മേയ് ഒന്നു മുതല്‍ അന്ത്യോദയ അന്നയോജനയിലെ 5.95 ലക്ഷം ഉപഭോക്താക്കള്‍ ഒഴികെ എല്ലാ വിഭാഗങ്ങള്‍ക്കും റേഷന്‍ അരിക്ക് കിലോഗ്രാമിന് ഒരു രൂപ കൂടും. ഇപ്പോള്‍ സൗജന്യമായി ഭക്ഷ്യധാന്യം ലഭിക്കുന്ന മുന്‍ഗണനാ കാര്‍ഡുകാരും അന്നുമുതല്‍ കിലോഗ്രാമിന് ഒരു രൂപ നിരക്കില്‍ നല്‍കണം.

ഇപോസ് മെഷീന്‍ എല്ലാ റേഷന്‍ കടകളിലും മേയ് ഒന്നു മുതല്‍ പ്രവര്‍ത്തിക്കുന്നതോടെ റേഷന്‍ വ്യാപാരികള്‍ക്ക് കമ്മിഷന്‍ കൂടുതലുള്ള വേതനം നിലവില്‍ വരും. ഇവരുടെ കുറഞ്ഞ വേതനം 16,000 രൂപയാണ് നിശ്ചയിച്ചിരിക്കുന്നത്. ഇപ്പോള്‍ ക്വിന്റലിന് 1 00 രൂപയാണ് കമ്മിഷന്‍. അത് 220 രൂപയായി കൂടും. ഈ ഇനത്തില്‍ അധികം വേണ്ടിവരുന്ന 120 കോടി രൂപ കണ്ടെത്താനാണ് ഉപഭോക്താക്കളില്‍ നിന്ന് ഒരു രൂപ അധികം ഈടാക്കുന്നത്. ഈ ഇനത്തില്‍ കേന്ദ്രസര്‍ക്കാര്‍ സഹായമായി ക്വിന്റലിന് 43.50 രൂപ സംസ്ഥാന സര്‍ക്കാരിന് ലഭിക്കും.

തിങ്കളാഴ്ചയോടെ എല്ലാ റേഷന്‍ കടകളിലും ഇപോസ് മെഷിന്‍ എത്തിച്ചെന്നാണ് ഭക്ഷ്യവകുപ്പ് അധികൃതര്‍ പറയുന്നത്. എന്നാല്‍ നാലായിരത്തിലേറെ കടകളില്‍ മെഷീന്‍ സ്ഥാപിക്കാനുണ്ട്. ഇപോസ് മെഷിന്‍ തുടങ്ങിയതോടെ 20 ശതമാനം അരി മിച്ചം വരുന്നതായി കണ്ടെത്തിയിരുന്നു. ഈ അരി കിലോയ്ക്ക് 9.90 രൂപ നിരക്കില്‍ പൊതുവിഭാഗത്തിന് (വെള്ള കാര്‍ഡ് ) നല്‍കും.