ഏലത്തിന്റെ ഓണ്ലൈന് ലേലം നടത്തുന്നതിനായി കമ്പനി, ലൈസന്സ് നേടിയ നടപടികളില് സ്പൈസസ് ബോര്ഡിനു അതൃപ്തി, പോലീസ് അന്വേഷിക്കുന്നു
രാജ്യത്ത് ഏലത്തിന്റെ ലേലം നടത്തുന്നതില് ഓണ്ലൈന് ലേല കമ്പനികള്ക്ക് നിര്ണ്ണായക സ്വാധീനമായതോടെ രാജ്യത്തെ ഒരു പ്രമുഖ ലേല കമ്പനിയുടെ നടപടികള് സംശയമുയര്ത്തുന്നതായി സ്പൈസസ് ബോര്ഡ് കേരള പോലീസിന് പരാതി നല്കി. ലേലം നടത്തുന്നതിന് തങ്ങള്ക്കുള്ള ലൈസന്സ് നിലനിര്ത്തുന്നതിനും കോടികള് മൂല്യം വരുന്ന ഓണ്ലൈന് ലേലം നടത്തുന്നതിനുമായി കൃത്രിമ രേഖകള് ചമച്ചുവെന്നാണ് പരാതി.
ലേലം നടത്തിയ സാഹചര്യങ്ങളെ കുറിച്ച് സംശയമുയര്ന്ന സാഹചര്യത്തില് പ്രസ്തുത ലേല കമ്പനികള്ക്കെതിരെ പാലാരിവട്ടം പോലീസ് സ്റ്റേഷനില് പരാതി സമര്പ്പിച്ചതായി സ്പൈസസ് ബോര്ഡ് ചെയര്മാന് പറഞ്ഞു.
കാര്ഡമം ഗ്രോവേഴ്സ് ഫെഡറേഷന് എന്ന പേരില് 2014 മുതല് ലേലം നടത്തി വന്ന കമ്പനി, കാര്ഡമം ഗ്രോവേഴ്സ് ഫൊര്എവര് പ്രൈവറ്റ് ലിമിറ്റഡ് എന്ന പേരില് ഇപ്പോള് പ്രവര്ത്തിക്കുന്നതിന്റെ വിശദ വിവരങ്ങള് ശേഖരിക്കുന്നതിനായി ക്രൈം നമ്പര് 537/18 എന്ന പേരില് ഒരു കേസ് രജിസ്റ്റര് ചെയ്തിട്ടുള്ളതായാണ് പോലീസില് നിന്നും ലഭ്യമായ വിവരങ്ങള് സൂചിപ്പിക്കുന്നത്.
പാര്ട്ട്ണര്ഷിപ്പ് അടിസ്ഥാനത്തില് നടത്തി വന്ന കമ്പനിയുടെ പാറ്റേണ്, പ്രൈവറ്റ് ലിമിറ്റഡ് കമ്പനി എന്ന രീതീയിലേക്ക് മാറ്റിയതായി അവകാശപ്പെട്ടുകൊണ്ട് ചെന്നൈയിലെ രജിസ്ട്രാര് ഓഫ് കമ്പനീസില് നിന്നും ഓണ്ലൈന് ലേലത്തിനുള്ള ലൈസന്സ് പുതുക്കാനായി സര്ട്ടിഫിക്കറ്റ് നേടിയത് വസ്തുതകള് മറച്ചു വച്ചു കൊണ്ടാണെന്നാണ് പോലീസ് മനസ്സിലാക്കുന്നത്.
പ്രസ്തുത കമ്പനിയുടെ അക്കൗണ്ടുകളും പണമിടപാടുകളും പരിശോധിക്കേണ്ടതുണ്ടെന്ന് പോലീസ് വ്യക്തമാക്കി. കഴിഞ്ഞ മൂന്നു വര്ഷങ്ങളില് ലേലം നടത്തി വന്ന സ്ഥാപനം, പാര്ട്ട്ണര് ഷിപ്പ് രീതിയില് നിന്നും പ്രൈവറ്റ് ലിമിറ്റഡ് രീതിയിലേക്ക് മാറ്റിയതിനു പിന്നില് ഗൂഢലക്ഷ്യങ്ങളുള്ളതായി കരുതാവുന്നതാണെന്നാണ് പ്രാഥമിക അന്വേഷണങ്ങളില് കണ്ടതെന്നാണ് പോലീസിന്റെ അഭിപ്രായം. അന്വേഷണം പുരോഗമിക്കുന്നതിന് അനുസരിച്ചേ കൂടുതല് വിവരങ്ങള് ലഭ്യമാകൂ എന്ന് പോലീസ് ഉദ്യോഗസ്ഥര് അറിയിച്ചു.
സ്പൈസസ് ബോര്ഡ് ഓണ്ലൈന് ലേല സമ്പ്രദായം കൊണ്ടു വന്നതും സ്വകാര്യ കമ്പനികള്ക്ക് ലേലം നടത്താനുള്ള ലൈസന്സ് നല്കിയതും സ്മോള് കാര്ഡമം പദ്ധതിയുടെ വിപണി വ്യവസ്ഥ വിപുലമാക്കാന് വേണ്ടിയാണ് . 2014-17 കാലത്തേക്കാണ് കാര്ഡമം ഗ്രോവേഴ്സ് ഫെഡറേഷന് ലൈസന്സ് നല്കിയിരുന്നത്.
എല്ലാ വ്യവസ്ഥകളും പാലിച്ചു കൊണ്ടാണ് അവരുടെ പങ്കാളിത്ത സ്ഥാപനത്തെ പ്രൈവറ്റ് ലിമിറ്റഡ് സ്ഥാപനമാക്കി മാറ്റിയതെന്ന് കാര്ഡമം ഗ്രോവേഴ്സ് ഫെഡറേഷന്റെ വക്താവ് എം.സമ്പത്ത് അറിയിച്ചു. അതിനാവശ്യമായ സകല രേഖകളും സ്പൈസസ് ബോര്ഡിന് തങ്ങള് സമര്പ്പിച്ചതാണെന്നും അവയൊക്കെ പരിശോധിച്ചു ബോധ്യപ്പെട്ടതിനുശേഷമാണ് തങ്ങള്ക്ക് ലൈസന്സ് നല്കിയതെന്നും അദ്ദേഹം കൂട്ടിച്ചേര്ത്തു.
https://www.facebook.com/Malayalivartha
