ഓട്ടോറിക്ഷാ ഡ്രൈവര്‍മാര്‍ക്കെതിരെയുള്ള സാധാരണക്കാരുടെ മുഖ്യപരാതികളിലൊന്നാണ് പരിചയമില്ലാത്ത സ്ഥലങ്ങളിലേക്കുള്ള ഓട്ടങ്ങള്‍ക്ക് അമിത നിരക്ക് ഈടാക്കുന്നുവെന്നത്. തോന്നിയ വഴിയിലൂടെ പോകുന്നതും വായില്‍ വരുന്ന ചാര്‍ജ് ഈടാക്കുകയും ചെയ്യുന്നത് ഓട്ടോറിക്ഷക്കാരുടെ സ്ഥിരം പതിവാണ്.

മീറ്ററിൽ ഉള്ള ചാർജ്ജ് കൊടുത്താൽ പേരും സമ്മതിക്കാറില്ല. പലരും മീറ്റർ ഇടാൻ പോലും തയ്യാറാകാറുമില്ല.

യാത്രക്കാർ സ്ഥലം പരിചയമില്ലാത്തവരാണെങ്കിൽ ഓട്ടോ ഡ്രൈവർ പറയുന്ന കാശ് കൊടുക്കേണ്ടിവരും. എന്നാല്‍, ഈ കളി ഇനി അധികനാള്‍ നീളില്ല. ഗൂഗിള്‍ മാപ്പിന്റെ ഏറ്റവും പുതിയ പതിപ്പില്‍ യാത്ര ചെയ്യേണ്ട ദൂരത്തിനൊപ്പം ഓട്ടോ ചാര്‍ജ് എത്രയെന്നും കൃത്യമായി അറിയാന്‍ കഴിയും.

ഈ സംവിധാനം കേരളത്തിലെത്താന്‍ അല്‍പ്പം വൈകിയേക്കും. പദ്ധതിയുടെ ആദ്യഘട്ടമായി ദില്ലിയിലാണ് പുതിയ ഫീച്ചര്‍ അവതരിപ്പിക്കുന്നത്. ഇതനുസരിച്ച് ദില്ലി ട്രാഫിക് പൊലീസ് നല്‍കിയ ഔദ്യോഗിക ഓട്ടോ ചാര്‍ജ് ഗൂഗിള്‍ മാപ്പില്‍ കാണിക്കും. പുതിയ ഫീച്ചര്‍ ഉപയോഗിക്കുന്ന യാത്രികന് നഗരത്തിലെ എല്ലാ ഓട്ടോറിക്ഷാ റൂട്ടുകളും കൃത്യമായ തുകയും അറിയാന്‍ സാധിക്കും. തെറ്റായ വഴിയിലൂടെ സഞ്ചരിച്ചാലും യാത്രക്കാര്‍ ലക്ഷ്യസ്ഥാനത്തേക്ക് പോലീസ് നിര്‍ദേശിച്ചിരിക്കുന്ന തുക നല്‍കിയാല്‍ മതിയാകും.

അതായത് യാത്രക്കാരെ ഇനി തെറ്റായ വഴികളിലൂടെ കൊണ്ടുപോയി ഡ്രൈവര്‍മാര്‍ക്ക് അമിത ചാര്‍ജ് ഈടാക്കാൻ സാധിക്കില്ലെന്ന് അര്‍ത്ഥം.

യാത്രക്കാരന്‍ നില്‍ക്കുന്ന സ്ഥലവും പോകേണ്ട സ്ഥലവും മാപ്പില്‍ നല്‍കിയാല്‍ പബ്ലിക് ട്രാന്‍സ്‌പോര്‍ട്ട് മോഡിലൂടെ പോകേണ്ട വഴിയും നിരക്കും കൃത്യമായി ലഭ്യമാകും. കൂടാതെ മറ്റ് യാത്ര സംവിധാനങ്ങളായ യൂബർ, ഓല പോലുള്ള ഓൺലൈൻ ടാക്സികളുടെ നിരക്കുകളുമായി ഓട്ടോ നിരക്ക് താരതമ്യം ചെയ്യാനും സാധിക്കും പദ്ധതി വൈകാതെ രാജ്യവ്യാപകമായി നടപ്പാക്കിയേക്കുമെന്നും റിപ്പോര്‍ട്ടുകളുണ്ട്.

ഡല്‍ഹിയില്‍ ഇപ്പോള്‍ പ്രാബല്യത്തിലുള്ള ഓട്ടോ നിരക്കാണ് ഗൂഗിള്‍ മാപ്പില്‍ നല്‍കിയിട്ടുള്ളത്.