ശബരിമല വിഷയത്തിൽ ഏറെ കോളിളക്കത്തെ സൃഷ്ടിച്ച തൃപ്തി ദേശായി വീണ്ടും സമൂഹ മാധ്യമങ്ങളിൽ ചർച്ചാവിഷയമാവുകയാണ്. പാരഡി അക്കൗണ്ടായ ലൈംസ് ഓഫ് ഇന്ത്യയില്‍ പ്രത്യക്ഷപ്പെട്ട ഒരു പോസ്റ്റാണ് സംഭവങ്ങളുടെ തുടക്കം. എന്തുവില കൊടുത്തും സെന്റിനൽ ദ്വീപിലേക്ക് പോകുമെന്ന് തൃപ്തി പറയുന്നതായാണ് പോസ്റ്റ്. നിരവധി പേർ പോസ്റ്റ് ഷെയർ ചെയ്യുകയും നിമിഷങ്ങൾക്കുള്ളിൽ #Thruptidesai ട്വിറ്റർ ട്രെന്‍‍ഡിങ്ങ് ലിസ്റ്റിൽ ഒന്നാമതെത്തുകയുമായിരുന്നു.

ആന്‍ഡമാന്‍ ദ്വീപ് സമൂഹത്തില്‍ പെട്ട നോര്‍ത്ത് സെന്റിനല്‍ ദ്വീപിലേക്ക് കടക്കാന്‍ ശ്രമിക്കുന്നതിനിടെ അമേരിക്കന്‍ സുവിശേഷകന്‍ ജോണ്‍ അലന്‍ ചൗ കൊല്ലപ്പെട്ടതോടെയാണ് സെന്റിനൽ ദ്വീപിനെക്കുറിച്ചുള്ള വിശേഷങ്ങൾ സോഷ്യൽ മീഡിയ ചികയാൻ തുടങ്ങിയത്. ഇതിനു പിന്നാലെയായിരുന്നു തൃപ്തിയെയും സമൂഹ മാധ്യമത്തിലൂടെ ട്രോളിയത്.

അതേസമയം, സംഭവം സത്യമാണെന്ന് കരുതി പിന്നാലെ തൃപ്‌തിക്ക് ഉപദേശവുമായി നിരവധി പേര്‍ രംഗത്തെത്തി. സെന്റിനൽ ദ്വീപിലേക്ക് ആർക്കും പോകാനാവില്ലെന്ന് ആരെങ്കിലുമൊന്ന് തൃപ്തിക്ക് പറഞ്ഞുകൊടുക്കൂ എന്ന് ഒരാൾ. തൃപിതി ദേശായി ആധുനിക ഇന്ത്യയിലെ വിപ്ലവകാരിയായ ഒരു ഫെമിനിനിസ്റ്റ് ആണ്, അതുകൊണ്ട് അവരോട് സെന്റിനൽ ദ്വീപിലേക്ക് പോകാന്‍ അഭ്യർത്ഥിക്കുന്നു, ഫുൾ ചെലവും ഞാൻ വഹിക്കുമെന്ന് മറ്റൊരാൾ. ഐസിസ് സ്വാധീനമേഖലകളിലേക്ക് കടന്നുചെല്ലൂ എന്നും ചിലർ വെല്ലുവിളിക്കുന്നു. തൃപ്തിയെ സഹായിച്ചില്ലെങ്കിൽ പിന്നെ വേറാരെ സഹായിക്കുമെന്നും ചിലർ ചോദിക്കുന്നു.

സെന്റിനല്‍ ദ്വീപില്‍ സ്ത്രീകള്‍ക്ക് പ്രവേശമനമില്ലാത്ത ഒരു അമ്പലം ഉണ്ടെന്നും അങ്ങോട്ട് പോകാനുമാണ് തൃപ്‌തിയോട് മറ്റ് ചിലര്‍ ഉപദേശിക്കുന്നത്. അതേസമയം ഇക്കാര്യത്തില്‍ തൃപ്‌തി ഇതുവരെ പ്രതികരിച്ചിട്ടില്ല.

സെന്റിനൽ ദ്വീപിലെ ഗോത്രവര്‍ഗക്കാര്‍ കൊലപ്പെടുത്തിയ യുഎസ് പൗരൻ അലന്റെ മൃതദേഹം ഇപ്പോഴും ദ്വീപില്‍ തന്നെയാണ് ഉളളത്. മത്സ്യത്തൊഴിലാളികള്‍ക്ക് 25000 രൂപ നൽകി, അവരുടെ സഹായത്തോടെയാണ് അലൻ ദ്വീപിലെത്തിയത്. അലനെ ഗോത്രവർഗ്ഗക്കാർ അമ്പെയ്യുന്നതും മൃതദേഹം വലിച്ചുകൊണ്ടുപോയി കുഴിച്ചുമൂടുന്നതും കണ്ടത് ഇതേ മത്സ്യത്തൊഴിലാളികൾ തന്നെയാണ്.

പുറംലോകവുമായി ബന്ധമില്ലാത്ത ഗോത്രവർഗ്ഗക്കാരാണ് സെന്റിനൽ ദ്വീപിലേത്. ആദ്യതവണയെത്തിയപ്പോൾ അലനെ കണ്ട ഗോത്രവർഗ്ഗക്കാരിൽ ഒരാൾ അമ്പെയ്തിരുന്നു. അലന്റെ ബൈബിളിലാണ് അമ്പ് കൊണ്ടത്. അന്ന് മടങ്ങിയ അലൻ വീണ്ടും ദ്വീപിലേക്ക് മടങ്ങിച്ചെല്ലാൻ‌ തീരുമാനിക്കുകയായിരുന്നു.