തൃശൂര് പൂരത്തിനു ഇന്ന് കൊടിയേറും... നാട്ടുകാര് ഒത്തൊരുമിച്ച് ദേവീ ദേവന്മാര്ക്ക് മുന്നില് കൊടി ഉയര്ത്തുന്നതോടെ തട്ടകങ്ങള് പൂരാവേശത്തിലലിയും.....ഈമാസം 25 നാണ് പൂരം
പൂരങ്ങളുടെ പൂരമായ തൃശൂര് പൂരത്തിനു ഇന്ന് കൊടിയേറും. തിരുവമ്പാടിപാറമേക്കാവ് ക്ഷേത്രങ്ങളിലും ഘടക പൂരക്ഷേത്രങ്ങളിലുമായാണ് കൊടിയേറ്റ്. നാട്ടുകാര് ഒത്തൊരുമിച്ച് ദേവീ ദേവന്മാര്ക്ക് മുന്നില് കൊടി ഉയര്ത്തുന്നതോടെ തട്ടകങ്ങള് പൂരാവേശത്തിലലിയും.....ഈമാസം 25 നാണ് പൂരം. 23ന് സാമ്പിള് വെടിക്കെട്ടും 26ന് ഉപചാരം ചൊല്ലലും നടക്കും.തൃശൂരിന്റെ കാഴ്ചകള്ക്കും വിശേഷങ്ങള്ക്കുമെല്ലാം ഇപ്പോ പൂരച്ചൂടാണ്.
സ്വരാജ് റൗണ്ടിലെ പന്തല് നിര്മാണ പ്രവര്ത്തനങ്ങള് പകുതിയിലേറെ പൂര്ത്തിയായി കഴിഞ്ഞു. മാസങ്ങള്ക്ക് മുമ്പ് തന്നെ പൂരത്തിന്റെ അണിയറ ഒരുക്കം ദേവസ്വങ്ങള് ആരംഭിച്ചിരുന്നു. കുടമാറ്റത്തിന് ഉപയോഗിക്കാനുള്ള സ്പെഷല് കുടകളുടെ നിര്മാണം രഹസ്യ കേന്ദ്രങ്ങളില് പുരോഗമിക്കുകയാണ്. തലയെടുപ്പുള്ള ആനകളെ എത്തിക്കാനുള്ള ശ്രമത്തിലാണ് ദേവസ്വങ്ങള്.
തിരുവമ്പാടിക്ക് വേണ്ടി ചെറിയ ചന്ദ്രശേഖരനും പാറമേക്കാവിന് വേണ്ടി പത്മനാഭനുമാണ് തിടമ്പേറ്റുക. തിരുവമ്പാടി ചന്ദ്രശേഖരനില്ലാത്ത പൂരമാണെന്ന പ്രത്യേകതയുണ്ട് ഇത്തവണ. വെടിക്കെട്ടിന് തടസ്സമുണ്ടാവില്ലെന്നാണ് പ്രതീക്ഷ. എങ്കിലും കഴിഞ്ഞ ദിവസം കറുകുറ്റിയിലെ പള്ളിപ്പെരുന്നാളിനിടെയുണ്ടായ അപകടത്തിന്റെ പശ്ചാത്തലത്തില് പൂരപ്രേമികളും ദേവസ്വങ്ങളും ആശങ്കയിലാണ്. കേന്ദ്ര എക്സ്പ്ലോസീവ്സ് വിഭാഗം കഴിഞ്ഞയാഴ്ച പരിശോധന നടത്തിയിരുന്നു. സംതൃപ്തിയറിയിച്ചാണ് സംഘം മടങ്ങിയത്. പൂരം ഒരുക്കങ്ങളിലേക്ക് കോര്പറേഷനും ജില്ല ഭരണകൂടവും പോലീസും കടന്നുകഴിഞ്ഞു. സുരക്ഷ ഒരുക്കം പോലീസ് നേരത്തെ തന്നെ വിലയിരുത്തിയിരുന്നു.
തൃശൂര് പൂരം ഹരിതപെരുമാറ്റച്ചട്ടത്തിനൊപ്പം സ്ത്രീ സൗഹൃദവുമാക്കുന്നതിനാണ് തീരുമാനം. സ്ത്രീകളുടെ സുരക്ഷയ്ക്ക് കൂടുതല് പരിഗണന നല്കുന്നതിനും ഇതിനായി വനിതാ പോലീസിനെ കൂടുതല് നിയോഗിക്കുന്നതിനും അവലോകന യോഗത്തില് തീരുമാനം. തേക്കിന്കാടിനു ചുറ്റുമുള്ള എല്ലാ തെരുവുവിളക്കുകളും നെഹ്റു പാര്ക്കിലെ വെളിച്ച സംവിധാനങ്ങളും തെളിക്കുമെന്ന് ഉറപ്പാക്കാനുള്ള പദ്ധതിയായി.
എല്ലാ റോഡുകളും ടാറിങ് പൂര്ത്തിയാക്കും. പൊട്ടിപൊളിഞ്ഞ കാനകള് സ്ലാബിട്ട് മൂടും. നാലുകേന്ദ്രങ്ങളില് കോര്പറേഷന് രണ്ടുദിവസം സംഭാരവിതരണം നടത്തും. തടസമില്ലാതെ വൈദ്യുതി വിതരണം നടത്തും. 50 പോര്ട്ടബിള് ടോയ്ലറ്റുകള് സ്ഥാപിക്കും. പോലീസ്, ഫയര്ഫോഴ്സ്, ആരോഗ്യവകുപ്പ് തുടങ്ങീ എല്ലാ വിഭാഗം ഉദ്യോഗസ്ഥരുടെയും കൂട്ടായ്മയില് സുരക്ഷിതമായ പൂരം ആഘോഷിക്കാന് സംവിധാനമൊരുക്കും. ഭക്ഷണ സ്ഥാപനങ്ങളിലെ ശുചിത്വസംവിധാനങ്ങളും നിരീക്ഷിക്കും.
3000 പോലീസ് ഉദ്യോഗസ്ഥരുടെ സേവനമുണ്ടാവും. വനിതാ പോലീസിന്റെ സേവനംകൂടുതലായി ഇക്കുറി വിനിയോഗിക്കും. വിദേശികള്ക്ക് പൂരം കാണാനുള്ള വി.ഐ.പി ഗാലറിയില് സ്ത്രീകള്ക്ക് കൂടുതല് സൗകര്യമൊരുക്കും.
https://www.facebook.com/Malayalivartha
