നിപ; നഴ്‌സുമാരെ മാറ്റിയിരുത്തിയ സ്വകാര്യ ബസുകള്‍ക്കു നേരെ നടപടിക്ക് നിര്‍ദേശം; പെര്‍മിറ്റ് സസ്‌പെന്‍ഡ് ചെയ്യുന്നതുള്‍പ്പെടെയുള്ള നടപടി
നിപ്പ വൈറസ് ആശങ്കയുടെ പേരില്‍ യാത്ര നിഷേധിക്കുന്ന സ്വകാര്യ ബസുകള്‍ക്കു നേരെ നടപടിയെടുത്ത് സംസ്ഥാന സര്‍ക്കാര്‍. കോഴിക്കോട്ടെ വിവിധ ആശുപത്രികളിലെ ജീവനക്കാര്‍, ആശുപത്രിയിലേക്കു പോകുന്നവര്‍, രോഗികളെ പരിചരിക്കുന്നവര്‍ തുടങ്ങിയവര്‍ക്കു യാത്രാ സൗകര്യം നിഷേധിക്കുന്ന ബസ് ജീവനക്കാര്‍ക്കും ഉടമകള്‍ക്കുമെതിരെ കര്‍ശന നടപടിയെടുക്കും. ഉടമയുടെ പെര്‍മിറ്റ് സസ്‌പെന്‍ഡ് ചെയ്യുന്നതുള്‍പ്പെടെയുളള നിയമനടപടികള്‍ സ്വീകരിക്കുന്നതിന് കോഴിക്കോട് ഉത്തരമേഖല, ഡെപ്യൂട്ടി ട്രാന്‍സ്‌പോര്‍ട്ട് കമ്മിഷണര്‍ നിര്‍ദേശം നല്‍കി. വടകര, കോഴിക്കോട് റീജിയണല്‍ ട്രാന്‍സ്‌പോര്‍ട്ട് ഓഫിസര്‍മാര്‍ക്കാണ് ഇതു സംബന്ധിച്ച കര്‍ശന നിര്‍ദേശം നല്‍കിയത്. സ്വകാര്യബസുകളില്‍ യാത്രയ്ക്ക് 'അപ്രഖ്യാപിത' വിലക്കേര്‍പ്പെടുത്തിയിട്ടുണ്ടെന്ന ആശുപത്രി ജീവനക്കാരുടെയും നഴ്‌സുമാരുടെയും ഉള്‍പ്പെടെ പരാതിയെത്തുടര്‍ന്നാണു സര്‍ക്കാര്‍ ഇടപെടല്‍.
കഴിഞ്ഞ ദിവസം പേരാമ്പ്ര താലൂക്ക് ആശുപത്രിക്കു സമീപത്തെ സ്‌റ്റോപ്പില്‍നിന്ന് സ്വകാര്യബസില്‍ കയറിയ നഴ്‌സുമാരെ മറ്റുള്ളവരില്‍നിന്ന് മാറ്റിയിരുത്തിയതായി പരാതി ഉയര്‍!ന്നിരുന്നു. ഇവരുടെ കയ്യില്‍ നിന്നു ടിക്കറ്റിന്റെ പണം വാങ്ങാനും കണ്ടക്ടര്‍ തയാറായില്ല. സംഭവത്തെത്തുടര്‍ന്നു ജില്ലാ മെഡിക്കല്‍ ഓഫിസര്‍ക്കു ജീവനക്കാരുടെ കൂട്ടായ്മ പരാതി നല്‍കിയെങ്കിലും നടപടി എടുത്തിട്ടില്ല. സ്ഥിരമായി യാത്ര ചെയ്യുന്ന ബസുകളിലെ ജീവനക്കാര്‍ക്ക് ആശുപത്രിയിലെ ജീവനക്കാരെ കണ്ടാല്‍ തിരിച്ചറിയാം. നിപ്പ ബാധയെക്കുറിച്ചുള്ള വാര്‍ത്തകള്‍ പ്രചരിച്ചതോടെ പല ബസുകളും ആശുപത്രിക്കു സമീപത്തെ സ്‌റ്റോപ്പ് നിര്‍ത്തലാക്കി. സ്‌റ്റോപ്പില്‍നിന്ന് ആളുകള്‍ കൈകാണിച്ചാല്‍പ്പോലും ബസുകള്‍ നിര്‍ത്താതെ പോവുകയാണു പതിവ്.
താലൂക്ക് ആശുപത്രിയിലെ ഡോക്ടര്‍മാരില്‍ പലരും കോഴിക്കോടുനിന്ന് ബസില്‍ കയറി കല്ലോട് സ്‌റ്റോപ്പില്‍ ഇറങ്ങുകയാണു പതിവ്. ഇവരില്‍ പലരും ബസില്‍ കയറുമ്പോള്‍ ദേഷ്യത്തോടെയാണ് പല ബസ് തൊഴിലാളികളും സഹയാത്രികരും പെരുമാറുന്നതെന്നും പരാതിയുണ്ട്. സഹപ്രവര്‍ത്തക ജോലിക്കിടെ രോഗം ബാധിച്ചു മരിച്ചെങ്കിലും അവശ്യസന്ദര്‍ഭമായതിനാല്‍ ജീവനക്കാര്‍ ലീവെടുക്കാതെ ജോലിക്കെത്തുകയാണ്. പേരാമ്പ്രയിലേയും സമീപ പ്രദേശങ്ങളിലേയും ഓട്ടോറിക്ഷകളില്‍ ആശുപത്രി ജീവനക്കാരേയോ രോഗികളേയോ കയറ്റുന്നില്ലെന്നും പരാതിയുണ്ട്. കോഴിക്കോട് മെഡിക്കല്‍ കോളജിനോടു ചേര്‍ന്നും സമാനമായ പ്രശ്‌നങ്ങളുണ്ടെന്ന പരാതി ഉയര്‍ന്നതിനെത്തുടര്‍ന്നാണ് ഇപ്പോള്‍ ഡെപ്യൂട്ടി ട്രാന്‍സ്‌പോര്‍ട്ട് കമ്മിഷണറുടെ ഇടപെടല്‍.
https://www.facebook.com/Malayalivartha
