മഴക്കാലത്ത് റോഡ് ഒരു കാരണവശാലും പൊളിക്കാനോ മുറിക്കാനോ പാടില്ലെന്ന് മന്ത്രി ജി സുധാകരന്
സംസ്ഥാനത്തെ പൊതുമരാമത്ത് റോഡുകളും ദേശീയപാതയും മഴക്കാലത്ത് ഒരു കാരണവശാലും പൊളിക്കാനോ മുറിക്കാനോ പാടില്ലെന്ന് മന്ത്രി ജി.സുധാകരന് വ്യക്തമാക്കി. എറണാകുളം കാക്കനാട് കളക്ടറേറ്റ് ഹാളില് ചേര്ന്ന എന്ജിനീയര്മാരുടെ യോഗത്തില് സംസാരിക്കുകയായിരുന്നു അദ്ദേഹം. പിണറായി സര്ക്കാര് വന്നശേഷം കഴിഞ്ഞ രണ്ട് വര്ഷങ്ങളിലും മഴക്കാലത്ത് റോഡുകള് വെട്ടിമുറിക്കാതെ സംരക്ഷിച്ചിരുന്നു.
എല്ലാ സര്ക്കാര് വകുപ്പുകള്ക്കും കേബിള് കമ്പനികളടക്കമുള്ള സ്വകാര്യ ഏജന്സികള്ക്കും ഇത് ബാധകമാണ്. നിര്ദ്ദേശം ലംഘിക്കുന്നവര്ക്കെതിരെ ഹൈവേ സംരക്ഷണ നിയമപ്രകാരവും, പൊതുമരാമത്ത് മാന്വല് പ്രകാരവും നടപടികള് സ്വീകരിക്കാന് ജില്ലയിലെ എന്ജിനീയര്മാരെ ചുമതലപ്പെടുത്തി. റോഡുകളുടെ രണ്ട് അറ്റങ്ങളിലും വാട്ടര് അതോറിറ്റിയുടെ പൈപ്പുകള് ഇടേണ്ടി വന്നാല് പൊതുമരാമത്ത് വകുപ്പും വാട്ടാര് അതോറിറ്റിയും പരസ്പരം ആലോചിച്ച് കാര്യങ്ങള് തീരുമാനിക്കണമെന്നും മന്ത്രി നിര്ദ്ദേശിച്ചു.
മഴക്കാലത്ത് നിര്മാണ പ്രവര്ത്തനങ്ങള് ഇല്ലെങ്കിലും ടെണ്ടറുകള് തയ്യാറാക്കുക, ടെണ്ടര് ചെയ്യുക, നിയമപ്രകാരം കരാര് ഉറപ്പിക്കുക തുടങ്ങിയ കാര്യങ്ങള് പൂര്ത്തിയാക്കണം.ഓരോ മണ്ഡലത്തിലെയും അറ്റകുറ്റ പണികള് മെയ് മാസത്തില് തന്നെ പൂര്ത്തിയാക്കണം. സംസ്ഥാനത്തെ 3000 പാലങ്ങളും ഈ മാസങ്ങളില് അതാത് എന്ജിനീയറിംഗ് സെക്ഷനുകളുടെ മേല്നോട്ടത്തില് കാടുപടലവും പുല്ലും വെട്ടി അഴുക്കുകള് വാരി അറ്റകുറ്റപ്പണികള് നടത്തി സംരക്ഷിക്കണം.
ഓടകളിലെ ചപ്പും ചവറും നീക്കം ചെയ്ത് വെള്ളമൊഴുക്ക് സുഗമമാക്കണം.മഴക്കാലത്ത് എന്ജിനീയറിംഗ് വിഭാഗം സജീവമായി ജനങ്ങള്ക്കൊപ്പമുണ്ടാവണം. എന്ജിനീയര്മാരുടെ അഭിരുചികള് അറിയിച്ചാല് അതിനനുസരണമായ വിഭാഗത്തില് പോസ്റ്റിംഗ് നല്കുമെന്നും മന്ത്രി വ്യക്തമാക്കി.
https://www.facebook.com/Malayalivartha
