ശാന്തി കവാടത്തില്‍ വൈകുന്നേരം 4 മണിക്കായിരുന്നു ചടങ്ങുകള്‍ തുടങ്ങിയത്. ഇവരുടെ ബന്ധുക്കളും സന്നിഹിതരായിരുന്നു. സര്‍ക്കാരിന്റെ പ്രതിനിധിയായി മന്ത്രി കടകംപള്ളി സുരേന്ദ്രന്‍ അന്തിമോപചാരം അര്‍പ്പിച്ചു. വിദേശ വനിതയുടെ ബന്ധുക്കളുടെ ആഗ്രഹപ്രകാരമാണ് സംസ്‌കരിച്ചത്. 

അതേസമയം ദുരൂഹമായ നിലപാടാണിതെന്ന് ബി.ജെ.പി ജില്ലാ സെഹ കട്ടറി അഡ്വ. എസ്. സുരേഷ് പറഞ്ഞു. വിദേശ ഏജന്‍സി അന്വേഷിക്കാനെത്തിയാല്‍ തെളിവില്ലാതാകുമെന്നും മനുഷ്യാവകാശ കമ്മീഷന്റെ ഉത്തരവിനെയാണ് ഡി.ജി.പി. അട്ടിമറിച്ചത്. പോലീസിനും സര്‍ക്കാരിനും എന്തൊക്കെയോ മറച്ചു വയ്ക്കാനുണ്ടെന്നും സുരേഷ് പറഞ്ഞു.

കേസില്‍ ദുരൂഹത നിലനില്‍ക്കുന്നുണ്ട് എന്ന നിലപാടാണ് കമ്മീഷന്‍ ഇടപെടാന്‍കാരണം. ദഹിപ്പിക്കുന്നതിന് പകരം മൃതദേഹം മറവ് ചെയ്താല്‍ മതിയെന്നാണ് കമ്മീഷന്‍ ഉത്തരവില്‍ വ്യക്തമാക്കിയത്. എന്നാല്‍ ഇത് സംബന്ധിച്ച ഉത്തരവിന്റെ പകര്‍പ്പ് കൈമാറിയിട്ടില്ലാത്തതിനാലും ബന്ധുക്കളുടെ ആഗ്രഹപ്രകാരവുമാണ് മൃതദേഹം ദഹിപ്പിച്ചത്. ബിജെപി നല്‍കിയ പരാതിയുടെ അടിസ്ഥാനത്തിലാണ് കമ്മീഷന്റെ മറവ് ചെയ്താല്‍ മതിയെന്ന ഉത്തരവിറക്കിയത്. രണ്ടാഴ്ച്ചയ്ക്കകം റിപ്പോര്‍ട്ട് സമര്‍പ്പിക്കണമെന്നും കമ്മീഷന്‍ നിര്‍ദേശം നല്‍കി. എന്നാല്‍ വൈകുന്നേരം 4:45 ഓടെ ഇവരുടെ മൃതദേഹം ശാന്തികവാടത്തില്‍ തന്നെ സംസ്‌കരിക്കുകയായിരുന്നു.

അതേസമയം കേസില്‍ കോവളം വാഴമുട്ടം പനത്തുറ സ്വദേശികളായ ഉമേഷ്, ഉദയന്‍ എന്നിവരെ പൊലീസ് അറസ്റ്റ് ചെയ്തിരുന്നു.

കൊലപാതകവും ബലാത്സംഗം അടക്കമുള്ള കുറ്റങ്ങള്‍ ചുമത്തിയാണ് അറസ്റ്റ്. വിദേശ വനിത പീഡനത്തിന് ഇരയായതായി സ്ഥിരീകരിക്കുന്ന രാസപരിശോധനാഫലം പുറത്തുവന്നു. മുടിയിഴകളും വിരലടയാളവും പ്രതികളുടേതെന്നു സ്ഥിരീകരിച്ചിട്ടുണ്ട്. ബോട്ടിങ്ങ് നടത്താനെന്ന പേരിലാണു വിദേശ വനിതയെ ഇവിടേക്കെത്തിച്ചതെന്നു പ്രതികളിലൊരാള്‍ സമ്മതിച്ചതായി പൊലീസ് അറിയിച്ചിരുന്നു. കണ്ടല്‍ക്കാട്ടിലെത്തിയ ശേഷം വിദേശ വനിതയെ ക്രൂരമായി ബലാത്സംഗം ചെയ്യുകയായിരുന്നു. ഇതിനിടെയാണ് ഇവര്‍ മരിച്ചതെന്നും പൊലീസ് വെളിപ്പെടുത്തി. വിദേശ വനിതയെ മാര്‍ച്ച് 14നാണ് പ്രതികള്‍ ചേര്‍ന്നു കൊലപ്പെടുത്തിയത്. ഇരയുടെ ആന്തരികാവയവങ്ങളുടെ രാസപരിശോധനഫലം ഇന്ന് രാവിലെ പോലീസിനു ലഭിച്ചിരുന്നു.

ഉദയന്‍ ഗൈഡാണെന്നും ഇയാളാണ് വിദേശ വനിതയെ വാഴമുട്ടത്തു കൊണ്ടുവന്നതെന്നും പോലീസ് പറഞ്ഞു. ഉമേഷാണ് കേസിലെ ഒന്നാം പ്രതി. ഇയാള്‍ മറ്റ് സ്ത്രീകളെയും കുട്ടികളെയും പീഡിപ്പിച്ചിരുന്നുവെന്നും പോലീസ് അറിയിച്ചു. ഉമേഷും ഉദയും ബന്ധുക്കളാണ്. ഇരുവരുടെയും പങ്ക് വ്യക്തമാക്കുന്ന തെളിവുകള്‍ പോലീസിനു നേരത്തെ ലഭിച്ചിരുന്നു.