കെവിന്‍ കേസ് പുതിയ വ‍ഴിത്തിരിവിലേക്ക്. കൊല്ലപ്പെട്ട കെവിന്‍റെ ഭാര്യ നീനുവിനെ കെവിന്‍റെ വീട്ടില്‍ നിന്നും മാറ്റാനായി നീക്കം. ഇക്കാര്യത്തിനായി കേസിലെ പ്രതിയും നീനു വിന്‍റെ പിതാവുമായ ചാക്കോ കോടതിയെ സമീപിച്ചു.നീനുവിന് മാനസിക രോഗമുണ്ടെന്നും ഇതിന് ചികിത്സ ആവശ്യമാണെന്നും കാണിച്ചാണ്ചാക്കോ കോടതിയെ സമീപിച്ചത്. നീനുവിനും അമ്മ രഹനയ്ക്കും മാനസിക രോഗമുണ്ടെന്നും ചികിത്സക്ക് തിരുവനന്തപുരത്ത് കൊണ്ടുപോയിട്ടുണ്ടെന്നും ഹരജിയില്‍ പറയുന്നു.

കെവിന്‍ വധക്കേസില്‍ തെളിവെടുപ്പ് പുരോഗമിക്കുന്നതിനിടെയാണു കോടതിയില്‍ പ്രതികളുടെ വെളിപ്പെടുത്തല്‍. നീനുവിന് തുടര്‍ചികിത്സ നടത്തുന്നതിന് വേണ്ടി കെവിന്റെ വീട്ടില്‍ നിന്നും മറ്റൊരിടത്തേക്ക് മാറ്റിത്താമസിപ്പിക്കണമെന്നും ചാക്കോ കോടതിയില്‍ ആവശ്യപ്പെട്ടു. എന്നാല്‍ നീനുവിന് തുടര്‍ചികിത്സ നല്‍കുന്നത് സംബന്ധിച്ചാണെങ്കില്‍ പ്രത്യേക അപേക്ഷ നല്‍കാന്‍ കോടതി നിര്‍ദേശിച്ചു.

നീനു മാനസികരോഗത്തിനു തിരുവനന്തപുരത്തെ സ്വകാര്യ ആശുപത്രിയില്‍ ചികിത്സയില്‍ കഴിഞ്ഞിരുന്നയാളാണെന്നും കേസില്‍ അറസ്റ്റിലായ പ്രതി ചാക്കോയ്ക്കുവേണ്ടി കോടതിയില്‍ സമര്‍പ്പിച്ച റിപ്പോര്‍ട്ടില്‍ പറയുന്നു. ഇപ്പോള്‍ തുടര്‍ചികിത്സ ലഭിക്കാതെ അന്യവീട്ടിലാണെന്നും തുടര്‍ചികിത്സയ്ക്കായി ഏതെങ്കിലും ഷെല്‍ട്ടര്‍ ഹോമിലേയ്ക്കു മാറ്റണമെന്നുമാണു അഭിഭാഷകന്‍ ആവശ്യപ്പെട്ടു. അതിനിടയില്‍ കേസില്‍ ഉള്‍പ്പെട്ട നീനുവിന്റെ മാതാവ് രഹ്നയ്ക്ക് വേണ്ടി പോലീസ് തെരച്ചില്‍ ഊര്‍ജ്ജിതമാക്കിയതിനിടെ പ്രതിഭാഗം കേസ് വഴിതിരിച്ച്‌ വിടാനുള്ള ശ്രമങ്ങള്‍ കോടതി മുഖേനെ നടത്തുന്നുണ്ട്.

കെവിന്റെ മരണവുമായി തനിക്ക് ബന്ധമില്ലെന്ന് അവകാശപ്പെട്ട് രഹ്ന ഹൈക്കോടതിയില്‍ മുന്‍കൂര്‍ ജാമ്യത്തിന് അപേക്ഷ നല്‍കിയിരിക്കുകയാണ്. കേസുമായി യാതൊരു വിധത്തിലുള്ള ബന്ധവും ഇല്ലാതിരുന്നിട്ടും തന്നെ പ്രതിയാക്കാന്‍ പോലീസ് ശ്രമം നടത്തുന്നുവെന്നും രഹ്ന ഹര്‍ജിയില്‍ ആരോപിക്കുന്നു. കെവിനെ മാന്നാനത്തെ വീട്ടില്‍ നിന്നും തട്ടിക്കൊണ്ട് പോയി ആക്രമിക്കാനുള്ള ഗൂഢാലോചനയില്‍ നീനുവിന്റെ അച്ഛനും സഹോദരനും എന്ന പോലെ അമ്മ രഹ്നയ്ക്കും പങ്കുണ്ടെന്നാണ് പോലീസ് കണ്ടെത്തല്‍.

മാന്നാനത്തെ അനീഷിന്റെ വീട് ഷാനുവും കൂട്ടര്‍ക്കും കാണിച്ച്‌ കൊടുത്തത് രഹ്നയാണ് എന്ന് സൂചനയുണ്ട്. കെവിന്റെ മരണശേഷവും കോട്ടയത്തെ ചാക്കോയുടെ വീട്ടില്‍ രഹ്നയുണ്ടായിരുന്നു. പോലീസ് എത്തി വീട് വളഞ്ഞ് പരിശോധന നടത്തുമ്ബോഴേക്ക് രഹ്ന മുങ്ങി. ബെംഗളൂരുവിലേക്ക് കടന്ന ചാക്കോയും ഷാനുവും പോലീസ് പിടികൂടുമെന്നായപ്പോള്‍ കണ്ണൂരിലെത്തി കീഴടങ്ങുകയായിരുന്നു. അപ്പോഴും രഹ്നയെക്കുറിച്ച്‌ മാത്രം വിവരമൊന്നും ലഭിച്ചില്ല. തമിഴ്‌നാട്ടില്‍ രഹ്നയ്ക്ക് ബന്ധുക്കള്‍ ഉണ്ടെന്നും ഇവിടെ ഒളിവില്‍ കഴിയുകയാണ് എന്നും വിവരങ്ങള്‍ പുറത്ത് വരുന്നുണ്ട്.

അതിനിടെ മുഖ്യപ്രതി ഷാനു ചാക്കോ അടക്കമുള്ള ആറു പ്രതികളെ വീണ്ടും പൊലീസ് കസ്റ്റഡിയില്‍ വിട്ടു. അന്വേഷണം പൂര്‍ത്തിയായ സാഹചര്യത്തില്‍ പ്രതികളെ കസ്റ്റഡിയില്‍ വിടരുതെന്ന പ്രതിഭാഗത്തിന്റെ ആവശ്യം കോടതി തള്ളി. കെവിനെ തട്ടിക്കൊണ്ടുപോയ പ്രതികളില്‍നിന്നു െകെക്കൂലി വാങ്ങി എന്ന കേസില്‍ അറസ്റ്റിലായ ഗാന്ധിനഗര്‍ പോലീസ് സ്‌റ്റേഷനിലെ എ.എസ്.ഐ. ബിജു, ഡ്രൈവര്‍ അജയകുമാര്‍ എന്നിവര്‍ക്കു കഴിഞ്ഞ ദിവസം ഏറ്റുമാനൂര്‍ ഒന്നാം ക്ലാസ് ജുഡീഷ്യല്‍ മജിസ്‌ട്രേറ്റ് കോടതി ജാമ്യം അനുവദിച്ചിരുന്നു.