പൊലീസ് സര്ക്കാരിന്റെ പ്രതിച്ഛായയ്ക്ക്മങ്ങലേല്പ്പിച്ചതിനാല് ചെങ്ങന്നൂര് ഉപതെരഞ്ഞെടുപ്പ് കഴിയും വരെ പെറ്റിക്കേസുകള് മാന്യമായി കൈകാര്യം ചെയ്യണമെന്ന് കര്ശന നിര്ദ്ദേശം
ചെങ്ങന്നൂര് ഉപതെരഞ്ഞെടുപ്പ് കഴിയും വരെ പെറ്റിക്കേസ് അടക്കമുള്ള കാര്യങ്ങളില് പൊലീസ് സംയമനം പാലിക്കണമെന്ന് കര്ശന നിര്ദ്ദേശം. മുഖ്യമന്ത്രിയുടെ ഓഫീസിന്റെ ചുമതലയുള്ള സി.പി.എം സംസ്ഥാന സമിതി അംഗം എം.വി ജയരാജനാണ് ജില്ലാ പൊലീസ് മേധാവികള്ക്ക് നിര്ദ്ദേശം നല്കിയത്. വരാപ്പുഴയിലെ ശ്രീജിത്തിന്റെ കസ്റ്റഡിമരണവും പാലക്കാട്ടും ആലപ്പുഴയിലും വാഹനപരിശോധനയ്ക്കിടെ ബൈക്കപകടത്തില് യുവാക്കള് മരിച്ചതും വിവാദമായതിനെ തുടര്ന്നാണ് തീരുമാനം. ആലപ്പുഴയില് യുവാവ് മരിച്ച സംഭവം കോണ്ഗ്രസും ബി.ജെ.പിയും ചെങ്ങന്നൂരില് പ്രചരണ വിഷയമാക്കിയിരുന്നു.
വരാപ്പുഴ കസ്റ്റഡിമരണത്തെ തുടര്ന്ന് പൊലീസിനും സി.പി.എമ്മിനും എതിരെ രൂക്ഷമായ വിമര്ശനമാണുയരുന്നത്. അത് മയപ്പെടുത്താനാണ് പുതിയ നീക്കം. പരിശോധനയില് മുടക്കം വരുത്തരുതെന്നും നിര്ദ്ദേശം നല്കിയിട്ടുണ്ട്. പെറ്റിക്കേസുകളിലൂടെ മാത്രം മാസം നാല് കോടിയിലധികം രൂപയാണ് ഖജനാവിന് ലഭിക്കുന്നത്. അതിനാല് ജനങ്ങളെ ഉപദ്രിച്ചുള്ള വാഹനപരിശോധനകള് ഒഴിവാക്കണം. പരിശോധനയ്ക്കിടെ നിര്ത്താതെ പോകുന്നവരെ പിന്തുടരരുത് പകരം സി.സി.ടി.വി ദൃശ്യങ്ങള് പരിശോധിച്ച് വാഹനത്തിന്റെ നമ്പര് കണ്ടെത്തണം. സര്ക്കാര് കടുത്ത സാമ്പത്തികപ്രതിസന്ധിയിലായതോടെ പെറ്റിയിനത്തിലും മറ്റുമുള്ള വരുമാനം വര്ദ്ധിപ്പിക്കണമെന്ന് ധനകാര്യവകുപ്പ് നിര്ദ്ദേശിച്ചിട്ടുണ്ട്.
നഗര പരിധികളിലെ സ്റ്റേഷനുകളില് മിനിമം 50തും ഗ്രാമങ്ങളില് 20 മുതല് 25 വരെയും പെറ്റിക്കേസുകള് രജിസ്റ്റര് ചെയ്താലേ ടാര്ജറ്റിലെത്താനാകൂ. അതിനാല് മദ്യപിച്ചും ഹെല്മറ്റും സീറ്റ് ബെല്റ്റും ധരിക്കാതെയും വാഹനം ഓടിക്കുന്നവരെ പിടികൂടണം. എന്നാല് ഇതിന്റെ പേരില് വാഹനത്തില് നിന്ന് ഇറക്കി ഊതിക്കുകയും മറ്റും ചെയ്യരുത്. പൊതുജനങ്ങളോട് മാന്യമായി പെരുമാറണം. ജാതി, മത സംഘടനകളെയോ, നേതാക്കളെയോ പ്രകോപിപ്പിക്കുന്ന തരത്തിലുള്ള സമീപനങ്ങള് പാടില്ല. നിര്ദ്ദേശങ്ങള് പാലിക്കാത്ത ഉദ്യോഗസ്ഥര്ക്കെതിരെ കര്ശനനടപടിയുണ്ടാകുമെന്നും മുന്നറിയിപ്പ് നല്കിയിട്ടുണ്ട്.
https://www.facebook.com/Malayalivartha
