ക്രിസ്തുമസും -പുതുവത്സരവും ഗോവയില്‍ അടിച്ചുപൊളിക്കാന്‍ ആലോചിക്കുന്നവര്‍ക്ക് ഇരട്ടി മധുരവുമായി ഇന്ത്യന്‍ റയില്‍വേ. ആഘോഷ സമയം പ്രമാണിച്ച് സഞ്ചാരികള്‍ക്കായി ഇത്തവണ റെയില്‍വേ തയ്യാറാക്കിയിരിക്കുന്നത് അത്ഭുതപ്പെടുത്തുന്ന പാക്കേജാണ്. ഒരാള്‍ക്ക് വെറും 400 രൂപ നിരക്കു മുതലുള്ള പാക്കേജുകളാണ് റെയില്‍വേ തയ്യാറാക്കിയിരിക്കുന്നത്. മൂന്നു പാക്കേജുകളാണുള്ളത്. എന്നാല്‍ ട്രെയിനിലല്ല ബസ്സിലാണ് യാത്രയെന്ന പ്രത്യേകതയുണ്ട്. വടക്കന്‍ ഗോവ, ദക്ഷിണ ഗോവ, വടക്കന്‍ ഗോവയും ദക്ഷിണ ഗോവയും ചേര്‍ന്നുള്ള പാക്കേജ് എന്നിങ്ങനെയാണ്. ആദ്യത്തെ രണ്ടു പാക്കേജുകളിലും ഒരാള്‍ക്ക് 400 രൂപ വീതവും രണ്ടാമത്തെ പാക്കേജില്‍ 600 രൂപയുമായിരിക്കും. ഐആര്‍സിടിസിയുടെ ഔദ്യോഗിക വെബ്‌സൈറ്റ് വഴി ബുക്ക് ചെയ്യാം. യാത്ര ചെയ്യാന്‍ ഉദ്ദേശിക്കുന്നതിശന്റ നാലു ദിവസം മുന്‍പെങ്കിലും ബുക്ക് ചെയ്യണം.

ഡോണ പൗല, ഗോവ സയന്‍സ് മ്യൂസിയം, മിരാമര്‍ ബീച്ച്, കലാ അക്കാദമി, ഭഗവാന്‍ മഹാവീര്‍ ഗാര്‍ഡന്‍, പഞ്ചിം മാര്‍ക്കറ്റ്, കാസിനോ പോയിന്റ്, റിവര്‍ ബോട്ട് ക്രൂയിസ്, ഓള്‍ഡ് ഗോവ എന്നിവിടങ്ങളാണ് വടക്കന്‍ ഗോവ പാക്കേജില്‍ സന്ദര്‍ശിക്കുക.

ദക്ഷിണ ഗോവ പാക്കേജില്‍ ഫോര്‍ അഗ്വാഡ, സന്‍കെറിം ബീച്ച്, കണ്ടോലിം ബീച്ച്, സെന്റ് ആന്റണി ചാപ്പല്‍ം സെന്റ് അലക്‌സ് ചര്‍ച്ച്, കലങ്കൂട്ട് ബീച്ച്, ബാഗാ ബീച്ച്, അഞ്ജുന ബീച്ച്, ചാപോര ഫോര്‍ട്ട്, വഗേറ്റര്‍ ബീച്ച്, എന്നിവിടങ്ങളും സന്ദര്‍ശിക്കാം. ഈ രണ്ടു പാക്കേജുകളിലെയും സ്ഥലങ്ങളും മാള്‍ ഡി ഗോവ, സാലിഗണ്‍ ചര്‍ച്ച് എന്നിവയും ഉള്‍പ്പെട്ടതാണ് മൂന്നാം പാക്കേജ്. ബസ്സില്‍ സഞ്ചാരികള്‍ക്കായി നിരവധി വിദേശ ഭാഷകള്‍ ഉള്‍പ്പെടുത്തിയ ആപ്ലിക്കേഷനും ലഭ്യമാണ്.