കേരള സര്‍വ്വകലാശാലയിലെ ഡിഗ്രി പരീക്ഷകളുടെ ഉള്‍പ്പെടെ ഉത്തരക്കടലാസിന്റെ മൂല്യനിര്‍ണ്ണയം ഇതുപോലെ കുത്തഴിഞ്ഞ കാലം മുമ്പുണ്ടായിട്ടില്ലെന്ന് വിദ്യാര്‍ത്ഥികള്‍ ആരോപിക്കുന്നു. വര്‍ഷം മുഴുവന്‍ മൂല്യനിര്‍ണ്ണയം നടത്തിയിട്ടും തീരുന്നില്ല എങ്കില്‍ എന്തോ ഗുരുതരമായ പ്രശ്‌നമുണ്ട് എന്നല്ലേ അര്‍ത്ഥമെന്ന് അവര്‍ ചോദിക്കുന്നു. പരീക്ഷാഫലം എന്നു വരുമെന്ന് കവടി നിരത്തി പോലും പറയാനാവാത്ത സ്ഥിതിയാണെന്നും അവര്‍ പരിതപിക്കുന്നു. കേരള സര്‍വ്വകലാശാലയിലെ ഉത്തരക്കടലാസ് മൂല്യനിര്‍ണ്ണയം നിമിത്തം സര്‍ക്കാര്‍ കോളജുകളിലെ പഠനം മുടങ്ങിയിരിക്കുകയാണ്. പുതിയ അദ്ധ്യയന വര്‍ഷം ആരംഭിച്ചിട്ടും ക്ലാസ്സില്‍ അദ്ധ്യാപകരെത്തിയില്ല. കാരണം അവര്‍ 'നിര്‍ബന്ധിത' മൂല്യനിര്‍ണ്ണയത്തിലാണ്. 

അതേസമയം സ്വകാര്യ സ്വാശ്രയ കോളേജുകളില്‍ ആ പ്രശ്‌നമില്ല. സ്ഥിരമായി ചില അദ്ധ്യാപകരെ മാത്രം സര്‍വ്വകലാശാല മൂല്യനിര്‍ണ്ണയച്ചുമതല അടിച്ചേല്‍പ്പിക്കുന്നു എന്ന് ഇതില്‍ നിന്ന് വ്യക്തമാണ്. ഓരോ അദ്ധ്യാപകരും അവര്‍ പഠിപ്പിക്കുന്ന കുട്ടികളുടെ അത്ര എണ്ണം ഉത്തരക്കടലാസ് കൃത്യമായി മൂല്യനിര്‍ണ്ണയം നടത്തുകയാണെങ്കില്‍ ഈ പ്രശ്‌നം വരില്ലെന്ന് ചില അധ്യാപകരും ചൂണ്ടിക്കാട്ടുന്നു. പക്ഷേ, ചില ഉന്നതകുലജാതര്‍ക്ക് മൂല്യനിര്‍ണ്ണയം പഥ്യമാണ്. കാരണം ഇപ്പോള്‍ മൂല്യനിര്‍ണ്ണയത്തിന് വേതനമില്ല. പാവം സര്‍ക്കാര്‍ കോളേജ് അദ്ധ്യാപകരാണ് ഇതിന്റെ ഇരകള്‍. എയ്ഡഡ് കോളജുകളിലെ നല്ലവരായ ചില അദ്ധ്യാപകര്‍ മൂല്യനിര്‍ണ്ണയവുമായി സഹകരിക്കുന്നുണ്ട്.

സര്‍ക്കാര്‍ കോളജ് അദ്ധ്യാപകര്‍ കറവപ്പശുക്കളാണെന്നാണ് അവര്‍ തന്നെ പറയുന്നത്. പ്രതികരിച്ചാല്‍ അച്ചടക്കലംഘനമാവും. സര്‍ക്കാര്‍ കോളജിലെ ക്ലാസ് മുടങ്ങിയാല്‍ ചോദിക്കാനും പറയാനും ആരുമില്ല. എന്നാല്‍, സ്വകാര്യ സ്വാശ്രയ കോളജുകളില്‍ അങ്ങനെയല്ല. ഒരു പിരീയഡ് പോലും തടസ്സപ്പെടാതെ അവര്‍ കാര്യങ്ങള്‍ മുന്നോട്ടുനീക്കും. അദ്ധ്യാപകരെ മൂല്യനിര്‍ണ്ണയത്തിന് അവര്‍ വിടില്ല. പൊതുവിദ്യാഭ്യാസത്തെ രക്ഷിക്കാന്‍ നടപടിയെടുക്കുന്നെന്ന് മേനി നടിക്കുന്ന സര്‍ക്കാരുള്ളപ്പോഴാണ് ഈ സ്ഥിതി. പൊതുവിദ്യാഭ്യാസത്തെ രക്ഷിക്കണമെങ്കില്‍ ഈ മേഖലയില്‍ തുല്യനീതി നടപ്പാക്കണമെന്ന് അധ്യാപകരില്‍ ചിലര്‍ ആവശ്യപ്പെടുന്നു. കോളേജ് തലത്തില്‍ ഓരോ അദ്ധ്യാപകനും പഠിപ്പിക്കുന്ന അത്രയും എണ്ണം വിദ്യാര്‍ത്ഥികളുടെ ഉത്തരക്കടലാസുകള്‍ മൂല്യനിര്‍ണ്ണയം നടത്തിയാല്‍ മതി എന്ന വ്യവസ്ഥ വേണം. എങ്കില്‍ മാത്രമേ സര്‍ക്കാര്‍ കോളേജുകളില്‍ അദ്ധ്യയനം സാദ്ധ്യമാകൂ എന്നും അവര്‍ പറയുന്നു.