തെലുങ്കാനയിലെ യാദാദ്രിഭുവനാഗിരി ജില്ലയില്‍ വ്യോമസേന പരിശീലന വിമാനം തകര്‍ന്നുവീണു. പൈലറ്റ് പരിക്കുകളോടെ രക്ഷപ്പെട്ടു. ഹകിംപേട്ടയിലെ വ്യോമതാവളത്തില്‍ നിന്നു പറന്നുയര്‍ന്ന കിരണ്‍ എയര്‍ ക്രാഫ്റ്റാണ് അപകടത്തില്‍പ്പെട്ടത്. ഇന്നലെ രാവിലെ 11.45നാണ് അപകടം സംഭവിച്ചത്. ബാഹുപേട്ടയിലെ തരിശുപാടത്ത് വിമാനം തകര്‍ന്നുവീഴുകയായിരുന്നു. വിമാനത്തിനുണ്ടായ സാങ്കേതിക തകരാറാണ് അപകടകാരണമെന്നാണു പ്രാഥമിക നിഗമനം.

നവംബര്‍ 21ന് രാജീവ്ഗാന്ധി വ്യോമ അക്കാഡമിയില്‍ നിന്നുള്ള പരിശീലന വിമാനം മോകിലയിലെ ഒരു പാടത്ത് തകര്‍ന്നു വീണ് പൈലറ്റിനു പരിക്കേറ്റിരുന്നു. കഴിഞ്ഞവര്‍ഷം നവംബറിലും ഒരു വിമാനം പരിശീലനപ്പറക്കലിനിടെ തകര്‍ന്നു വീണിരുന്നു.