വിദേശത്തെ ജോലി: ഇന്ത്യക്കാര്ക്ക് ഓണ്ലൈന് രജിസ്ട്രേഷന് നിര്ബന്ധമാക്കി, അടുത്ത വര്ഷം ജനുവരി ഒന്നുമുതല് പ്രാബല്യത്തില്
ഗള്ഫ് അടക്കം 18 വിദേശ രാജ്യങ്ങളിലേക്ക് തൊഴില് തേടി പോകുന്നവര്ക്ക് ഇന്ത്യന് വിദേശകാര്യ മന്ത്രാലയം ഓണ്ലൈന് രജിസ്ട്രേഷന് നിര്ബന്ധമാക്കി. ഇമൈഗ്രേറ്റ് പോര്ട്ടലിലാണ് രജിസ്റ്റര് ചെയ്യേണ്ടത്. 2019 ജനുവരി ഒന്നുമുതലാണ് നിയമം കര്ശനമായി നടപ്പാക്കുന്നത്. ഇതോടെ ഓണ്ലൈന് രജിസ്ട്രേഷന് നടത്താത്തവര്ക്ക് അടുത്ത വര്ഷമാദ്യം മുതല് ഈ രാജ്യങ്ങളിലേക്ക് ജോലിക്ക് പോകാന് കഴിയില്ല.
നിലവില് ഈ രാജ്യങ്ങളിലേക്ക് പോകുന്ന, പത്താം ക്ലാസിന് താഴെ വിദ്യാഭ്യാസമുള്ള ഇ.സി.ആര് വിഭാഗത്തില് പെട്ട തൊഴിലാളികള്ക്ക് ഇമൈഗ്രേറ്റ് പോര്ട്ടലില് രജിസ്ട്രേഷന് നിര്ബന്ധമാണ്. ആദായ നികുതി അടക്കുന്നവരോ അല്ലെങ്കില് പത്താം ക്ലാസും അതിന് മുകളിലും വിദ്യാഭ്യാസമെങ്കിലും ഉള്ള ഇ.സി.എന്.ആര് അല്ലെങ്കില് നോണ് ഇ.സി.എന്.ആര് വിഭാഗത്തില് ഉള്ളവരും നിര്ബന്ധമായും ഓണ്ലൈനില് രജിസ്റ്റര് ചെയ്യണമെന്ന് കാട്ടി കഴിഞ്ഞ 14-നാണ് കേന്ദ്ര സര്ക്കാര് ഉത്തരവിറക്കിയത്.ഇതോടെ എല്ലാ വിഭാഗം തൊഴിലാളികളും ഓണ്ലൈന് രജിസ്ട്രേഷന്റെ പരിധിയില് ഉള്പ്പെട്ടിരിക്കുകയാണ്.
ഇ.സി.എന്.ആറുകാര്ക്ക് 2017 ഡിസംബര് മുതല് രജിസ്ട്രേഷന് നിലവിലുണ്ടെങ്കിലും ഇതുവരെ കര്ക്കശമായി നടപ്പാക്കിയിരുന്നില്ല. പരീക്ഷണാടിസ്ഥാനത്തിലുള്ള പദ്ധതി, വിജയമാണെന്ന് കണ്ടതിന്റെ അടിസ്ഥാനത്തിലാണ് നിര്ബന്ധമാക്കാന് തീരുമാനിച്ചതെന്ന് അധികൃതര് അറിയിച്ചു.അഫ്ഗാനിസ്താന്, ബഹ്റൈന്, ഇന്തോനേഷ്യ, ഇറാഖ്, ജോര്ഡന്, കുവൈത്ത്, ലബനന്, ലിബിയ, മലേഷ്യ, ഒമാന്, ഖത്തര്, സൗദി അറേബ്യ, സുഡാന്, സൗത്ത് സുഡാന്, സിറിയ, തായ്ലന്ഡ്, യു.എ.ഇ, യമന് എന്നീ രാജ്യങ്ങളിലേക്ക് തൊഴില് വിസയില് പോകുന്നവരാണ് വിദേശകാര്യമന്ത്രാലയത്തിന്റെ www.emigrate.gov.in എന്ന വെബ്സൈറ്റില് രജിസ്റ്റര് ചെയ്യേണ്ടത്.
വിവരങ്ങള് നല്കുന്നതിനായി വെബ്സൈറ്റിലെ ഇ.സി.എന്.ആര് രജിസ്ട്രേഷന് എന്ന ലിങ്കില് ക്ലിക്ക് ചെയ്യണം. യാത്ര പുറപ്പെടുന്നതിന് 24 മണിക്കൂര് മുമ്പെങ്കിലും രജിസ്ട്രേഷന് നടത്തിയിരിക്കണമെന്നാണ് വിദേശകാര്യ മന്ത്രാലയം പുറത്തിറക്കിയ അറിയിപ്പിലുള്ളത്. എന്നാല്, സന്ദര്ശക വിസ, കുടുംബ വിസ തുടങ്ങിയവയില് യാത്ര ചെയ്യുന്നവര്ക്ക് ഇത് ബാധകമല്ല. രജിസ്ട്രേഷന് വിജയകരമായി പൂര്ത്തീകരിച്ചാല് എസ്.എം.എസ് വഴിയും ഇമെയില് വഴിയും സന്ദേശം ലഭിക്കും. കൂടുതല് വിവരങ്ങള്ക്ക്: 1800113090 (ടോള് ഫ്രീ), 01140503090. ഇമെയില് helpline@mea.gov.in
പത്താം ക്ലാസ് വിദ്യാഭ്യാസം പൂര്ത്തിയാക്കാത്ത, ഇ.സി.ആര് വിഭാഗത്തില് ഉള്പ്പെടാത്തവര്ക്ക് വിദേശത്ത് ജോലിക്ക് പോകാന് എമിഗ്രേഷന് ക്ലിയറന്സ് ആവശ്യമാണ്. ഈ വിഭാഗത്തിലുള്ളവര്ക്ക് 2015-ല് ഇ മൈഗ്രേറ്റ് പോര്ട്ടല് വഴി രജിസ്ട്രേഷന് നിര്ബന്ധമാക്കിയത് നിരവധി ആശയക്കുഴപ്പങ്ങളുണ്ടാക്കിയിരുന്നു. അതത് രാജ്യങ്ങളിലെ ഇന്ത്യന് എംബസി വഴിയാണ് ഇപ്പോള് ഈ പ്രക്രിയ നടപ്പാക്കുന്നത്. വെബ്സൈറ്റ് ജാം അടക്കമുള്ള നിരവധി പ്രയാസങ്ങള് ആരംഭത്തിലുണ്ടായിരുന്നു.പുതിയ നിയമത്തിലും ചില ആശയക്കുഴപ്പങ്ങള് നിലവിലുണ്ട്. നിലവില് ഗള്ഫില് ജോലി ചെയ്യുന്നവര്ക്ക് രജിസ്ട്രേഷന് ആവശ്യമുണ്ടോ എന്നത് വ്യക്തമല്ല.
https://www.facebook.com/Malayalivartha
