സര്ക്കാര് വകുപ്പുകളില് പുതിയ തസ്തികകള് സൃഷ്ടിക്കുന്നതിന് നിയന്ത്രണം... കടുത്ത സാമ്പത്തിക പ്രതിസന്ധി നേരിടുന്ന സാഹചര്യത്തില് സ്ഥിതി ഭദ്രമാക്കാന് വകുപ്പു മേധാവികള്ക്ക് ധനവകുപ്പിന്റെ കര്ശന നിര്ദ്ദേശം
സര്ക്കാര് വകുപ്പുകളില് പുതിയ തസ്തികകള് സൃഷ്ടിക്കുന്നതിന് നിയന്ത്രണമേര്പ്പെടുത്തി. ലാന്ഡ് ലൈന് ഉപയോഗം കുറയ്ക്കാനും മൊബൈല് ഫോണ് ഉപയോഗം വര്ദ്ധിപ്പിക്കാനും നിര്ദ്ദേശം. കടുത്ത സാമ്പത്തിക പ്രതിസന്ധി നേരിടുന്ന സാഹചര്യത്തില് സ്ഥിതി ഭദ്രമാക്കാന് ധനകാര്യ വകുപ്പ് പുറപ്പെടുവിച്ച ഉത്തരവിലാണ് ഒമ്പതു നിയന്ത്രണങ്ങള്. സര്ക്കാര് സഹായം കൈപ്പറ്റുന്ന സ്ഥാപനങ്ങള്ക്കുള്പ്പെടെ നിയന്ത്രണം ബാധകമായ ഉത്തരവ് ഇക്കഴിഞ്ഞ 17 നാണ് പുറത്തിറക്കിയത്. ഇതാദ്യമായാണ് ധനവകുപ്പ് ഇത്രകര്ശനമായ സാമ്പത്തിക അച്ചടക്ക ഉത്തരവ് വകുപ്പ് മേധാവികള്ക്ക് കൈമാറുന്നത്.
നിര്ദ്ദേശങ്ങള്
വകുപ്പുകള്, പൊതുമേഖലാ സ്ഥാപനങ്ങള്, ബോര്ഡുകള്, കോര്പ്പറേഷനുകള്, ഗ്രാന്റ് ഇന് എയ്ഡ് സ്ഥാപനങ്ങള്, സര്വകലാശാലകള് എന്നിവ പുതിയ വാഹനം വാങ്ങരുത്. പകരം ഇന്ധനം, െ്രെഡവര്, അറ്റകുറ്റപ്പണി എന്നിവ സഹിതം മൂന്നു മുതല് അഞ്ചു വര്ഷത്തേയ്ക്ക് പുതിയ വാഹനങ്ങള് വാടകയ്ക്കെടുക്കണം. ഇത്തരം വാഹനങ്ങളുടെ വില 14 ലക്ഷം രൂപയില് കവിയരുത്.
എല്ലാ സ്ഥാപനങ്ങളും നിലവിലുള്ള വാഹനങ്ങള് സംബന്ധിച്ച് ഇ രജിസ്റ്ററുകള് സൂക്ഷിക്കണം.
പുതിയ ഗ്രാന്റ് ഇന് എയ്ഡ് സ്ഥാപനങ്ങള് അനുവദിക്കരുത്. ആവശ്യമെങ്കില് വിശദമായി പഠിച്ച ശേഷമേ അനുവദിക്കാവൂ.
ആവശ്യമായ വര്ക്ക് സ്റ്റഡിക്ക് ശേഷമേ പുതിയ തസ്തികകള് സൃഷ്ടിക്കാവൂ. വകുപ്പിനുള്ളില് പുനര്വിന്യാസം കൊണ്ട് പരിഹരിക്കാമെങ്കില് ആ വഴി തേടണം.
വകുപ്പു മേധാവികള്, പൊലീസ്, നിയമനിര്വഹണ ഏജന്സികള്, തദ്ദേശ സ്ഥാപന അദ്ധ്യക്ഷന്മാര്, ഗ്രാന്റ് ഇന് എയ്ഡ് സ്ഥാപനങ്ങളുടെ മേധാവികള് എന്നിവര്ക്ക് മാത്രമേ സ്വന്തമായി പുതിയ വാഹനം വാങ്ങാവൂ.
ജീവനക്കാര് വിദേശയാത്രകള് പരമാവധി ഒഴിവാക്കണം. വീഡിയോ കോണ്ഫറന്സിംഗ് സാദ്ധ്യതകള് വിനിയോഗിക്കണം.
അനിവാര്യവും തീര്ത്തും ഒഴിവാക്കാന് പറ്റാത്തതുമായ വിദേശയാത്രകളേ അനുവദിക്കാവൂ. വിദേശയാത്രയ്ക്ക് മുന്കൂര് അനുമതി നിര്ബന്ധം. സര്ക്കാരിന് സാമ്പത്തികബാദ്ധ്യത ഇല്ലാത്ത വിദേശയാത്രകളായാലും ഭരണവകുപ്പുമന്ത്രിയുടെ അംഗീകാരത്തോടെ ധനവകുപ്പിന്റെ അംഗീകാരം വാങ്ങണം. ചീഫ് സെക്രട്ടറി വഴി മുഖ്യമന്ത്രിയുടെ അനുമതിയോടെയേ ഉത്തരവ് പുറപ്പെടുവിക്കൂ.
മൊബൈല് നിരക്ക് വലിയ തോതില് കുറഞ്ഞ സാഹചര്യത്തില് ലാന്ഡ് ലൈന് ഫോണുകളുടെ ഉപയോഗം കുറയ്ക്കണം. മൊബൈല് ഉപയോഗം വര്ദ്ധിപ്പിക്കണം. അര്ഹരായ ഉദ്യോഗസ്ഥര് ഒറിജിനല് ബില് ഹാജരാക്കുന്ന മുറയ്ക്ക് അനുവദനീയമായ തുക നല്കും. പ്രീ പെയ്ഡ് കണക്ഷനുകള്ക്ക് 440 രൂപ അനുവദിക്കും.
വകുപ്പു തലവന്മാര്ക്ക് ഔദ്യോഗിക ഫോണിന് നിലവില് അനുവദിക്കുന്ന 1500 രൂപയെന്ന പരിധി പോസ്റ്റ് പെയ്ഡ്, പ്രീ പെയ്ഡ് കണക്ഷനുകള്ക്ക് 1000 രൂപയാക്കി.
https://www.facebook.com/Malayalivartha
