ആന്ധ്രാപ്രദേശിലെ വിശാഖപട്ടണത്ത് രണ്ടു സിനിമാ തീയറ്ററുകള്‍ കത്തിനശിച്ചു. ഗജുവാക്ക മേഖലയിലെ കന്യ, ശ്രീകന്യ എന്നീ തീയറ്ററുകളിലാണ് തീപിടിത്തമുണ്ടായത്. മൂന്നു കോടി രൂപയുടെ നഷ്ടമുണ്ടായെന്നാണ് പ്രാഥമിക കണക്ക്. തിങ്കളാഴ്ച രാവിലെ തീയേറ്റര്‍ വൃത്തിയാക്കാനെത്തിയ ആളാണ് പുക ഉയരുന്ന വിവരം ഉടമകളെ അറിയിച്ചത്. ഉടന്‍ തന്നെ അഗ്‌നിശമന സേനയെ വിവരം അറിയിച്ചു.

എന്നാല്‍ അഗ്‌നിശമന സേന സ്ഥലത്തെത്തിയപ്പോള്‍ തീയറ്ററുകള്‍ പൂര്‍ണമായും കത്തിനശിച്ചിരുന്നു. തീപിടുത്തത്തിന്റെ യഥാര്‍ഥ കാരണം കണ്ടെത്താന്‍ കൂടുതല്‍ പരിശോധന നടക്കുകയാണെന്നും അഗ്‌നിശമനസേന ഉദ്യോഗസ്ഥര്‍ പറഞ്ഞു.