ഐ.എസ്.ആര്.ഒ.യുടെ പ്രഥമദൗത്യമായ മിഷന് ഗഗന്യാന് നേതൃത്വം നല്കുന്നത് മലയാളി ശാസ്ത്രജ്ഞ
മനുഷ്യനെ ബഹിരാകാശത്തെത്തിക്കുന്ന ഐ.എസ്.ആര്.ഒ.യുടെ പ്രഥമദൗത്യമായ മിഷന് ഗഗന്യാന് നേതൃത്വം നല്കുന്നത് മലയാളിശാസ്ത്രജ്ഞ. തിരുവനന്തപുരം സ്വദേശിയും വിക്രം സാരാഭായി ബഹിരാകാശ കേന്ദ്രത്തിലെ ഡെപ്യൂട്ടി ഡയറക്ടറുമായ ഡോ. വി.ആര്. ലളിതാംബികയാണ് ചരിത്രദൗത്യത്തിന് ചുക്കാന് പിടിക്കുക. പ്രാരംഭ പ്രവര്ത്തനങ്ങള്ക്കുവേണ്ടി മൂന്നുമാസമായി അവര് ബെംഗളൂരുവിലെ ഐ.എസ്.ആര്.ഒ. ആസ്ഥാനത്തുണ്ട്. 2022ല് ബഹിരാകാശത്ത് മനുഷ്യനെ എത്തിക്കാന് ലക്ഷ്യമിട്ടുള്ള മിഷന് ഗഗന്യാന് പദ്ധതി സ്വാതന്ത്ര്യദിനത്തിലാണ് പ്രധാനമന്ത്രി നരേന്ദ്രമോദി പ്രഖ്യാപിച്ചത്.
ഈ പദ്ധതിയുടെ പ്രാരംഭപ്രവര്ത്തനങ്ങളുടെ ചുമതലയാണ് ഐ.എസ്.ആര്.ഒ. തന്നെ ഏല്പിച്ചിരിക്കുന്നതെന്ന് ഡോ. ലളിതാംബിക പറഞ്ഞു. തയ്യാറെടുപ്പുകള് നടന്നുവരുകയാണ്. സാങ്കേതിക വിദ്യകള് വികസിപ്പിച്ചെടുത്ത് പരീക്ഷണം നടത്തിവരികയാണെന്നും അവര് വ്യക്തമാക്കി. വിക്ഷേപണസാങ്കേതിക വിദ്യയില് വിദഗ്ധയായ ഡോ. ലളിതാംബിക 1988ലാണ് ഐ.എസ്.ആര്.ഒ.യിലെത്തിയത്. ഇതിനോടകം ഒട്ടേറെ പുരസ്കാരങ്ങള്ക്ക് അര്ഹയായിട്ടുണ്ട്.
2001ല് സ്പേസ് ഗോള്ഡ് മെഡല്, ഐ.എസ്.ആര്.ഒ. വ്യക്തിഗത മെറിറ്റ് അവാര്ഡ്, 2013ല് പെര്ഫോമന്സ് എക്സലന്സ് അവാര്ഡ് എന്നിവയാണ് ഇവരുടെ നേട്ടങ്ങള്. 2014ല് വിജയകരമായി പരീക്ഷണം നടത്തിയ എല്.വി.എം.3 (ജി.എസ്.എല്.വി. മാക് ത്രീ) വികസിപ്പിച്ചെടുത്തത് ഡോ. ലളിതാംബികയുടെ നേതൃത്വത്തിലുള്ള സംഘമാണ്.
https://www.facebook.com/Malayalivartha
