അഖണ്ഡഭാരതത്തിന്റെ അതികായനായ സര്ദാര് വല്ലഭായ് പട്ടേലിന്റെ പ്രതിമ ഇന്ന് രാജ്യത്തിനു പ്രധാനമന്ത്രി സമര്പ്പിക്കും
അഖണ്ഡഭാരതത്തിന്റെ അതികായനായ സര്ദാര് വല്ലഭായ് പട്ടേലിന്റെ പ്രതിമ ഇന്ന് രാജ്യത്തിനു പ്രധാനമന്ത്രി സമര്പ്പിക്കും. ഗുജറാത്തിലെ നര്മദയില് 182 മീറ്റര് ഉയരമുള്ള ഏകതാ പ്രതിമ സ്ഥാപിച്ചിട്ടുള്ളത്. അതേസമയം, നര്മദയിലെ കേവാഡിയില് വന്തോതില് ആദിവാസികളെ കുടിയൊഴിപ്പിച്ചാണ് 3000 കോടി രൂപ ചെലവിട്ട് ലോകത്തെ ഏറ്റവും വലിയ പ്രതിമ കേന്ദ്ര സര്ക്കാര് നിര്മിച്ചിരിക്കുന്നതെന്നു ചൂണ്ടിക്കാട്ടി ആദിവാസി, കര്ഷക പ്രക്ഷോഭങ്ങള് ശക്തമായി. പ്രതിമ അനാവരണം ചെയ്യുന്ന ഇന്ന് തങ്ങളുടെ 72 ഗ്രാമങ്ങളില് ഭക്ഷണം പാകം ചെയ്യില്ലെന്നും ദുഃഖാചരണം നടത്തുമെന്നും ഗോത്രവര്ഗ നേതാവ് ഡോ. പ്രഫുല് വാസവ പറഞ്ഞു.
നര്മദ സരോവര് ഡാം പദ്ധതിക്ക് നിരവധി പേരുടെ സ്ഥലമാണ് സര്ക്കാര് ഏറ്റെടുത്തത്. ഇപ്പോള് പ്രതിമ നിര്മാണത്തിനും പ്രദേശത്തെ ടൂറിസം വികസനത്തിനുമായി സര്ക്കാര് തങ്ങളുടെ സ്ഥലം കൈയേറി. പ്രധാനമന്ത്രി പ്രതിമ അനാവരണം ചെയ്യുമ്പോള് നര്മദ നദിയില് ജലസമാധി നടത്തുമെന്ന് കര്ഷകരും വ്യക്തമാക്കി. പ്രതിമ അനാവരണത്തില്നിന്ന് പ്രധാനമന്ത്രി പിന്മാറണമെന്ന് ആവശ്യപ്പെട്ട് 22 ഗ്രാമമുഖ്യന്മാര് മോദിക്ക് കത്തയച്ചിരുന്നു.
പരിസ്ഥിതി സാമൂഹിക പ്രവര്ത്തക മേധ പട്കര്, ദലിത് നേതാവും സ്വതന്ത്ര എം.എല്.എയുമായ ജിഗ്നേഷ് മേവാനി, പട്ടേല് നേതാവ് ഹാര്ദിക് പട്ടേല് തുടങ്ങിയവരും രംഗത്തുവന്നു. ഹാര്ദിക് പട്ടേല് ജുനഗഡില് ബുധനാഴ്ച ഉപവാസ സമരം പ്രഖ്യപിച്ചിട്ടുണ്ട്. യശ്വന്ത് സിന്ഹ, ശതുഘ്നന് സിന്ഹ എന്നിവര് സമരത്തില് പങ്കെടുക്കുമെന്നും ഹാര്ദിക് പട്ടേല് വ്യക്തമാക്കി.
f
https://www.facebook.com/Malayalivartha
