാര്‍ത്ത ഏഷ്യാനെറ്റ് പുറത്ത് വിട്ടു. എന്നാലത് ഷുഗര്‍ നിയന്ത്രിക്കുന്നതിനുള്ള മെഡിക്കല്‍ ഉപകരണമായിരുന്നു. പഠനകാലം മുതല്‍ എസ്.എഫ്.ഐയുടെ സജീവ പ്രവര്‍ത്തകനായിരുന്ന ബിനീഷ് കോടിയേരി അടുത്തകാലത്ത് ഉണ്ടായ ഗള്‍ഫ് വിവാദങ്ങളുടെ പശ്ചാത്തലത്തിലാണ് ശബരിമല ദര്‍ശനം നടത്തിയതെന്ന് അറിയുന്നു.

മന്ത്രി കടകംപള്ളി സുരേന്ദ്രന്‍ ഗുരുവായൂര്‍ ക്ഷേത്രദര്‍ശനം നടത്തുകയും വഴിപാടുകള്‍ കഴിപ്പിക്കുകയും ചെയ്തത് വിവാദമായിരുന്നു. ബി.ജെ.പിയും ആര്‍.എസ്.എസും അതിനെ സ്വാഗതം ചെയ്തിരുന്നു. ശൃംഗേരി മഠാധിപതിയുടെ ആശീര്‍വാദം സ്വീകരിക്കാന്‍ മന്ത്രി ജി.സുധാകരനും മന്ത്രി തോമസ് ഐസക്കും പോയതും പ്രദാസം സ്വീകരിച്ചതും വിവാദമായിരുന്നു. ഇതേ മഠാതിപതി തിരുവനന്തപുരത്ത് ഒരു ചടങ്ങിനെത്തിയപ്പോള്‍ അദ്ദേഹത്തിനിരിക്കാന്‍ പ്രത്യേകം കസേര കൊണ്ടുവന്നത് മന്ത്രി കടകംപള്ളി സുരേന്ദ്രന്റെ നേതൃത്വത്തില്‍ എടുത്ത് മാറ്റിയിരുന്നു.