പുരസ്‌കാരമോ വലുത് അത് നല്‍കുന്ന ആളാണോ വലുത് എന്ന് ചിന്തിക്കാന്‍ കഴിയാതെ വന്നതോടെ അവാര്‍ഡ് വാങ്ങാന്‍ വണ്ടി പിടിച്ച് പോയ ജാഡ താരങ്ങള്‍ ഒന്നും കിട്ടാതെ മടങ്ങി. എന്നാല്‍ ഇത്രയും വലിയ ഗാന ഗന്ധര്‍വനായ യോശുദാസ് തലക്കനമില്ലാതെ ആര് അവാര്‍ഡ് നല്‍കിയാലും വാങ്ങുമെന്ന് പ്രഖ്യാപിച്ച് അവാര്‍ഡ് വാങ്ങാന്‍ പോയി. ഒപ്പം ജയരാജും മറ്റ് ചില മലയാള കലാകാരന്‍മാരും പോയി. അങ്ങനെ മലയാള താരങ്ങള്‍ക്ക് ജീവിതത്തിലെ വലിയ അവാര്‍ഡ് സ്വീകരിക്കാനായില്ല. ഒപ്പം കേന്ദ്രമന്ത്രിയുടെ വിരുന്ന് സത്ക്കാരത്തിനും പോയില്ല.

ദേശീയ അവാര്‍ഡ് വിതരണചടങ്ങില്‍ 70 പേര്‍ പങ്കെടുത്തില്ലെന്നാണ് അവരുടെ വ്യാഖ്യാനം. കേരള മോഡല്‍ സമരം ചെയ്ത് രാഷ്ട്രപതിയെക്കൊണ്ട് അവാര്‍ഡ് നല്‍കിക്കാനായിരുന്നു താരങ്ങളുടെ ശ്രമം. ഇതിന്റെ ഭാഗമായി കേന്ദ്രമന്ത്രി സ്മൃതി ഇറാനിയും ദേശീയ അവാര്‍ഡ് ജൂറി അധ്യക്ഷന്‍ ശേഖര്‍ കപൂറും ചര്‍ച്ച നടത്തി. എന്നിട്ടും വിട്ടു വീഴ്ച ചെയ്യാത്ത താരങ്ങളുടെ സീറ്റ് എടുത്തു മാറ്റി ബാക്കിയുള്ളവര്‍ക്ക് അവാര്‍ഡ് നല്‍കി മധുര പ്രതികാരം വീട്ടി. ഇനി അവരവര്‍ക്കുള്ള അവാര്‍ഡും ഫലകവും രൂപയും കിട്ടണമെങ്കില്‍ കേന്ദ്ര സര്‍ക്കാരിന്റെ പടിവാതില്‍ കയറിയിറങ്ങണം. അതിന് നാണമില്ല.

വളരെ ജാടാപരമായ തീരുമാനമിതന്നാണ് സാധാരണ മലയാളികള്‍ വിശ്വസിക്കുന്നത്. സംസ്ഥാന അവാര്‍ഡ് നല്‍കുന്നത് മുഖ്യമന്ത്രിയും മന്ത്രിമാരുമാണ്. പക്ഷെ ദേശീയ അവാര്‍ഡുകള്‍ എല്ലാം രാഷ്ട്രപതി തന്നെ നല്‍കണമെന്ന് എന്തിന് ഇവര്‍ ബലം പിടിച്ചു. കേന്ദ്ര മന്ത്രിയായ സ്മൃതി ഇറാനി ഒരു സീനിയര്‍ നടി കൂടിയാണ്. എന്നിട്ടും അതിലും രാഷ്ട്രീയം കണ്ട് മാത്രമാണ് അവര്‍ പിന്തിരിഞ്ഞത്. അവാര്‍ഡ് ബഹിഷ്‌കരിച്ച അവര്‍ക്ക് ആ ദേശീയ അവാര്‍ഡ് നല്‍കാതിരിക്കുകയാണ് വേണ്ടത്.

11 പേര്‍ക്കൊഴികെ രാഷ്ട്രപതി നേരിട്ടു പുരസ്‌കാരം നല്‍കില്ലെന്ന തീരുമാനമാണ് വിവാദമായത്. ഭരണഘടനാപരമായ പരിപാടി അല്ലാത്തതിനാല്‍ രാഷ്ട്രപതി ഏറെ നേരം പങ്കെടുക്കില്ലെന്നും ഇതും സംബന്ധിച്ച പുതുക്കിയ പ്രോട്ടോക്കോള്‍ അടുത്തിടെയാണ് പുറത്തിറക്കിയതെന്നുമാണ് സര്‍ക്കാര്‍ അറിയിച്ചത്.

വിനോദ് ഖന്നയ്ക്ക് മരണാനന്തര ബഹുമതിയായി ദാദാ സാഹിബ് ഫാല്‍കെ പുരസ്‌കാരം, മികച്ച നടി ശ്രീദേവിക്കുള്ള മരണാനന്തര പുരസ്‌കാരം, മികച്ച നടന്‍ റിദ്ദി സെന്‍, മികച്ച ഗായകന്‍ യേശുദാസ്, മികച്ച സംവിധായകന്‍ ജയരാജ്, മികച്ച സംഗീതസംവിധായകന്‍ എ.ആര്‍. റഹ്മാന്‍ തുടങ്ങി 11 പുരസ്‌കാരങ്ങളാണ് രാഷ്ട്രപതി വിതരണം ചെയ്യുന്നത്.

രാഷ്ട്രപതി നേരിട്ട് നല്‍കിയില്ലെങ്കില്‍ വിട്ടുനില്‍ക്കുമെന്ന് കാട്ടി അവാര്‍ഡ് ജേതാക്കള്‍ രാഷ്ട്രപതിയുടെ ഓഫീസിനും സര്‍ക്കാരിനും കത്ത് നല്‍കി. രാഷ്ട്രപതി രാം നാഥ് കോവിന്ദ് പുരസ്‌കാരം നല്‍കുമെന്നാണ് അറിയിപ്പുകളിലും ക്ഷണപത്രങ്ങളിലുമുള്ളത്. ജേതാക്കള്‍ക്ക് കേന്ദ്ര വാര്‍ത്താ വിതരണമന്ത്രാലയം അയച്ച ക്ഷണക്കത്തുകളിലും രാഷ്ട്രപതി സമ്മാനം നല്‍കുമെന്നാണ് അറിയിച്ചിരിക്കുന്നത്. ഇതുവരെയുള്ള പതിവും അതാണ്.

എന്നാല്‍, ബുധനാഴ്ച വിജ്ഞാന്‍ ഭവനില്‍ നടന്ന പുരസ്‌കാരച്ചടങ്ങിന്റെ റിഹേഴ്‌സലിനിടയിലാണ് ഈ തീരുമാനം മാറ്റിയതായി കേന്ദ്ര വാര്‍ത്താവിതരണ മന്ത്രാലയം ഉദ്യോഗസ്ഥര്‍ അവാര്‍ഡ് ജേതാക്കളെ അറിയിച്ചത്. 11 പുരസ്‌കാരങ്ങള്‍ മാത്രം രാഷ്ട്രപതി നല്‍കുകയും ബാക്കി മന്ത്രി സ്മൃതി ഇറാനി നല്‍കുമെന്നും ഉദ്യോഗസ്ഥര്‍ പറഞ്ഞു. മറ്റുള്ളവര്‍ക്കൊപ്പം രാഷ്ട്രപതി ഗ്രൂപ്പ് ഫോട്ടോ എടുക്കുമെന്നും അറിയിച്ചു. രണ്ട് ഘട്ടങ്ങളിലായി പുരസ്‌കാരം വിതരണം ചെയ്യുമെന്ന് ചൂണ്ടിക്കാണിച്ചുള്ള അച്ചടിച്ച നടപടിക്രമങ്ങളും റിഹേഴ്‌സലില്‍ നല്‍കി.

എന്നാല്‍, തീരുമാനത്തെ ചലച്ചിത്ര പ്രവര്‍ത്തകര്‍ ഉടന്‍ ചോദ്യംചെയ്തു. കേരളത്തില്‍നിന്നുള്ള ചലച്ചിത്ര പ്രവര്‍ത്തകരുടെ നേതൃത്വത്തിലാണ് പ്രതിഷേധമുയര്‍ത്തിയത്. തങ്ങളെ അറിയിച്ചത് രാഷ്ട്രപതി പുരസ്‌കാരം നല്‍കുമെന്നാണെന്നും തീരുമാനം മാറ്റിയതെന്തുകൊണ്ടാണെന്ന് വ്യക്തമാക്കണമെന്നും അവര്‍ ആവശ്യപ്പെട്ടു.