കേരളത്തില്‍ രാഷ്ട്രീയ പാർട്ടികൾ മാഫിയ സംഘങ്ങള്‍ ആയാണ് പ്രവര്‍ത്തിക്കുന്നതെന്ന് നടൻ ശ്രീനിവാസന്‍. പണപ്പിരിവ്, ഹര്‍ത്താല്‍, അക്രമം, കൊലപാതകം തുടങ്ങി പണ്ട് ചമ്പല്‍കൊള്ളക്കാര്‍ ചെയ്തുകൊണ്ടിരുന്ന കാര്യങ്ങളാണ് ഇപ്പോള്‍ രാഷ്ര്ടീയപാര്‍ട്ടികള്‍ ചെയ്യുന്നതെന്നും ശ്രീനിവാസൻ. ഒരു അഭിമുഖത്തിലായിരുന്നു ശ്രീനിവാസൻ ഇങ്ങനെ പ്രതികരിച്ചത്.

കേരളത്തിലെ വോട്ടര്‍മാര്‍ പ്രബുദ്ധരാണെന്നു പറയുമെങ്കിലും ഇത്രയും മണ്ടന്മാരായ വോട്ടര്‍മാര്‍ ലോകത്തു വേറെ കാണില്ല. ആദ്യ തിരഞ്ഞെടുപ്പു മുതല്‍ അത് പ്രകടമാണ്. ഇവിടെ ഇടത്, വലത് മുന്നണികള്‍ പത്തുവര്‍ഷത്തെ കാര്യങ്ങളാണ് പ്ലാന്‍ ചെയ്യുന്നത്. അഞ്ചുവര്‍ഷം ഭരണം. അപ്പോള്‍ ആവശ്യമുള്ളത് കട്ടെടുത്ത് സമ്പാദിച്ചു വയ്ക്കും. പിന്നെ വിശ്രമ ജീവിതം, അല്ലറ ചില്ലറസമരങ്ങള്‍, ജനകീയ യാത്രകള്‍. ഒന്നും ചെയ്തില്ലെങ്കിലും അധികാരത്തില്‍ വരുമെന്ന് അവര്‍ക്കറിയാം, അങ്ങനെ രണ്ടു മുന്നണികളും ജനങ്ങളെ കബളിപ്പിച്ചുകൊണ്ടിരിക്കുകയാണെന്നും ശ്രീനിവാസന്‍ പറഞ്ഞു

സമൂഹത്തെ തിരുത്താന്‍ ബുദ്ധിമുട്ടാണ് ഗാന്ധിജി പറഞ്ഞിട്ടു കേള്‍ക്കാത്ത നമ്മളാണോ സിനിമ കണ്ടാലുടന്‍ നന്നാകാന്‍ പോകുന്നത് എന്നു ശ്രീനിവാസന്‍ ചോദിച്ചു. ഗാന്ധിജി പറഞ്ഞിട്ട് കേള്‍ക്കാത്തവരാണ് നമ്മള്‍. അങ്ങനെയുള്ള ജനങ്ങള്‍ ഒരു സിനിമ കണ്ടാലുടന്‍ നല്ലവരാകും എന്നൊന്നും നമുക്ക് പറയാന്‍ പറ്റില്ല. പിന്നെ ചിലരുടെ ചില തീരുമാനങ്ങളെ സ്വാധീനിക്കാം അത്രമാത്രം. ഇപ്പോള്‍ 'ഹൗ ഓള്‍ഡ് ആര്‍ യൂ' എന്ന സിനിമ സ്ത്രീകള്‍ക്ക് ഒരു പ്രചോദനമായിരുന്നു പല കാര്യങ്ങളിലും' എന്ന് ശ്രീനിവാസന്‍ പറഞ്ഞു.

ഫേസ്ബുക്ക് തീവണ്ടിയുടെ ശുചിമുറി പോലെയാണെന്ന് ശ്രീനിവാസൻ പറഞ്ഞിരുന്നു. ഫേസ്ബുക്കില്‍ ആര്‍ക്കും എന്തും എഴുതാം കൂടാതെ എങ്ങനെ വേണമെങ്കിലും പ്രതികരിക്കാം. പലപ്പോഴും പലരും സ്വന്തം ഐഡി മറച്ചു വെച്ചിട്ടാണ് പ്രതികരിക്കുന്നതും. സ്വന്തം വ്യക്തിത്വം പോലും മറച്ചുവെച്ചു പ്രതികരിക്കുന്നവര്‍ സമൂഹത്തില്‍ എന്ത് മാറ്റം കൊണ്ടു വരാനാണെന്നും അദ്ദേഹം ചോദിച്ചിരുന്നു.