കൈലാസ്-മാനസരോവര്‍ യാത്രയ്ക്ക് ശേഷം മധ്യപ്രദേശിലെ ഭോപ്പാലില്‍ റോഡ്‌ ഷോ നടത്തുന്ന രാഹുല്‍ ഗാന്ധിയുടെ പ്രചാരണത്തിനായി ശിവലിംഗത്തില്‍ പൂജ നടത്തുന്ന രാഹുലിന്റെ ചിത്രങ്ങള്‍. 18 കിലോമീറ്ററുകളോളമാണ് രാഹുലിന്റെ ചിത്രങ്ങള്‍ പതിച്ച പോസ്റ്ററുകൾ കോണ്‍ഗ്രസ് പ്രവര്‍ത്തകര്‍ പതിപ്പിച്ചിരിക്കുന്നത്. രാഹുല്‍ കടുത്ത ശിവഭക്തനാണെന്ന് ചിത്രീകരിക്കുന്ന പോസ്റ്ററുകള്‍ നേരത്തെ ഉത്തര്‍ പ്രദേശിലും കോണ്‍ഗ്രസ് പ്രവര്‍ത്തകര്‍ പ്രചരിപ്പിച്ചിരുന്നു.

തുറന്ന വാഹനത്തിൽ രാഹുൽ നടത്തുന്ന പ്രകടനത്തിൽ ഒരു ലക്ഷത്തിലധികം കോണ്‍ഗ്രസ് പ്രവര്‍ത്തകര്‍ പങ്കെടുക്കും. ലാല്‍ഘട്ടില്‍ നിന്ന് ആരംഭിക്കുന്ന റോഡ് ഷോയിൽ ഹിന്ദു പുരോഹിതന്മാരില്‍ നിന്നും പെണ്‍കുട്ടികളില്‍ നിന്നും അനുഗ്രഹം വാങ്ങിയ ശേഷമാകും രാഹുല്‍ പുറപ്പെടുന്നത്.

1,500 പൊലീസുകാരെ സുരക്ഷയ്ക്കായി സ്ഥലത്ത് വിന്യസിപ്പിച്ചിരിക്കുന്നു. കര്‍ണ്ണാടക തെരഞ്ഞെടുപ്പ് പ്രചരണത്തിനിടെ രാഹുല്‍ഗാന്ധി സഞ്ചരിച്ചിരുന്ന വിമാനം അപകടത്തില്‍പ്പെട്ടിരുന്നു. ഇതിനെ തുടര്‍ന്നാണ് അദ്ദേഹം കൈലാസ്- മാനസരോവര്‍ സന്ദര്‍ശനം നടത്തിയത്. എന്നാല്‍, ചൈനീസ് ബന്ധമുള്ളതുകൊണ്ടാണ് രാഹുല്‍ കൈലാസ് യാത്ര നടത്തിയതെന്ന് ബിജെപി ആരോപണം ഉയർത്തിയിരുന്നു.