മേഘാലയയിലെ കല്‍ക്കരി ഖനിക്കകത്ത് കുടുങ്ങിയ 15 തൊഴിലാളികള്‍ മരണപ്പെടാനാണ് സാധ്യതയെന്ന് ദേശീയ ദുരന്ത പ്രതികരണ സേന. വലിയ ദുരന്തമാണ് ഉണ്ടായതെന്നും സേനയിലെ ഉദ്യോഗസ്ഥന്‍ പറഞ്ഞു. അനധികൃത ഖനിയായിതിനാല്‍ മുങ്ങല്‍ വിദഗ്ധരെ സഹായിക്കാന്‍ സാധിക്കുന്ന ഭൂപടങ്ങളില്ല. വന്‍ പമ്പുകള്‍കൊണ്ടുവന്ന് വെള്ളം വറ്റിക്കാന്‍ ശ്രമിച്ചു. ഒരു ദിവസം മുഴുവന്‍ ശ്രമിച്ചിട്ടും ഒരു സെന്റീമീറ്റര്‍പോലും ജലനിരപ്പ് കുറഞ്ഞിട്ടില്ല. 320അടിയുള്ള ഷാഫ്റ്റ് ഇറക്കിയപ്പോള്‍ 70 അടി പൂര്‍ണമായും വെള്ളത്തില്‍ മുങ്ങി.

കല്‍ക്കരിയുമായി കലര്‍ന്ന് കറുത്ത നിറമായിരുന്നു വെള്ളത്തിന്. സേനയുടെ മുങ്ങല്‍ വിദഗ്ധര്‍ അവിടെ അക്ഷരാര്‍ഥത്തില്‍ അന്ധരാണെന്നും ഉദ്യോഗസ്ഥന്‍ അറിയിച്ചു. നിലവില്‍ എട്ട് മുങ്ങല്‍ വിദഗ്ധരുണ്ട്. 70 അടി താഴ്ചയില്‍ വെള്ളവുമുണ്ട്. എന്നാല്‍ കല്‍ക്കരി മൂലം ഇവര്‍ക്ക് 3040 അടി താഴ്ചയില്‍ കൂടുതല്‍ പോകാന്‍ സാധിക്കുന്നില്ല. തെളിഞ്ഞ വെള്ളത്തില്‍ ഒരാള്‍ക്ക് അഞ്ചടി താഴെ വരെ സാധാരണ കാഴ്ച ലഭിക്കും. ചെളി വെള്ളത്തില്‍ ഇത് മൂന്നടിയായി കുറയും.
എന്നാല്‍ ഇപ്പോള്‍ 300 അടി താഴ്ചയുള്ള ഖനിയിലെ പരസ്പരം ബന്ധപ്പെട്ടു കിടക്കുന്ന ഇടുങ്ങിയ അറകളില്‍ ഇരുട്ടില്‍ തപ്പുകയാണ് രക്ഷാപ്രവര്‍ത്തകര്‍. ഖനിക്ക് സമീപത്തെ നദിയില്‍ വെള്ളം കയറിയതു മൂലം ഖനിയിലും വെള്ളം നിറഞ്ഞിരിക്കുകയാണ് അതിനുള്ളില്‍ ഒരാഴ്ചയിലേറെയായി കുടുങ്ങിക്കിടക്കുന്ന തൊഴിലാളികളെ ഉടനെ കണ്ടെത്തുക പ്രയാസകരമാണ്. ഖനി വിദഗ്ധരുടെ നിര്‍ദേശത്താല്‍ പ്രത്യേക യന്ത്രങ്ങള്‍ കൊണ്ടുവന്ന് വെള്ളം വറ്റിക്കണമെങ്കില്‍ പോലും ഒരു മാസം സമയം എടുക്കും. ഖനിയിലുള്ളവര്‍ ജീവിച്ചിരിക്കാനുള്ള സാധ്യതയും വളരെ കുറവാണെന്നും അദ്ദേഹം പറഞ്ഞു.