തോരാത്ത മഴയും ദുരന്ത ചിത്രങ്ങള് സമൂഹമാധ്യമങ്ങളില് നിറഞ്ഞു നില്ക്കുമ്പോഴും; തമിഴ്നാട്ടില് നിന്നുള്ള ഏതു കഠിന ഹൃദയരെയും അസ്വസ്ഥമാക്കുന്ന വാര്ത്ത; ഓവു ചാലില് നിന്നും വീട്ടമ്മ നവജാത ശിശുവിനെ രക്ഷപ്പെടുത്തി
ചെന്നൈയിലെ വലസരവക്കം സ്വദേശിയായ വീട്ടമ്മ ഗീതയാണ് സംഭവ കഥയിലെ നായിക. രാവിലെ പാല്ക്കാരന്റെ ശബ്ദം കേട്ടാണ് വീട്ടമയായ ഗീത പുറത്തേക്ക് വന്നത്. വീടിന് സമീപത്തായി ഒഴുകുന്ന ഓവ് ചാലില്നിന്നും കരയുന്ന ശബ്ദം കേള്ക്കുന്നുണ്ടെന്ന് പറഞ്ഞായിരുന്നു പാല്ക്കാരന് ഗീതയെ വീടിന് പുറത്തേക്ക് വിളിച്ചത്. ഓവിന് സമീപമെത്തിയ ഗീത ശബ്ദം കേള്ക്കുന്നതിനായി ചാലിനോട് കാത് ചേര്ത്തു വച്ച് ആ ശബ്ദം ശ്രവിച്ചു. ഓവ് ചാലിന്റെ ഉള്ളില് നിന്നും കുഞ്ഞിന്റെ കരച്ചില്!പുറത്തു വരുന്ന ശബ്ദം കോഴിക്കുഞ്ഞിന്റേതാണന്ന് ചിലര് അഭിപ്രായപ്പെട്ടു. പക്ഷേ പന്തികേട് തോന്നിയ ഗീത പിന്മാറിയില്ല. ഉള്ളില് അകപ്പെട്ടതെന്ന് അറിയാനുള്ള ആകാംക്ഷയായി മനസു നിറയെ. പിന്നെ രണ്ടും കല്പ്പിച്ച് ഓവ് ചാലിലേക്ക് ഇറങ്ങി. ഓവ് ചാലില് തപ്പിയപ്പോള് ഞെട്ടിക്കുന്ന കാഴ്ച്ചയാണ് അവര് കണ്ടത്. പൊക്കില്കൊടിപോലും മുറിച്ച് മാറ്റാത്ത ഒരു നവജാത ശിശു.
പൊക്കിള്കൊടി ആ പൈതലിന്റെ കഴുത്തിന് ചുറ്റും പിണഞ്ഞ് കിടക്കുകയായിരുന്നു . നിര്ത്താതെ നിലവിളിക്കുകയായിരുന്നു ആ കുരുന്ന്. പതുക്കെ അവന്റെ കാലുകളില് പിടിച്ച് അഴുക്ക് ചാലില്നിന്നും വലിച്ചു പുറത്തെടുത്തു. തുടര്ന്ന് ചുറ്റും കൂടിനിന്ന ആളുകളോട് വെള്ളം കൊണ്ടുവരാന് ആവശ്യപ്പെട്ടു. വെള്ളം ഉപയോഗിച്ച് കുഞ്ഞിനെ കഴുകി വൃത്തിയാക്കിയതിശേഷം ചെന്നൈ എഗ്മോര് ആശുപത്രിയില് പ്രവേശിപ്പിച്ചു. വിദഗ്ധ ചികിത്സയ്ക്ക് ശേഷം കുഞ്ഞ് ഇപ്പോള് തികച്ചും ആരോഗ്യവാനാണെന്ന് ഡോക്ടര്മാര് അറിയിച്ചു.സ്വാതന്ത്ര്യ ദിനപ്പുലരിയില് കിട്ടിയ കുഞ്ഞിന് താന് 'സ്വാതന്ത്ര' എന്നാണ് പേരിട്ടിരിക്കുന്നതെന്ന് ഗീത പറയുന്നു. ഒരു ജീവന് രക്ഷിക്കുന്നതിന് താന് നിമിത്തമായതില് അഭിമാനമുണ്ടെന്നും ആ വീട്ടമ്മ പറയുന്നു.
അതേസമയം സംഭവത്തെക്കുറിച്ച് പൊലീസ് അന്വേഷണം ആരംഭിച്ചിട്ടുണ്ട്. ഓവുചാലില് വെള്ളം ഇല്ലാത്തതിനാല് വലിയൊരു അപകടം ഒഴിവായതായി പൊലീസ് പറഞ്ഞു. കുഞ്ഞ് സുഖമായിരിക്കുന്നു. അവനിപ്പോള് എഗ്മോറിലെ സര്ക്കാര് അശുപത്രിയിലാണുള്ളത്. കുറച്ച് ദിവസങ്ങള്ക്ക് ശേഷം ശിശുഭവനത്തിലേക്ക് അയക്കുമെന്നും പൊലീസ് കൂട്ടിച്ചേര്ത്തു. അതേസമയം കുഞ്ഞിന് രക്ഷിച്ച് കമ്പിളിയില് പൊതിഞ്ഞ് ആശുപത്രിയില് കൊണ്ടുപോകുന്ന ദൃശ്യങ്ങള് സമൂഹമാധ്യമങ്ങളില് വൈറലാകുകയാണ്. ഓവ് ചാലില്നിന്നും കുഞ്ഞിന് രക്ഷിച്ച ഗീതയെ അഭിനന്ദനം കൊണ്ട് മൂടുകയാണ് സോഷ്യല് മീഡിയ.
https://www.facebook.com/Malayalivartha