തനിക്കെതിരെ ഉന്നത ഉദ്യോഗസ്ഥരോട് വാക്കി ടോക്കിയിലൂടെ പരാതി അറിയിച്ച കോണ്സ്റ്റബിളിനെ, എസ് ഐ പൊതുനിരത്തില് വച്ച് ആക്രമിച്ചു, ദൃശ്യങ്ങള് പ്രചരിച്ചതോടെ ട്രാഫിക് എസ്ഐ-യെ റിസര്വ് പൊലീസിലേക്കു മാറ്റി
അമ്മയുടെ മരണാനന്തര ചടങ്ങുകള്ക്ക് അവധി നിഷേധിച്ചതിനെ കുറിച്ച് വോക്കി ടോക്കിയിലൂടെ പരാതി പറഞ്ഞ പൊലീസ് കോണ്സ്റ്റബിളിനെ ഇരുചക്ര വാഹനത്തില് നിന്നു തള്ളി വീഴ്ത്തിയ ട്രാഫിക് എസ്ഐ-യുടെ അതിക്രമം സിസിടിവിയില് പതിഞ്ഞു. ചെന്നൈയിലെ തേനാംപെട്ട് സിവിരാമന് റോഡില് നടന്ന സംഭവത്തില് വീഴ്ചയില് പരുക്കേറ്റ പൊലീസ് കോണ്സ്റ്റബിള് ധര്മന് ചികില്സയിലാണ്.
സംഭവത്തിന്റെ വിഡിയോ ദൃശ്യങ്ങള് സമൂഹമാധ്യമങ്ങളില് പ്രചരിച്ചതോടെ ട്രാഫിക് എസ്ഐ രവിചന്ദ്രനെ റിസര്വ് പൊലീസിലേക്കു മാറ്റി. സംഭത്തെക്കുറിച്ച് അന്വേഷണം നടത്താന് സിറ്റി പൊലീസ് കമ്മിഷണര് എ.കെ.വിശ്വനാഥന് നിര്ദേശം നല്കുകയും ചെയ്തിട്ടുണ്ട്. ഇതിനിടെ സംഭവത്തില് പരാതി നല്കാനെത്തിയ ധര്മന്റെ ഭാര്യ അഭിരാമിയെ നാലു മണിക്കൂറോളം സ്റ്റേഷനില് കാത്തു നിര്ത്തിയതായും പരാതിയുണ്ട്. സംഭവ സ്ഥലത്തിനു സമീപമുള്ള കടയിലെ സിസിടിവി ദൃശ്യങ്ങളാണു പ്രചരിക്കുന്നത്.
കഴിഞ്ഞ 21-നാണ് സംഭവം. ബൈക്കില് വന്ന ധര്മനെ രവിചന്ദ്രന് തള്ളിയിടുന്നത് വിഡിയോയില് വ്യക്തമാണ്. നിയന്ത്രണം തെറ്റി തെറിച്ചു വീണ ധര്മന് തലനാരിഴയ്ക്കാണ് എതിരെ വന്ന മിനിലോറിയുടെ അടിയില് നിന്നു രക്ഷപ്പെട്ടത്. തുടര്ന്നു നിര്ത്തിയിട്ട ജീപ്പിന് സമീപത്തേക്കു കൊണ്ടുവന്നതിനു ശേഷം മറ്റു പൊലീസുകാരുടെ സഹായത്തോടെ ധര്മന്റെ വായിലേക്കു ദ്രാവകം ഒഴിച്ചു കൊടുക്കുന്നതും വ്യക്തമാണ്.
ധര്മനെ ആശുപത്രിയില് പ്രവേശിപ്പിച്ച ശേഷം മദ്യപിച്ചു വാഹനമോടിച്ചു എന്നു രവിചന്ദ്രന് എഴുതി വാങ്ങിയതായി ധര്മന്റെ ഭാര്യ പരാതിപ്പെട്ടിട്ടുള്ളതില് നിന്നും, ധര്മന് മദ്യപിച്ചു വാഹനമോടിച്ച് അപകടമുണ്ടാക്കിയെന്നു വരുത്തി തീര്ക്കാന് ചെയ്തതാണിതെന്നു സംശയമുണ്ട്.
വോക്കി ടോക്കിയില് പരാതി പറഞ്ഞതിനും, മദ്യപിച്ചു വാഹനമോടിച്ച് അപകടമുണ്ടാക്കിയതിനും ധര്മനെ ഇതേ ദിവസം സസ്പെന്ഡ് ചെയ്യുകയും ചെയ്തിരുന്നു. സിസിടിവി ദൃശ്യങ്ങള് പുറത്തുവന്നതോടെയാണു യഥാര്ഥ സംഭവം പുറത്തായത്.
കഴിഞ്ഞ 6-ന് അമ്മയുടെ മരണത്തെ തുടര്ന്ന് ധര്മന് ഒരാഴ്ച അവധിയെടുത്തിരുന്നു. തുടര്ന്നു 21-ന് അമ്മയുടെ മരണാനന്തര ചടങ്ങുകള്ക്കായി ധര്മന് വീണ്ടും അവധി ചോദിച്ചു. എന്നാല് രവിചന്ദ്രന് അവധി നല്കിയില്ല. അമ്മയുടെ ശേഷക്രിയ ചെയ്യാന്പോലും അവധി നല്കുന്നില്ലെന്നു ധര്മന് വോക്കി ടോക്കിയിലൂടെ പരാതി പറഞ്ഞു. ഇതോടെ സംഭവം ഉന്നത ഉദ്യോഗസ്ഥര് അടക്കമുള്ളവരുടെ ശ്രദ്ധയില്പെട്ടു. ഇതാണ് രവിചന്ദ്രനെ ചൊടിപ്പിച്ചത്.
ധര്മന് മദ്യലഹരിയിലാണു വോക്കി ടോക്കിയില് സംസാരിച്ചതെന്നാണ് ഉന്നതരുടെ ചോദ്യത്തിന് രവിചന്ദ്രന് മറുപടി നല്കിയത്. ഇത് തെളിയിക്കുന്നതിനു വാഹനം തടഞ്ഞു നിര്ത്തി വായില് മദ്യമൊഴിച്ചു കസ്റ്റഡിയിലെടുക്കാനുള്ള ശ്രമമാണു സിസിടിവി ദൃശ്യങ്ങള് പുറത്തുവന്നതോടെ പാളിയത്.
കോണ്സ്റ്റബിളിനെ സസ്പെന്ഡ് ചെയ്യുകയും, ദൃശ്യങ്ങള് പുറത്തായിട്ടും ക്രൂരത കാട്ടിയ എസ്ഐയ്ക്കെതിരെ നടപടി സ്വീകരിക്കാതിരിക്കുകയും ചെയ്യുന്നതിനെതിരെ സമൂഹമാധ്യമങ്ങളില് വിമര്ശനം ഉയരുന്നുണ്ട്. പൊലീസുകാര്ക്ക് ആഴ്ചയില് ഒരു ദിവസം നിര്ബന്ധമായി അവധി നല്കണമെന്നും, ജോലി സമ്മര്ദം കുറയ്ക്കാന് നടപടി സ്വീകരിക്കണമെന്നും മദ്രാസ് ഹൈക്കോടതി നേരത്തെ സര്ക്കാരിനു നിര്ദേശം നല്കിയിരുന്നു.
ജോലി സമ്മര്ദം ഉയര്ന്നതിനെ തുടര്ന്നു പൊലീസുകാര് തന്നെ പ്രതിഷേധിക്കാന് ആരംഭിച്ചതോടെയാണിത്. മാസങ്ങള്ക്കു മുന്പ് മേലുദ്യോഗസ്ഥന് മാനസികമായി പീഡിപ്പിക്കുന്നെന്ന് ആരോപിച്ചു മറീനയിലെ ഡിജിപി ഓഫിസിനു മുന്നില് പൊലീസുകാരന് തീകൊളുത്തി ജീവനൊടുക്കാന് ശ്രമിച്ചതും വാര്ത്തയായിരുന്നു.
https://www.facebook.com/Malayalivartha
