കരമനയാറ്റിലിറങ്ങിയ നാലു വിദ്യാര്‍ത്ഥിനികളില്‍ ഒരാള്‍ മുങ്ങിമരിച്ചു. കാര്‍മ്മല്‍ ഗേള്‍സ് ഹയര്‍സെക്കന്‍ഡറി സ്കൂളിലെ അഞ്ജലി ലക്ഷ്മി (14 ) എന്ന വിദ്യാര്ത്ഥിനിയാണ് കാൽ വഴുതി ആറിലേക്ക് വീണത്. സെന്‍ട്രല്‍ സ്റ്റേഡിയത്തില്‍ ബാസ്‌കറ്റ് ബോള്‍ പരിശീലനം കഴിഞ്ഞ് കാര്‍മല്‍ സ്‌കൂളിലെ സഹപാഠികള്‍ തമലത്തെ സുലീനയുടെ വീട്ടിലേക്ക് എത്തുകയായിരുന്നു അഞ്ജലിയും ആര്യയും. അവിടെ നിന്നും ആറ് കാണാൻ പോയതിനിടയിലാണ് അപകടം . അഞ്ജലിക്കൊപ്പം ഒഴുക്കില്‍പെട്ട സുലീന, ആര്യ എന്നിവരെ നാട്ടുകാര്‍ രക്ഷപ്പെടുത്തുകയായിരുന്നു.

കാര്‍മല്‍ സ്‌കൂളിലെ ഒന്‍പതാം ക്ലാസ് വിദ്യാര്‍ത്ഥികളാണ് മൂന്ന് പേരും. ബാസ്‌കറ്റ് ബോള്‍ ടീം അംഗങ്ങളായ ഇവര്‍ക്കു രാവിലെയും വൈകിട്ടുമാണു പരിശീലനം. കടവ് സന്ദര്‍ശിച്ച ശേഷം വീണ്ടും പരിശീലനത്തിനായി പോകാനിരിക്കെയായിരുന്നു അപകടം. എന്നാല്‍ അപ്രതീക്ഷിതമായി ഉണ്ടായ ദുരന്തം അടുത്ത സുഹൃത്തുക്കളായ പെണ്‍കുട്ടികളെ മാനസികമായി തകര്‍ത്തിരിക്കുകയാണ്. കണ്‍മുന്നില്‍ കണ്ട ദുരന്തത്തിന്റെ ആഘാതത്തില്‍ നിന്നും ഇനിയും അവര്‍ മുക്തമായിട്ടുമില്ല. വെള്ളത്തിൽ അകപ്പെട്ട കുട്ടികളുടെ തലമുടിൽ പിടിച്ചാണ് രക്ഷപെടുത്തിയത്. പക്ഷേ, നീന്തല്‍ അറിയാവുന്ന അഞ്ജലിയെ മാത്രം കണ്ടെത്താന്‍ കഴിഞ്ഞിരുന്നില്ല.

ഒരു ദിവസം ഒരാളുടെ വീട് എന്ന നിലയിലാണ് അവധിക്കാലത്ത് സുഹൃത്തുക്കളായ മൂന്ന് പെണ്‍കുട്ടികളും ഒത്ത് ചേര്‍ന്നിരുന്നതായിരുന്നു ഇവരുടെ പതിവ്. അതനുസരിച്ച് സുലീനയുടെ തമലത്തെ വീട്ടിലേക്ക് ഇന്നലെ എത്തുകയായിരുന്നു.

വെറുതെ ഒന്ന് ഇറങ്ങിയതാണ്. പടിക്കെട്ടില്‍ നിന്ന് ഒരു ചുവടു വച്ചപ്പോള്‍ തന്നെ മുന്നോട്ടു വലിഞ്ഞു തെന്നുന്നത് പോലെ തോന്നി. തെന്നി വീഴാതിരിക്കാന്‍ ഓരോ ചുവടുകൂടി കടന്നു. പെട്ടന്നാണു കയത്തിലേക്കു താഴ്ന്നത്. ആരോ കാലില്‍ വലിച്ചു താഴേക്കിടുന്നതു പോലെ തോന്നി എന്ന് ആര്യ പറയുന്നു.

അനധികൃതമായ മണലൂറ്റ് സ്ഥിരമായി നടക്കുന്ന സ്ഥലമാണ് ഇവിടം. വശീകരിച്ച്‌ ചതിക്കുന്ന കടവ് എന്നാണ് നാട്ടുകാര്‍ പറയുന്നത്.ഇതിപ്പോ ഇവിടെ മരണം സ്ഥിരമാണെന്നും നാട്ടുകാര്‍ പറയുന്നു. മണലൂറ്റിനെ തുടര്‍ന്നു രൂപപ്പെട്ട അഗാധ ഗര്‍ത്തങ്ങളാണു കടവിനു ചുറ്റും. പടിക്കെട്ട് കടന്ന് ആദ്യ ചുവടുവച്ചാല്‍ തന്നെ നാലു മീറ്ററോളം താഴേക്കാണു വീഴുക. കുട്ടികള്‍ കടവിലേക്കു പോകവെ അവിടെ ഇറങ്ങരുതെന്നു സ്ഥലവാസി മുന്നറിയിപ്പും നല്‍കിയിരുന്നു. എന്നാല്‍, ഇവര്‍ അതു കാര്യമായി എടുത്തില്ല.

സന്തോഷ് അനിത ദമ്പതികളുടെ മകളാണ് അഞ്ജലി.