കോണ്‍ഗ്രസില്‍ ആന്റണിയുടെ വലംകയ്യും എ ഗ്രൂപ്പിന്റെ പ്രധാനനേതാവുമായിരുന്ന ചെറിയാന്‍ഫിലിപ്പ് എന്ന സാംസ്‌കാരിക- ബുദ്ധിജീവി ആശയപരമായ അഭിപ്രായ ഭിന്നതകളെയും ഒതുക്കലിനെയും തുടര്‍ന്നാണ് പാര്‍ട്ടി വിട്ടത്. എല്‍.ഡി.എഫ് പാളയത്തിലേക്ക് പിണറായി വിജയന്‍ അടക്കമുള്ളവര്‍ ക്ഷണിച്ചുകൊണ്ടു പോയ ചെറിയാന്‍ ഫിലിപ്പിന് അര്‍ഹമായ അംഗീകാരം ഇതുവരെ അവര്‍ നല്‍കിയില്ല. ഇപ്പോള്‍ രാജ്യസഭാ സീറ്റും നല്‍കാതെ ബലിയാടാക്കി. ഇതില്‍ അദ്ദേഹം കടുത്ത അസംതൃപ്തനാണെന്ന് അടുത്തവൃത്തങ്ങള്‍ പറയുന്നു.

കെ.കരുണാകരനെതിരെ ഉമ്മന്‍ചാണ്ടിയും കൂട്ടരും ചാരക്കേസ് ഉയര്‍ത്തിക്കൊണ്ട് വന്നപ്പോള്‍ എ ഗ്രൂപ്പ് തലവനായിരുന്ന ആന്റണിക്ക് അത്ര ധൈര്യമില്ലായിരുന്നു. സംഭവം പാളുമോ എന്ന് അദ്ദേഹം ഭയന്നു. അന്ന് ചെറിയാന്‍ ഫിലിപ്പായിരുന്നു ആന്റണിയുടെ അരുമശിഷ്യന്‍. എന്നാല്‍ ചാരക്കേസ് ആളിക്കത്തിച്ച കൂട്ടത്തില്‍ ഉമ്മന്‍ചാണ്ടിയും കൂട്ടരും ചെറിയാന്‍ ഫിലിപ്പിനെയും ഒതുക്കി. ഇത് മനസിലാക്കിയാണ് ചെറിയാന്‍ ഫിലിപ്പ് കോണ്‍ഗ്രസ് വിട്ടതും ഉമ്മന്‍ചാണ്ടിക്കെതിരെ പുതുപ്പള്ളിയില്‍ മത്സരിച്ചതും എല്‍.ഡി.എഫിന്റെ സ്വതന്ത്ര ചാവേറായതും. പിന്നീട് എല്‍.ഡി.എഫ് വി.എസിന്റെ നേതൃത്വത്തില്‍ അധികാരത്തില്‍ വന്നപ്പോള്‍ കെ.ടി.ഡി.സി ചെയര്‍മാന്‍ എന്ന ചെറിയ സ്ഥാനം മാത്രമാണ് ചെറിയാന്‍ ഫിലിപ്പിന് നല്‍കിയത്.

കഴിഞ്ഞ നിയമസഭാ തെരഞ്ഞെടുപ്പില്‍ വട്ടിയൂര്‍ക്കാവില്‍ നിന്ന് മത്സരിക്കാന്‍ സി.പി.എം നിര്‍ബന്ധിച്ചെങ്കിലും വിജയസാധ്യതയില്ലാതിനാല്‍ ചെറിയന്‍ ഫിലിപ്പ് ഒഴിഞ്ഞുമാറി. അന്ന് രാജ്യസഭാ സീറ്റ് നല്‍കാമെന്ന് മുന്നണിയിലെ ചിലര്‍ ഉറപ്പ് കൊടുത്തിരുന്നു. എന്നാല്‍ സമയമായപ്പോള്‍ പാലം വലിച്ചു. ചെറിയാന്‍ ഫിലിപ്പിനെ പോലെ രാഷ്ട്രീയത്തിനായി ജീവിതം സമര്‍പ്പിച്ച ഒരാള്‍ക്ക് രാജ്യസഭയില്‍ നന്നായി ശോഭിക്കാനാവും. അല്ലെങ്കില്‍ വിജയമുറപ്പുള്ള ഏതെങ്കിലും പാര്‍ലമെന്റ് സീറ്റോ, എം.എല്‍.എ സീറ്റോ നല്‍കാം. അതൊന്നും എല്‍.ഡി.എഫ് പരിഗണിക്കുന്നില്ല. കൈരളി ടി.വിയിലെ പരിപാടി മാത്രമാണ് അദ്ദേഹമിപ്പോള്‍ നടത്തുന്നത്. 

കേരളത്തിന്റെ രാഷ്ട്രീയ, സാമൂഹ്യ, സാംസ്‌കാരിക മണ്ഡലങ്ങളില്‍ നിര്‍ണായകമായ ഇടപെടലുകള്‍ നടത്താന്‍ കഴിയുന്നയാളാണ് ചെറിയാന്‍ ഫിലിപ്പ്. എഴുത്തുകാരനും വാഗ്മീയിയുമാണ്. അദ്ദേഹത്തിന് അര്‍ഹമായ അംഗീകാരം നല്‍കാന്‍ ഇനിയെങ്കിലും എല്‍.ഡി.എഫ് നേതൃത്വം തയ്യാറാകണമെന്നാണ് സാംസ്‌കാരിക കേരളം ആവശ്യപ്പെടുന്നത്.