മോഷണക്കുറ്റം ആരോപിച്ച് കസ്റ്റഡിയിലെടുത്ത യുവാവ് മരിച്ച സംഭവത്തില് ആഗ്രയിലെ സിക്കന്ദാര സ്റ്റേഷനിലെ മുഴുവന് പൊലീസുകാര്ക്കെതിരെയും കൊലപാതക കുറ്റം ചുമത്തി കേസെടുത്തു
മോഷണക്കുറ്റം ആരോപിച്ച് കസ്റ്റഡിയിലെടുത്ത യുവാവ് മരിച്ച സംഭവത്തില് ആഗ്രയിലെ സിക്കന്ദാര സ്റ്റേഷനിലെ മുഴുവന് പൊലീസുകാര്ക്കെതിരെയും കൊലപാതക കുറ്റം ചുമത്തി കേസ് രജിസ്റ്റര് ചെയ്തു. അയല്വീട്ടില് നിന്നും ആഭരണങ്ങള് മോഷണം പോയ കേസില് കസ്റ്റഡിയിലെടുത്ത ഹേമന്ദ് കുമാര് എന്ന 32കാരനാണ് പൊലീസ് മര്ദനത്തെ തുടര്ന്ന് കൊല്ലപ്പെട്ടത്.
കസ്റ്റഡി മരണത്തിന് ഉത്തരവാദികളായ സ്റ്റേഷന് ഇന്സ്പെക്ടറെയും രണ്ട് സബ് ഇന്സ്പെക്ടര്മാരെയും സസ്പെന്ഡ് ചെയ്തിട്ടുണ്ട്. ഹേമന്ദ് കുമാറും മാതാവ് റീനു കുമാറും വാടകക്ക് താമസിക്കുന്നതിന് സമീപമുള്ള വീട്ടില് നിന്ന് ഏഴു ലക്ഷം രൂപയുടെ ആഭരണങ്ങള് കളവുപോയിരുന്നു. ഹേമന്ദിനെ സംശയമുണ്ടെന്ന അയല്വാസിയുടെ പരാതി പ്രകാരം പൊലീസ് ഇയാളെ കസ്റ്റഡിയിലെടുക്കുകയായിരുന്നു. സ്റ്റേഷനിലെത്തിച്ച ഇയാളെ മാതാവിന്റെ മുന്നില് വെച്ച് പൊലീസുകാര് ലാത്തികൊണ്ട് മര്ദിച്ചു. വൈകിട്ട് ആറു മണിക്ക് റീനു കുമാറിനെ വീട്ടിലേക്ക് മടക്കിവിട്ടു.
എന്നാല് ഒമ്പതുമണിയോടെ മകന് മരിച്ചതായി പൊലീസ് അറിയിക്കുകയായിരുന്നു. ഹേമന്ദ് കുമാര് മാനസിക വെല്ലുവിളി നേരിടുന്ന വ്യക്തിയാണെന്ന് റീനു പറഞ്ഞുവെങ്കിലും പൊലീസ് ക്രൂരമര്ദത്തിന് ഇരയാക്കുകയായിരുന്നു. ഹൃദയാഘാതവും തോളിലും കൈകാലുകളിലേറ്റ പരിക്കേറ്റുമാണ് മരണകാരണമെന്നാണ് പോസ്റ്റ്മോര്ട്ടം റിപ്പോര്ട്ടില് പറയുന്നത്.
ഹേമന്ദ് കുമാറിനെ പൊലീസിന് കൈമാറുന്നതിന് മുമ്പ് അയല്വീട്ടുകാര് മര്ദിച്ചിരുന്നുവെന്നും ഇവര്ക്കെതിരെ കേസെടുത്തതായും പൊലീസ് സൂപ്രണ്ട് അമിത് പതക് അറിയിച്ചു
"
https://www.facebook.com/Malayalivartha
