എയര്‍വേസ് പൈലറ്റുമാരുടെ അവധിയെ തുടര്‍ന്ന് ജെറ്റ് എയര്‍വേസ് 14 വിമാന സര്‍വീസുകള്‍ റദ്ദാക്കി. ഞായറാഴ്ച നിരവധി പൈലറ്റുമാര്‍ രോഗാവധിയിലായതോടെ 14 വിമാനങ്ങള്‍ കമ്പനി റദ്ദാക്കിയത്. ഇന്ത്യയിലെ ഏറ്റവും വലിയ വിമാന സര്‍വീസായ ജെറ്റ് എയര്‍വേസ് സാമ്പത്തിക പ്രതിസന്ധി നേരിട്ടുകൊണ്ടിരിക്കയാണ്. പൈലറ്റുമാരുടെയും എഞ്ചിനിയര്‍മാരുടെയും ശമ്പളത്തെയും ഇത് ബാധിച്ചിട്ടുണ്ട്. സെപ്തംബറില്‍ ജീവനക്കാര്‍ക്ക് പാതി ശമ്പളമാണ് നല്‍കിയത്.
ഒക്‌ടോബര്‍, നവംബര്‍ മാസങ്ങളില്‍ ശമ്പളം നല്‍കിയിട്ടില്ല. പൈലറ്റുമാരുടെ കൂട്ട മെഡിക്കല്‍ ലീവ് ശമ്പളം മുടങ്ങിയതിനെതിരെയുള്ള പ്രതിഷേധമാണെന്നാണ് സൂചന. അപ്രതീക്ഷിതമായ സാഹചര്യങ്ങളുണ്ടായതാണ് വിമാനസര്‍വീസുകളെ ബാധിച്ചതെന്നാണ് കമ്പനിയുടെ വിശദീകരണം.
വിമാന ടിക്കറ്റ് ബുക് ചെയ്ത യാത്രക്കാരെ സര്‍വീസ് റദ്ദാക്കിയ വിവരം എസ്.എം.എസ് വഴി അറിയിച്ചിട്ടുണ്ട്. അവര്‍ക്ക് സര്‍വീസ് മാറ്റി നല്‍കുകയോ ടിക്കറ്റിന്റെ പണം നല്‍കുകയോ ചെയ്യും. ജീവനക്കാരുടെ സഹകരണവും പിന്തുണയും തേടുന്നുവെന്നും ശമ്പളം മുടങ്ങുന്നതും മറ്റ് സാമ്പത്തിക പ്രതിസന്ധികളെ കുറിച്ചും അവരുമായി ചര്‍ച്ച നടത്തുമെന്നും കമ്പനി മാനേജ്മന്റെ്.