ട്രെയിനിലെ പൂവാലന് ശല്യപ്പെടുത്തിയ, കാഴ്ചപരിമിതിയുള്ള 15- കാരി അവനെ കീഴ്പ്പെടുത്തി പോലീസില് ഏല്പ്പിച്ചു!
സ്കൂള് കഴിഞ്ഞ് പിതാവിനൊപ്പം മുംബൈ ലോക്കല് ട്രെയിനില് വീട്ടിലേക്ക് പോവുകയായിരുന്നു ഒരു 15-കാരി. കാഴ്ചപരിമിതിയുള്ള ആ പെണ്കുട്ടിയോട് 24- കാരനായ ഒരു യുവാവ് അപമര്യാദയായി പെരുമാറി. എന്നാല് അവന് പ്രതീക്ഷിച്ചതുപോലെ ഒന്നുമായിരുന്നില്ല പിന്നീട് കാര്യങ്ങള് നടന്നത്. ഇത്തരമൊരു ട്വിസ്റ്റ് അവന് ഒരിക്കലും പ്രതീക്ഷിച്ചേ കാണില്ല.
രാത്രി 8.15 ഓടെ കല്യാണില് നിന്നും ദാദറിലേക്ക് പോകുകയായിരുന്ന ട്രെയിനിലാണ് സംഭവം. ഭിന്നശേഷിക്കാര്ക്കു വേണ്ടിയുള്ള കമ്പാര്ട്ട്മെന്റിലായിരുന്നു പെണ്കുട്ടി ഇരുന്നിരുന്നത്. തന്നെ പിന്നില് നിന്നും ആരോ സ്പര്ശിക്കുന്നതായി തോന്നിയ പെണ്കുട്ടി ഒട്ടും ഭയപ്പെട്ടില്ല.
സ്വയരക്ഷയ്ക്കായി കരാട്ടെ അടക്കമുള്ള കായിക പരിശീലനങ്ങള് നേടിയ ആളായിരുന്നു ആ പെണ്കുട്ടി. സ്കൂളില് തനിക്ക് ലഭിച്ച പരിശീലനം മനസ്സില് കരുതിയ പെണ്കുട്ടി വിശാല് ബലിറാം സിംഗ് എന്ന ആ യുവാവിന്റെ കൈവിരലുകളില് കയറിപ്പിടിച്ചു. വിരലുകള് ഞെരിച്ച് ഒടിക്കുന്ന പരുവത്തിലാക്കി. ഇതോടെ വേദനകൊണ്ട് പുളഞ്ഞ യുവാവ് അലറിക്കരഞ്ഞുകൊണ്ട് നിലത്തിരുന്നു. തനിക്കു മുന്നില് മുട്ടുകുത്തിയിരുന്ന് കരയുന്ന യുവാവിനെ എന്നിട്ടും പെണ്കുട്ടി വിട്ടില്ല. അടുത്ത സ്റ്റേഷനില് ട്രെയിന് എത്തിപ്പോള് യുവാവിനെ പോലീസിന് കൈമാറി.
പെണ്കുട്ടിയെ അപമാനിക്കാന് ശ്രമിച്ചതിനും ഭിന്നശേഷിയുള്ളവരുടെ കമ്പാര്ട്ടുമെന്റില് അനധികൃതമായി യാത്ര ചെയ്തതിനും ടിക്കറ്റ് എടുക്കാതെ യാത്ര ചെയ്തതിനും ഇയാള്ക്കെതിരെ റെയില്വേ പോലീസ് കേസെടുത്തിട്ടുണ്ട്. മുലന്ദ് സ്വദേശിയായ ഇയാള് ഒരു സ്വകാര്യ സ്ഥാപനത്തില് കമ്പ്യൂട്ടര് മെക്കാനിക്കാണ്. കോടതിയില് ഹാജരാക്കിയ ഇയാളെ രണ്ടു ദിവസത്തേക്ക് പോലീസ് കസ്റ്റഡിയില് എടുത്തു.
പെണ്കുട്ടിയുടെ നടപടി അങ്ങേയറ്റം ഉചിതമാണെന്ന് പോലീസ് പ്രതികരിച്ചു. വിശാല് സിംഗിനെ പോലെയുള്ളവരെ കൈകാര്യം ചെയ്യാന് തങ്ങള്ക്ക് എളുപ്പമാണെന്ന് പെണ്കുട്ടി പറഞ്ഞു. പാഠ്യപദ്ധതിയുടെ ഭാഗമായി സ്വയം പ്രതിരോധിക്കുന്നതിനും കരാട്ടെയും മറ്റും പഠിപ്പിക്കുന്നുണ്ട്. തങ്ങളുടെ പരിമിതിക്കപ്പുറം ഈ ലോകത്തെ അഭിമുഖീകരിക്കാന് തങ്ങള്ക്കാകും. അയാള് ഇനിയൊരിക്കലും ഇത്തരത്തില് ഒരാളോട് പെരുമാറരുത് എന്ന് തനിക്ക് നിര്ബന്ധമുണ്ടെന്നും പെണ്കുട്ടി പ്രതികരിച്ചു.
https://www.facebook.com/Malayalivartha