ഉത്തര്‍പ്രദേശിലെ ബുലന്ദ്ഷഹറില്‍ ഗോവധത്തിന്റെ പേരിലുണ്ടായ കലാപത്തില്‍ കൊല്ലപ്പെട്ട പോലീസ് ഇന്‍സ്‌പെക്ടര്‍ സുബോധ് കുമാറിന്റെ കുടുംബത്തെ മുഖ്യമന്ത്രി യോഗി ആദിത്യനാഥ് സന്ദര്‍ശിച്ചു. മുഖ്യമന്ത്രിക്കൊപ്പം പോലീസ് മേധാവി ഒ.പി. സിംഗും കുടുംബത്തെ സന്ദര്‍ശിച്ചു.

സുബോധ് കുമാറിന്റെ ഭാര്യയ്ക്ക് 40 ലക്ഷം രൂപയും മാതാപിതാക്കള്‍ക്ക് പത്ത് ലക്ഷം രൂപയും യോഗി ആദിത്യനാഥ് നഷ്ടപരിഹാരം പ്രഖ്യാപിച്ചിരുന്നു. കുടുംബത്തില്‍ ഒരു അംഗത്തിന് സര്‍ക്കാര്‍ ജോലിയും പ്രഖ്യാപിച്ചിട്ടുണ്ട്. തിങ്കളാഴ്ചയാണ് പശുക്കളുടെ അഴുകിയ ജഡങ്ങള്‍ കണ്ടതിന്റെ പേരില്‍ ബുലന്ദ്ഷഹറില്‍ കലാപം പൊട്ടിപ്പുറപ്പെട്ടത്.
കലാപം തടയാന്‍ എത്തിയ സുബോധ് കുമാര്‍ സിംഗും 20 വയസുകാരനായ യുവാവും കലാപത്തില്‍ കൊല്ലപ്പെട്ടിരുന്നു. പശുക്കളെ കൊന്നവരെ അറസ്റ്റ് ചെയ്യണമെന്ന് ആവശ്യപ്പെട്ട് പ്രതിഷേധക്കാര്‍ ദേശീയപാത ഉപരോധിച്ചതിന് പിന്നാലെയായിരുന്നു കലാപം പൊട്ടിപ്പുറപ്പെട്ടത്.
കലാപകാരികള്‍ സുബോധ് കുമാറിനു നേരെ കല്ലെറിഞ്ഞു. തലയ്ക്ക് പരിക്കേറ്റ പോലീസുകാരനെ ആശുപത്രിയിലേക്ക് കൊണ്ടുപോകുന്നതിനിടെ ഒരു സംഘം പിന്തുടര്‍ന്ന് എത്തി വെടിവച്ചു കൊലപ്പെടുത്തുകയായിരുന്നു.