സാമൂഹ്യ വിരുദ്ധരുടെ അഴിഞ്ഞാട്ടം; ഇടുക്കി കട്ടപ്പനയിൽ കക്കൂസ് മാലിന്യം നടുറോട്ടിൽ...മൂക്കു പൊത്തി ജനങ്ങൾ
ഇടുക്കി കട്ടപ്പനയിൽ തൊടുപുഴ- പുളിയന്മല സംസ്ഥാന പാതയില് മുളകരമേട്ടിന് സമീപം സാമൂഹിക വിരുദ്ധർ കക്കൂസ് മാലിന്യം തള്ളിയത് പ്രദേശവാസികള്ക്കും വാഹനയാത്രികര്ക്കും ബുദ്ധിമുട്ട് സൃഷ്ടിക്കുന്നു. പാതയോരത്തെ ഓടയിലേയ്ക്കാണ് മാലിന്യം തള്ളിയിരിക്കുന്നത്. ഇന്നലെ പുലര്ച്ചെയാണ് മാലിന്യം തള്ളിയതെന്നാണ് കരുതുന്നത്.
രാവിലെ മുതല് മേഖലയില് ദുര്ഗന്ധം അനുഭവപ്പെട്ടതോടെയാണ് കക്കൂസ് മാലിന്യം നിക്ഷേപിച്ചതായി കണ്ടത്. 500 മീറ്ററോളം ദൂരത്തിലാണ് മാലിന്യം തള്ളിയത്. ദുര്ഗന്ധംമൂലം റോഡിലൂടെ വാഹനങ്ങളില്പോലും സഞ്ചരിക്കാന് കഴിയാത്ത സാഹചര്യമായതോടെ നാട്ടുകാര് നഗരസഭയിലും അഗ്നിശമന സേനയിലും വിവരം അറിയിച്ചു.
അഗ്നിശമന സേന സ്ഥലത്തെത്തിയെങ്കിലും വെള്ളം ഉപയോഗിച്ച് വൃത്തിയാക്കിയാല് സമീപത്തെ പുരയിടങ്ങളിലേയ്ക്ക് മാലിന്യം ഒഴുകാന് സാധ്യതയുള്ളതിനാല് ശ്രമം ഉപേക്ഷിക്കുകയായിരുന്നു.
പിന്നീട് റോഷി അഗസ്റ്റിന് എം.എല്.എയുടെ വാഹനം ഇതുവഴി കടന്നുപോയപ്പോള് എം.എല്.എ ഇടപെട്ട് നഗരസഭ അധികൃതരെകൊണ്ട് മാലിന്യത്തിനു മുകളില് ബ്ലീച്ചിങ് പൗഡര് വിതറിയാണ് താല്ക്കാലിക പരിഹാരം കണ്ടത്.
https://www.facebook.com/Malayalivartha
