രാജ്യം തലകുനിക്കുന്നു: ഗോവയില്‍ വീണ്ടും വിദേശ വനിത ക്രൂര പീഡനത്തിനിരയായി
രാജ്യത്തിനു നാണക്കേടായി ഗോവയില്‍ വീണ്ടും വിദേശ വനിതയ്ക്കു പീഡനം. ഗോവ പാലോലം ബീച്ചിന് സമീപം വ്യാഴാഴ്ച പുലര്‍ച്ചെയായിരുന്നു സംഭവം. കനാകൊന റയില്‍വേ സ്‌റ്റേഷനില്‍ നിന്ന് പുലര്‍ച്ചെ വാടകയ്ക്ക് താമസിക്കുന്ന സ്ഥലത്തേയ്ക്ക് പോകുന്ന വഴിയാണ് 48കാരി പീഡനത്തിനിരയായത്. ക്രൂര ആക്രമണത്തിനു ശേഷം പ്രതി ഓടിരക്ഷപ്പെട്ടു. പിന്നീട് സമീപവാസികളുടെ സഹായത്തോടെ ഇവര്‍ പോലീസ് സ്‌റ്റേഷനിലെത്തി പരാതി നല്‍കുകയായിരുന്നു.
ഗോവ ക്രൈംബ്രാഞ്ച് കേസേറ്റെടുത്തു. പ്രതിയെ തിരിച്ചറിയാനായിട്ടില്ല. പരാതിക്കാരി നല്‍കിയ വിവരങ്ങളുടെ അടിസ്ഥാനത്തില്‍ സംശയമുള്ളവരുടെ ലിസ്റ്റ് തയ്യാറാക്കി. യുവതിയെ വൈദ്യപരിശോധനയ്ക്ക് വിധേയയാക്കി ബലാത്സംഗ കേസ് രജിസ്റ്റര്‍ ചെയ്തു.
ഡിസംബര്‍ മുതല്‍ ഗോവയില്‍ വിനോദ സഞ്ചാര സീസണ്‍ ആരംഭിക്കും. മാര്‍ച്ചുവരെ പലരും ഇവിടെ വീടുകളും അപ്പാര്‍ട്‌മെന്റുകളും വാടകയ്‌ക്കെടുത്ത് താമസമാകാറുണ്ട്. ഇരയാക്കപ്പെട്ട സ്ത്രീ ഗോവയിലെ പതിവു സന്ദര്‍ശകയാണ്. സീസണ്‍ അവസാനിക്കുന്നതുവരെ സൗത്ത് ഗോവയില്‍ താമസിക്കാനാണ് ഇവരെത്തിയത്. വിദേശ വനിതകള്‍ പീഡനത്തിനിരയാകുന്നത് ഗോവയില്‍ പതിവായി മാറിയിട്ടുണ്ട്. ഏറ്റവും സുരക്ഷിതമെന്നു കരുതുന്ന ബീച്ചിലുള്‍പ്പെടെ ഈ വര്‍ഷമാദ്യം യുവതി ക്രൂര പീഡനത്തിനിരയായിരുന്നു.
https://www.facebook.com/Malayalivartha
