കണ്ണൂർ കീഴാറ്റൂരിലെ വയൽ കിളികൾ ലോങ്ങ് മാർച്ചിന് തയ്യാറെടുക്കുന്നു. ഇതിന്റെ ഭാഗമായി മെയ് 5ന് സംസ്ഥാനതല കൺവെൻഷൻ കണ്ണൂരിൽ ചേരും. കീഴാറ്റൂരിൽ നിന്ന് തിരുവനന്തപുരത്തേയ്ക്കുള്ള ലോങ്ങ് മാർച്ചിന്റെ തീയതിയും 5 ന് പ്രഖ്യാപിക്കും .

കീഴാറ്റൂരിൽ ബൈപ്പാസ് നിർമ്മാണവുമായി ബന്ധപ്പെട്ട് സർക്കാർ ഏകപക്ഷീയമായ തീരുമാനത്തിൽ നിന്ന് പിൻമാറത്താതിൽ പ്രതിഷേധിച്ചാണ് വയൽക്കിളി പ്രവർത്തകർ ലേംഗ് മാർച്ചിന് തയ്യാറെടുക്കുന്നത്. മഹാരാഷ്ട്രയിൽ കിസാൻ സഭ നടത്തി വിജയിച്ച അതേ മാതൃകയിലാണ് കീഴാറ്റൂരിൽ നിന്ന് തിരുവനന്തപുരത്തേക്ക് ലോംഗ് മാർച്ച് നടത്തുന്നത്.

വികസന കാര്യത്തിൽ സർക്കാർ പിന്നോട്ടിലെന്ന നിലപാടുമായി കഴിഞ്ഞ ദിവസം മുഖ്യമന്ത്രി തന്നെ രംഗത്തെത്തിയതോടെയാണ് വയൽക്കിളികൾ സമരരംഗത്തേക്കിറങ്ങാൻ തീരുമാനിച്ചത്. കീഴാറ്റൂരിന് പുറമേ മലപ്പുറത്തുണ്ടായ സമരങ്ങളിലും സർക്കാർ സമരക്കാർക്കെതിരെ കർശ്ശന നടപടി സ്വീകരിച്ചിരുന്നു. കൂടാതെ കേരളത്തിന്റെ വിവിധ ഭാഗങ്ങളിൽ പരിസ്ഥിതിക്കായി സമരം ചെയ്യുന്ന വിഭാഗങ്ങളെ കൂടി ഉൾപ്പെടുത്തിയാണ് വയൽക്കിളി പ്രവർത്തകരുടെ സമര പ്രഖ്യാപനമുണ്ടാകുക.

സമരത്തെ പിന്തുണച്ചു കൊണ്ട് നേരത്തെ തന്നെ ബി.ജെ.പിയും യു.ഡി.എഫും രംഗത്തെത്തിയിരുന്നു. പരിസ്ഥിതി ദിനാഘോഷം സംസ്ഥാന തലത്തിൽ തന്നെ വലിയ രീതിയിൽ ആഘോഷമാക്കാൻ തീരുമാനിച്ചതിന് തൊട്ടുപിന്നാലെയാണ് വയൽക്കിളി പ്രവർത്തകരുടെ ലോംഗ് മാർച്ച് പ്രഖ്യാപനവും എന്നത് ഏറെ ശ്രദ്ധേയമാണ്