വാരാപ്പുഴയില്‍ പൊലീസ് കസ്റ്റഡിയില്‍ മരിച്ച ശ്രീജിത്തിന്റെ കുടുംബത്തെ ത്രിപുര മുഖ്യമന്ത്രി ബിപ്ലബ് ദേബ് കുമാര്‍ സന്ദര്‍ശിച്ചതിന് പിന്നില്‍ ബിജെപിയുടെ വ്യക്തമായ രാഷ്ട്രീയനീക്കം. സ്വന്തം മുഖ്യമന്ത്രി തിരിഞ്ഞുനോക്കാത്ത വീട്ടിലേക്ക് ബിപ്ലബ് കുമാര്‍ വരുകയും കുടുംബാംഗങ്ങളെ ആശ്വസിപ്പിക്കുകയും ചെയ്യുമ്പോള്‍ രാഷ്ട്രീയ സന്ദേശം കൂടുതല്‍ വ്യക്തം.

മുമ്പ് ഹരിയാനയില്‍ ഗോമാംസം കൈയില്‍വെച്ചുവെന്ന് ആരോപിച്ച് തല്ലിക്കൊന്ന ജുനൈദിന്റെ കുടുംബത്തെ ആശ്വസിപ്പിക്കാന്‍ തയ്യാറായ പിണറായി സര്‍ക്കാര്‍ എന്തുകൊണ്ട് ശ്രീജിത്തിനെ തിരിഞ്ഞുനോക്കുന്നില്ലെന്ന ചോദ്യവും ബിപ്ലബിന്റെ സന്ദര്‍ശനത്തോടെ ദേശീയശ്രദ്ധയാകര്‍ഷിക്കുന്നു. അന്ന് ജുനൈദിന്റെ കുടുംബത്തിന് ധനസഹായം പ്രഖ്യാപിച്ചാണ് പിണറായി കൈയടി നേടിയതെങ്കില്‍, ബിപ്ലബ് ദേബിന്റെ നീക്കത്തോടെ ശ്രീജിത്ത് കേസില്‍ പിണറായി വിജയന്‍ കൂടുതല്‍ പ്രതിരോധത്തിലായിരിക്കുന്നു.

ബിപ്ലബ് ദേബിന്റെ വരവും അതിന് പിന്നിലെ രാഷ്ട്രീയനീക്കങ്ങളും മുന്നില്‍ക്കണ്ടുകൊണ്ടാണ് തിടുക്കപ്പെട്ട് കഴിഞ്ഞ ദിവസം തന്നെ ശ്രീജിത്തിന്റെ ഭാര്യയെ ജോലിയില്‍ പ്രവേശിപ്പിച്ചത്. കുടുംബത്തിന് ധനസഹായവും സര്‍ക്കാര്‍ ജോലിയും നല്‍കിയെങ്കിലും, ഇതുവരെ മുഖ്യമന്ത്രി ശ്രീജിത്തിന്റെ വീട് സന്ദര്‍ശിക്കാത്തത് വലിയ വിമര്‍ശനങ്ങള്‍ക്ക് ഇടയാക്കിയിരുന്നു.

മുഖ്യമന്ത്രി ശ്രീജിത്തിന്റെ വീട് സന്ദര്‍ശിക്കാത്തത് ദേശീയതലത്തില്‍ രാഷ്ട്രീയ ആയുധമാക്കുകയാണ് ബിജെപി ചെയ്തത്. മുമ്പ് ജുനൈദ് വിഷയത്തില്‍ കിട്ടിയ മേല്‍ക്കൈ ഇല്ലാതാക്കാനും ഇപ്പോഴത്തെ നീക്കത്തിലൂടെ ബിജെപിക്ക് സാധിച്ചിരിക്കുന്നു. ത്രിപുരയില്‍ സിപിഎമ്മിനെ പൊളിച്ചടുക്കിയ രാഷ്ട്രീയതന്ത്രജ്ഞനെ തന്നെ രംഗത്തിറക്കിയതിലൂടെ, വരുംകാലങ്ങളില്‍ നേട്ടമുണ്ടാക്കാമെന്ന പ്രതീക്ഷയിലാണ് ബിജെപി.