ശബരിമല തീർഥാടനത്തിന് ഓൺലൈൻ ബുക്കിങ്ങും വിര്ച്വല്-ക്യൂവും ; സന്നിധാനത്ത് 24 മണിക്കൂറിലേറെ തങ്ങാനാകില്ല.
മണ്ഡലമാസ പൂജക്ക് ശബരിമലനടതുറക്കുമ്പോൾ ശബരിമലയിൽ ഹൈ ടെക്ക് സംവിധാനങ്ങൾ. തീർഥാടകർക്കായി ഓൺലൈൻ ബുക്കിങ് തുടങ്ങി. കേരള പൊലീസിന്റെ sabarimalaq.com സൈറ്റിലാണ് ബുക്കിങ് സൗകര്യം ഉള്ളത്. ഒരു ബുക്കിങ്ങിലൂടെ പത്ത് പേർക്ക് നിലയ്ക്കൽ, പമ്പ കെഎസ്ആർടിസി ടിക്കറ്റടക്കം തീർഥാടനസൗകര്യം ലഭിക്കും . കെഎസ്ആർടിസിയുടെ keralartc.com എന്ന സൈറ്റ് വഴിയും ടിക്കറ്റ് ബുക്ക് ചെയ്യാം
തിരക്ക് വർധിക്കാനുള്ള സാഹചര്യം മുന്കൂട്ടി കണക്കിലെടുത്താണ് ഡിജിറ്റൽ ബുക്കിങ് സൗകര്യമേർപ്പെടുത്തിയിരിക്കുന്നത്. ശബരിമലയ്ക്ക് പോകേണ്ട തിയതിയും സമയവും നൽകിയാൽ നിലയ്ക്കലിൽ നിന്ന് പമ്പയിലേലേക്കുള്ള കെഎസ്ആർടിസി ടിക്കറ്റ് ലഭിക്കും. ടിക്കറ്റ് നിരക്ക് ഓൺലൈനായി അടയ്ക്കാം. ടിക്കറ്റ് പ്രിൻഡ്ഔട്ടുമായി വേണം നിലയ്ക്കലില് എത്താൻ. നിലയ്ക്കലിൽ നിന്ന് പമ്പ വഴി ശബരിമലയിലെത്തി, 48 മണിക്കൂറിനുള്ളിൽ തിരികെ നിലയ്ക്കലിലെത്തണം. സന്നിധാനത്ത് 24 മണിക്കൂറിലേറെ തങ്ങാൻ അനുവദിക്കില്ല
വിര്ച്വല്-ക്യൂ സംവിധാനംവഴി ബുക്ക്ചെയ്യുന്ന തീര്ഥാടകര്ക്ക് ക്യൂ നില്ക്കാതെതന്നെ പമ്പയില്നിന്ന് സന്നിധാനം- നടപ്പന്തല്വരെ എത്തുന്നതിന് പോലീസ് സംവിധാനം ഒരുക്കിയിട്ടുണ്ട്.
ശബരിമല വിര്ച്വല്-ക്യൂവില് രജിസ്റ്റര്ചെയ്യാന്തീര്ഥാടകരുടെ പേര്, വയസ്, ഫോട്ടോ, അഡ്രസ്, ഫോട്ടോ ഐഡന്റിറ്റി കാര്ഡ് നമ്പര് തുടങ്ങിയ വിവരങ്ങള് രേഖപ്പെടുത്തി രജിസ്റ്റര്ചെയ്യണം. വെബ് പോര്ട്ടലില് നല്കിയിരിക്കുന്ന കലണ്ടറില്നിന്ന് ലഭ്യതയനുസരിച്ച് ദര്ശനസമയവും തീയതിയും തിരഞ്ഞെടുക്കാം.
ബുക്കിങ് പൂര്ത്തിയാക്കിയശേഷം ദര്ശനസമയവും തീയതിയും തീര്ഥാടകന്റെ പേരും ഫോട്ടോയും മറ്റ് വിവരങ്ങളുമടങ്ങിയ വിര്ച്വല്-ക്യൂ കൂപ്പണ് കമ്പ്യൂട്ടറിലേക്ക് സേവ് ചെയ്ത് പ്രിന്റ് എടുക്കണം. ഈ കൂപ്പണ് ദര്ശനദിവസം പമ്പയിലെ വെരിഫിക്കേഷന് കൗണ്ടറില് കാണിച്ച് വിര്ച്വല്-ക്യൂ സംവിധാനം ഉപയോഗിക്കുന്നതിനുള്ള പ്രവേശന കാര്ഡ് കൈപ്പറ്റണം.
പ്രവേശന കാര്ഡ് കൈവശമുള്ളവര്ക്ക് മാത്രമേ വിര്ച്വല്-ക്യൂ സംവിധാനത്തിന്റെ പ്രയോജനം ലഭിക്കൂ. വിര്ച്വല്-ക്യൂ കൂപ്പണ് കൈവശമുള്ള തീര്ഥാടകര് തങ്ങളുടെ ഫോട്ടോ ഐഡന്റിറ്റി കാര്ഡ് വെരിഫിക്കേഷന് കൗണ്ടറില് കാണിക്കുന്നതിനായി കൈവശം കരുതണം. 18 വയസ്സിന് താഴെയുള്ളവര്ക്ക് ഫോട്ടോ ഐഡന്റിറ്റി കാര്ഡ് നിര്ബന്ധമില്ല. കൂപ്പണില് രേഖപ്പെടുത്തിയിരിക്കുന്ന ദിവസം കൃത്യസമയത്ത് പമ്പയിലെത്തുന്ന തീര്ഥാടകര്ക്ക് മാത്രമേ വിര്ച്വല്-ക്യൂ വഴി പ്രവേശനം അനുവദിക്കൂ.
https://www.facebook.com/Malayalivartha
