അയോധ്യാവിഷയത്തില്‍ പ്രധാനമന്ത്രി നരേന്ദ്ര മോദി നടത്തിയ പ്രസ്താവന കോടതിയലക്ഷ്മെന്ന് മുതിര്‍ന്ന കോണ്‍ഗ്രസ് നേതാവ് കപില്‍ സിബല്‍. കോണ്‍ഗ്രസിന്‍റേത് കേസ് വൈകിപ്പിക്കാനുള്ള ശ്രമമാണെന്ന മോദിയുടെ ആരോപണം ലജ്ജാവഹമാണെന്നും അദ്ദേഹം പറഞ്ഞു. സുപ്രീം കോടതിയെ പ്രധാനമന്ത്രി അപകീര്‍ത്തിപ്പെടുത്തുകയാണെന്നും പ്രസ്താവന സുപ്രീം കോടതിക്കു അപമാനകരവുമെന്നും അദ്ദേഹം വ്യക്തമാക്കി.

ഏതെങ്കിലും വിധത്തിലുള്ള രാഷ്ട്രീയ സമ്മര്‍ദത്തിന് കോടതി അടിമപ്പെടുമെന്നാണോ പ്രധാനമന്ത്രി പറയാന്‍ ശ്രമിക്കുന്നതെന്ന് കപില്‍ സിബല്‍ ചോദിച്ചു. സുപ്രീം കോടതിയെ അപകീര്‍ത്തിപ്പെടുത്തുന്ന ആരോപണമാണ് പ്രധാനമന്ത്രിയുടേത്. ഇത്തരത്തിലൊരു പ്രസ്താവന രാജ്യം ഭരിക്കുന്നവരില്‍ നിന്നും ഉണ്ടാകാന്‍ പാടില്ല.

മോദിക്ക് വസ്തുതകള്‍ അറിയില്ല. കോണ്‍ഗ്രസ് അയോധ്യാക്കേസില്‍ കക്ഷിയല്ല. 2018 ജനുവരി മുതല്‍ താന്‍ അയോധ്യാക്കേസില്‍ ഹാജരാകുന്നത് അവസാനിപ്പിച്ചു. പലപ്പോഴും പ്രധാനമന്ത്രി കാര്യങ്ങള്‍ അറിയാതെയാണ് സംസാരിക്കുന്നതെന്നും കപില്‍ സിബല്‍ ആരോപിച്ചു.

മോദി 2014, 2015, 2016, 2017 വര്‍ഷങ്ങളില്‍ രാമക്ഷേത്രത്തെ ഓര്‍ത്തില്ലെന്നും എന്നാല്‍ 2018 ല്‍ ഓര്‍മിച്ചെന്നും പറഞ്ഞ സിബല്‍ തെരഞ്ഞെടുപ്പാണ് അദ്ദേഹത്തെ രാമക്ഷേത്രത്തെക്കുറിച്ച് ഓര്‍മ്മപ്പെടുത്തിയതെന്നും കൂട്ടിച്ചേര്‍ത്തു.

ആരാണ് ഭയപ്പെടുത്താന്‍ ശ്രമിക്കുന്നത് എന്താണ് വി.എച്ച്.പി അയോധ്യയില്‍ ചെയ്യുന്നത് പ്രധാനമന്ത്രിയുടെ രാഷ്ട്രീയ ലാഭത്തിനുവേണ്ടി അയോധ്യയില്‍ അവര്‍ ഭയത്തിന്റെ അന്തരീക്ഷം സൃഷ്ടിക്കുകയാണെന്നും കപില്‍ സിബല്‍ ചൂണ്ടിക്കാട്ടി.

സുപ്രീംകോടതിയെ സമ്മര്‍ദത്തിലാക്കി അയോധ്യകേസിലെ വിധി വൈകിപ്പിക്കാനും അതിലൂടെ രാഷ്ട്രീയനേട്ടങ്ങളുണ്ടാക്കാനും കോണ്‍ഗ്രസ് ശ്രമിച്ചുവെന്നായിരുന്നു പ്രധാനമന്ത്രി നരേന്ദ്ര മോദി കഴിഞ്ഞി ദിവസം പ്രസംഗിച്ചത്.

രാമക്ഷേത്ര രാഷ്ട്രീയം ആളിക്കത്തിച്ച് വിശ്വഹിന്ദു പരിഷത്തിന്റെയും ശിവസേനയുടെയും സമ്മര്‍ദപരിപാടികള്‍ അയോധ്യയില്‍ നടക്കുന്നതിനിടെയാണ് മോദിയുടെ പരാമര്‍ശം.