തൊഴില്‍ വിസയില്‍ വിദേശ രാജ്യങ്ങളിൽ പോകുന്ന ഇന്ത്യക്കാർക്ക് ഓൺലൈൻ രജിസ്ട്രേഷൻ നിർബന്ധമാക്കി കേന്ദ്ര ആഭ്യന്തര മന്ത്രാലയം. ജിസിസി ഉൾപ്പെടെ18 വിദേശ രാജ്യങ്ങളിൽ ജോലി ചെയ്യുന്നവരും പുതിയ വീസയിൽ വരാൻ ഉദ്ദേശിക്കുന്നവരുമായ ഇന്ത്യക്കാർ ഓൺലൈൻ റജിസ്ട്രേഷൻ ചെയ്തിരിക്കണമെന്നാണ് പുതിയ നിർദ്ദേശം. 2019 ജനുവരി ഒന്നു മുതൽ പുതിയ നിയമം പ്രാബല്യത്തിലാകും.

യാത്രയ്ക്ക് 24 മണിക്കൂർ മുൻപെങ്കിലും ഇന്ത്യാ ഗവൺമെന്റിന്റെ ഇ-മെഗ്രേറ്റ് പോർട്ടലിൽ റജിസ്റ്റർ ചെയ്തിരിക്കണമെന്നാണ് നിബന്ധന. എമിഗ്രേഷൻ ക്ലിയറൻസ് ആവശ്യമില്ലാത്ത ഇസിഎൻആർ പാസ്പോർട്ടുള്ളവർക്കാണ് നിയമം ബാധകമാവുക. റജിസ്റ്റർ ചെയ്യാത്തവർക്ക് ജനുവരി ഒന്നു മുതൽ ഇന്ത്യയിൽനിന്ന് വിദേശത്തേക്ക് തൊഴിൽ വീസയിൽ യാത്രാനുമതി നൽകില്ല. വിദേശത്തുള്ള ഇന്ത്യക്കാരുടെ ക്ഷേമവും അവകാശങ്ങളും ഉറപ്പുവരുത്താന്‍ ലക്ഷ്യമിട്ടാണ് രജിസ്ട്രേഷന്‍ നിര്‍ബന്ധമാക്കുന്നതെന്ന് വിദേശകാര്യ മന്ത്രാലയം പുറത്തിറക്കിയ അറിയിപ്പില്‍ പറയുന്നു.

ഗള്‍ഫ് രാജ്യങ്ങള്‍ ഉള്‍പ്പെടെ 18 രാജ്യങ്ങളിലേക്ക് പോകുന്നവരാണ് കേന്ദ്ര വിദേശകാര്യ മന്ത്രാലയത്തിന്റെ ഇ-മൈഗ്രേറ്റ് വെബ്സൈറ്റില്‍ രജിസ്റ്റര്‍ ചെയ്യേണ്ടത്. യുഎഇ, സൗദി അറേബ്യ, ഒമാൻ, കുവൈത്ത്, ബഹ്റൈൻ, ഖത്തർ, അഫ്ഗാനിസ്ഥാൻ, മലേഷ്യ, ലബനൻ, ഇറാഖ്, ജോർദാൻ, തായ്‌ലൻഡ്, യെമൻ, ലിബിയ, ഇന്തൊനീഷ്യ, സുഡാൻ, സൗത്ത് സുഡാൻ, സിറിയ എന്നീ രാജ്യങ്ങളിലേക്ക് തൊഴിൽ വീസയിൽ പോകുന്ന ഇസിഎൻആർ പാസ്പോർട്ടുള്ളവരാണ് ഇ-മൈഗ്രേറ്റ് പോർട്ടലിൽ റജിസ്റ്റർ ചെയ്യേണ്ടത്.

ഇ-മൈഗ്രേറ്റ് വെബ്സൈറ്റിലെ { www.emigrate.gov.in } ECNR Registration എന്ന ലിങ്കില്‍ ക്ലിക്ക് ചെയ്താണ് വിവരങ്ങള്‍ നല്‍കേണ്ടത്. വിജയികരമായി ഇത് പൂര്‍ത്തീകരിച്ചാല്‍ എസ്.എം.എസ് വഴിയും ഇ-മെയില്‍ വഴിയും സന്ദേശം ലഭിക്കും. കൂടുതല്‍ വിവരങ്ങള്‍ക്കായി 1800113090 (ടോള്‍ ഫ്രീ), 01140503090 എന്നീ നമ്പറുകളില്‍ ബന്ധപ്പെടാം. ഇ-മെയില്‍ helpline@mea.gov.in

നിലവിൽ വിദേശ രാജ്യങ്ങളിൽ ജോലി ചെയ്യുന്നവർ നാട്ടിൽ പോയി തിരിച്ചുവരുന്നതിന് മുൻപ് റജിസ്റ്റർ ചെയ്താലേ യാത്രാനുമതി നൽകൂവെന്ന് എംബസിയും കോൺസുലേറ്റും വ്യക്തമാക്കി. റജിസ്റ്റർ ചെയ്തവർക്ക് എസ്എംഎസ് ആയോ ഇമെയിൽ വഴിയോ ലഭിക്കുന്ന അറിയിപ്പ് വിമാനത്താവളത്തിൽ കാണിച്ചാൽ മാത്രമേ യാത്രാനുമതി ലഭിക്കൂ.

എന്നാൽ എമിഗ്രേഷൻ ക്ലിയറൻസ് ആവശ്യമുള്ള ഇസിആർ പാസ്പോർട്ടുള്ളവർക്ക് ഈ റജിസ്ട്രേഷൻ വേണ്ട. ഇത്തരക്കാരുടെ തൊഴിൽ സുരക്ഷ ഉറപ്പുവരുത്താനായി 2015 മുതലാണ് ഇ-മൈഗ്രേറ്റ് പോർട്ടൽ ആരംഭിച്ചത്. ഈ പോർട്ടൽ വഴിയാണ് ഇസിആർ പാസ്പോർട്ടുകാരെ റിക്രൂട്ട് ചെയ്യുന്നത്. തൊഴിൽസുരക്ഷ എല്ലാ വിഭാഗങ്ങളിലേക്കും വ്യാപിപ്പിക്കുന്നതിന്റെ ഭാഗമായാണ് ഇസിഎൻആർ പാസ്പോർട്ടുള്ളവരെയും ഇ-മൈഗ്രേറ്റ് പോർട്ടലിനുകീഴിൽ കൊണ്ടുവരുന്നതെന്നും മന്ത്രാലയം വിശദീകരിക്കുന്നു.

അവിദഗ്ധ തൊഴിലാളികളുടെ സംരക്ഷണം ലഭ്യമിട്ട് 2015ൽ തുടങ്ങിയ ഇ-മൈഗ്രേറ്റ് പോർട്ടലിൽ 40,000 വിദേശ കമ്പനികൾ റജിസ്റ്റർ ചെയ്തിട്ടുണ്ട്. ഇതുവഴി രണ്ടു ലക്ഷത്തിലേറെ ഇന്ത്യക്കാർ യുഎഇയിലെത്തിയതായി ഇന്ത്യൻ എംബസിയും അറിയിച്ചു.