തുടര്‍ച്ചയായി മൂന്നുവര്‍ഷം കേരള ലോട്ടറിയുടെ ഒന്നാം സമ്മാനം ഒരു വീട്ടിലെത്തിയതിന്റെ സന്തോഷത്തിലാണ് ആലപ്പുഴ തകഴിയിലെ മനോഹരനും കുടുംബവും. അതേസമയം മനോഹരനെ തേടിയെത്തുന്ന ഭാഗ്യ കാഴ്ചകണ്ട് അമ്പരന്ന് നില്‍ക്കുകയാണ് നാട്ടുകാര്‍. ഇത്തവണ ഒന്നാം സമ്മാനമായ ഏഴുപത് ലക്ഷത്തിനൊപ്പം പത്ത് സമാശ്വാസ സമ്മാനങ്ങളും കൂടെ വീട്ടിലേക്കെത്തുന്നു. എന്നാല്‍ ഭാഗ്യവാന്റെ തലക്കനമൊന്നുമില്ലാതെ എല്ലാം ഒരു സന്തോഷച്ചിരിയില്‍ ഒതുക്കുകയാണ് തകഴി പടഹാരം ലക്ഷ്മി ഗോകുലത്തില്‍ മനോഹരനും ഭാര്യ വനജയും.

ഇന്നലെ നടന്ന നിര്‍മല്‍ ഭാഗ്യക്കുറിയുടെ അറുപത്തിയഞ്ചാം നറുക്കെടുപ്പിലൂടെയാണ് ഒന്നാം സമ്മാനമായ 70 ലക്ഷം രൂപയ്ക്കു മനോഹരന്‍ അര്‍ഹനായത്. കഴിഞ്ഞ രണ്ടു വര്‍ഷവും ഓരോ തവണ കേരള ലോട്ടറിയുടെ ഒന്നാം സമ്മാനം നേടിയ മനോഹരന് ഇതു ഹാട്രിക് നേട്ടമായി.

2016 ഓഗസ്റ്റ് 28നു നറുക്കെടുത്ത പൗര്‍ണമി ടിക്കറ്റിലൂടെ ഒന്നാം സമ്മാനം 65 ലക്ഷം രൂപ ലഭിച്ചു. 2017 നവംബര്‍ 10ന് നിര്‍മല്‍ ഭാഗ്യക്കുറിയിലൂടെ 70 ലക്ഷം രൂപയും കിട്ടി.

ഒന്നാം സമ്മാനം നേടിയ എല്ലാ ടിക്കറ്റുകളുടെയും വിവരങ്ങള്‍ കൈയിലുള്ള ബുക്കില്‍ മനോഹരന്‍ ഭദ്രമായി കുറിച്ചുവച്ചിട്ടുമുണ്ട്. ആലപ്പുഴയില്‍ പോയി മടങ്ങുംവഴി ഇന്നലെ വൈകിട്ട് അമ്ബലപ്പുഴ പടിഞ്ഞാറെനടയില്‍ സ്ഥിരമായി ലോട്ടറിയെടുക്കുന്ന ശ്രീവത്സം ഏജന്‍സിയില്‍ എത്തിയപ്പോഴാണ് ഒന്നാം സമ്മാനം തന്റെ പക്കലുള്ള എന്‍ആര്‍ 212329 നമ്ബര്‍ ടിക്കറ്റിനാണെന്ന് അദ്ദേഹം അറിഞ്ഞത്. ഇതേ സീരീസില്‍ മനോഹരന്‍ വാങ്ങിയ 10 ടിക്കറ്റുകള്‍ക്കും സമാശ്വാസ സമ്മാനമായ 10,000 രൂപ വീതം വേറെയും കിട്ടും. ഇതേ സീരീസില്‍ 12 ടിക്കറ്റ് വാങ്ങുകയായിരുന്നു മനോഹരന്റെ ലക്ഷ്യം. പക്ഷേ, അതിലൊന്ന് മറ്റാരോ വാങ്ങി. ഫെഡറല്‍ ബാങ്ക് തകഴി ശാഖയില്‍ ഇന്നു ടിക്കറ്റ് നല്‍കും.

കെഎസ്ഇബി അമ്പലപ്പുഴ സെക്ഷന്‍ ഓഫിസില്‍ നിന്ന് ഓവര്‍സിയറായി 2009ല്‍ വിരമിച്ച ശേഷമാണു മനോഹരന്‍ ഭാഗ്യമന്വേഷിക്കാന്‍ തുടങ്ങിയത്. ആദ്യം കിട്ടിയ രണ്ട് ഒന്നാം സമ്മാനങ്ങളിലുമായി ഒരു കോടിയിലധികം രൂപ കൈയില്‍ കിട്ടിയപ്പോള്‍ എന്തു ചെയ്‌തെന്ന ചോദ്യത്തിന് മറുപടി ഇങ്ങനെ: ആദ്യമടിച്ച ലോട്ടറിയിലെ കുറച്ചു തുക വീടു പുതുക്കിപ്പണിയാന്‍ ഉപയോഗിച്ചു. രണ്ടാമത്തെ സമ്മാനത്തില്‍ നിന്നൊരു വിഹിതം ബാങ്കിലിട്ടു. ഇപ്പോള്‍ കിട്ടുന്ന തുക എന്തു ചെയ്യണമെന്നു തീരുമാനിച്ചിട്ടില്ല. മനോഹരന്‍ പറയുന്നു. ഇലക്ട്രിക്കല്‍ കരാറുകാരനായ സജിത്തും ആലപ്പുഴ എസ്ഡി കോളജിലെ ഗെസ്റ്റ് ലക്ചററായ ലക്ഷ്മിയുമാണു മക്കള്‍. മരുമകന്‍ സുജിത്ത്.