കേരളത്തിനായുള്ള യുഎഇ ധനസഹായം വാങ്ങണ്ടെന്ന് കേന്ദ്രം. മഹാപ്രളയത്തിന്റെ കെടുതികള്‍ അനുഭവിക്കുന്ന കേരളത്തിന് അളന്നും മുറിച്ചും സാമ്പത്തിക സഹായം നല്‍കിയ കേന്ദ്രത്തിന്റെ മുഖത്തേറ്റ അടിയായിരുന്നു യുഎഇയില്‍ നിന്നുള്ള 700 കോടി സഹായം. ഒരു സഹായ അഭ്യര്‍ത്ഥന പോലുമില്ലാതെ കേരളത്തിന് 700 കോടി യുഎഇ വാഗ്ദാനം ചെയ്യുകയായിരുന്നു. സോഷ്യല്‍ മീഡിയയില്‍ വന്‍ കൈയ്യടിയായിരുന്നു യു എ ഇയുടെ നടപടിക്ക്.

എന്നാല്‍ പ്രളയ ദുരിതാശ്വാസത്തിനായി യുഎഇ നല്‍കിയ ഈ കോടികള്‍ കേരളത്തിന് ഉപകരിക്കിച്ചേക്കില്ലെന്നാണ് പുതിയ റിപ്പോര്‍ട്ട്. വിദേശരാജ്യങ്ങളില്‍ നിന്നുള്ള സംഭാവന സ്വീകരിക്കേണ്ടതില്ലെന്ന നയം മാറ്റേണ്ടതില്ലെന്ന് കേന്ദ്രസര്‍ക്കാര്‍ തീരുമാനിച്ചു. 

വിദേശ രാജ്യങ്ങളുടെ ധനസഹായം സ്വീകരിക്കേണ്ടതില്ലെന്ന നയം പതിനഞ്ച് വര്‍ഷം മുന്‍പാണ് ഇന്ത്യ സ്വീകരിച്ചത്. ഈ നയത്തില്‍ മാറ്റം വരുത്താന്‍ ഉദ്ദേശിക്കുന്നില്ലെന്നാണ് കേന്ദ്രസര്‍ക്കാര്‍ ഇപ്പോള്‍ വ്യക്തമാക്കുന്നത്. അതേസമയം വ്യക്തിപരമായി യുഎഇ ഭരണാധികാരികള്‍ക്ക് ഇന്ത്യയെ സഹായിക്കാം എന്നും കേന്ദ്രസര്‍ക്കാര്‍ വ്യക്തമാക്കിയിട്ടുണ്ട്.

കേരളത്തിലുണ്ടായ പ്രളയത്തെ തുടര്‍ന്ന് യുഎഇ ഇന്ത്യയ്ക്ക് 700 കോടിയുടെ സാന്പത്തികസഹായം പ്രഖ്യാപിച്ചിരുന്നു. എന്നാല്‍ വിദേശരാജ്യങ്ങളുടെ സംഭാവനകള്‍ സ്വീകരിക്കേണ്ടതില്ലെന്ന് ഇന്ത്യന്‍ നയം അനുസരിച്ച് ഈ സഹായം കേരളത്തിന് കിട്ടില്ല എന്ന സ്ഥിതി വന്നു. ഇതിനെതിരെ വന്‍തോതില്‍ പ്രതിഷേധമുയര്‍ന്ന സാഹചര്യത്തിലാണ് വിഷയം കേന്ദ്രസര്‍ക്കാര്‍ വീണ്ടും പരിശോധിച്ചത്.

പ്രധാനമന്ത്രി നരേന്ദ്ര മോദി കേരളം സന്ദര്‍ശിച്ചപ്പോള്‍ പണമടക്കം കൂടുതല്‍ കേന്ദ്ര സഹായം കേരളം ആവശ്യപ്പെട്ടിരുന്നു. 2000 കോടി രൂപ കേരളം ആവശ്യപ്പെട്ടപ്പോള്‍ ഇടക്കാലാശ്വാസമായി വെറും 500 കോടിയായിരുന്നു തന്നത്. ഇതോടെ കേന്ദ്ര അവഗണനയ്‌ക്കെതിരെ വലിയ രീതിയില്‍ പ്രതിഷേധം ഉയര്‍ന്നു. എന്നാല്‍ കേന്ദ്രത്തെ പോലും ഞെട്ടിപ്പിച്ചാണ് യുഎഇ 700 കോടിയുടെ സഹായം കേരളത്തിന് വാഗ്ദാനം ചെയ്തത്. ഐക്യരാഷ്ട്ര സഭയും കേരളത്തെ സഹായിക്കാമെന്ന് അറിയിച്ചിരുന്നു.

എന്നാല്‍ യുഎഇയുടേയും ഐക്യരാഷ്ട്ര സഭയുടേയുമൊന്നും സഹായം വേണ്ടെന്ന നിലപാടാണ് കേന്ദ്രനിലപാട്. ദുരന്തമുണ്ടാകുമ്പോള്‍ രക്ഷാപ്രവര്‍ത്തനങ്ങളും പുനരധിവാസവും ഒറ്റയ്ക്ക് നടത്താനുള്ള ശേഷി ഇന്ത്യയ്ക്ക് ഉണ്ടെന്നാണത്രേ ഇന്ത്യ സമീപകാലത്ത് സ്വീകരിച്ച നിലപാട്. അതുകൊണ്ട് തന്നെ വായ്പയായി ധനസഹായം സ്വീകരിക്കാമെന്നും എന്നാല്‍ വിദേശ സഹായങ്ങള്‍ വേണ്ടെന്നുമാണ് കേന്ദ്രത്തിന്റെ തിരുമാനം.