മൂന്ന് സംസ്ഥാനങ്ങളിലെ തെരഞ്ഞെടുപ്പ് വിജയത്തിന് പിന്നാലെ ലോക്സഭാ തെരഞ്ഞെടുപ്പിന് അങ്കം കുറിച്ച കോണ്ഗ്രസ് തമിഴ്നാട്ടില് വെന്നിക്കൊടി പാറിക്കാന് കമലാഹാസന്റെ പാര്ട്ടിയെ യു.പി.എയിലേക്ക് ക്ഷണിച്ചു
മൂന്ന് സംസ്ഥാനങ്ങളിലെ തെരഞ്ഞെടുപ്പ് വിജയത്തിന് പിന്നാലെ ലോക്സഭാ തെരഞ്ഞെടുപ്പിന് അങ്കം കുറിച്ച കോണ്ഗ്രസ് എല്ലാ മതേതര ശക്തികളെയും കൂടെ കൂട്ടാന് തീരുമാനിച്ചു. ഇതിന്റെ ഭാഗമായി നടന് കമലാഹാസന്റെ പാര്ട്ടിയായ മക്കള് നീതി മയ്യത്തെ യു.പി.എയിലേക്ക് ക്ഷണിച്ചു. കോണ്ഗ്രസ് നേതൃത്വം നല്കുന്ന യു.പി.എ മുന്നണിയുടെ ഭാഗമാകണമെന്ന് തമിഴ്നാടിന്റെ ചുമതലയുള്ള എ.ഐ.സി.സി ജനറല് സെക്രട്ടറി സഞ്ജയ് ദത്ത് ആവശ്യപ്പെട്ടു. ഫാസിസ്റ്റ് വിരുദ്ധ സമീപനം സ്വീകരിക്കുന്ന പാര്ട്ടിയാണ് മക്കള് നീതി മയ്യം. അങ്ങനെയുള്ളവര് അണിനിരക്കേണ്ടത് യുപിഎയുടെ ഭാഗമായാകണമെന്നും സഞ്ജയ്ദത്ത് ആവശ്യപ്പെട്ടു.
പാര്ട്ടി രൂപീകരിക്കുന്നതിന്റെ ഭാഗമായി കമലാഹാസന് കോണ്ഗ്രസ് അധ്യക്ഷന് രാഹുല്ഗാന്ധിയുമായി കൂടിക്കാഴ്ച നടത്തിയിരുന്നു. തമിഴ്നാട്ടില് കോണ്ഗ്രസിന് പഴയ ശക്തിയില്ല. മാത്രമല്ല ഡി.എം.കെ അധ്യക്ഷന് സ്റ്റാലില് രാഹുല്ഗാന്ധി പ്രധാനമന്ത്രി സ്ഥാനാര്ത്ഥിയാകണമെന്ന് പ്രഖ്യാപിച്ചിട്ടുണ്ട്. കമലാഹാസന്റെ പാര്ട്ടിയുടെ പിന്തുണ കൂടി ലഭിക്കുമ്പോള് കോണ്ഗ്രസിന് വലിയ ഊര്ജ്ജമാകും അത് കൂടി മനസിലാക്കിയാണ് കോണ്ഗ്രസിന്റെ ക്ഷണം. ഡിഎംകെ കൂടി ഉള്പ്പെട്ട വിശാല മുന്നണിക്കൊപ്പം കൂടാന് കമല് മടിക്കരുത്. ജനാധിപത്യ മതേതര മുന്നണി ശക്തിപ്പെടേണ്ടത് ഇപ്പോഴത്തെ ഇന്ത്യയില് അത്യാവശ്യമാണ്.
മതേതര ജനാധിപത്യ ഇന്ത്യ കെട്ടിപ്പടുക്കാനാണ് രാഹുല്ഗാന്ധിയും സ്റ്റാലിനും നിലകൊള്ളുന്നത്. കമലാഹാസന്റെ നിലപാടുകളും കാഴ്ചപ്പാടുകളും കോണ്ഗ്രസിന്റേതിന് സമാനമാണ്. അതിനാല് കേന്ദ്രസര്ക്കാരിന്റെ ജനവിരുദ്ധനിലപാടുകള്ക്കെതിരെ ഒരുമിച്ച് നിന്ന് പൊരുതേണ്ട കാര്യത്തില് തീരുമാനം എടുക്കേണ്ട സമയം അതിക്രമിച്ചിരിക്കുകയാണെന്നും സഞ്ജയ് ദത്ത് അഭിപ്രായപ്പെട്ടു. തമിഴ്നാടിന്റെ ഡി എന് എയ്ക്ക് കോട്ടം വരുത്താത്ത ഏത് പാര്ട്ടിയുമായും സഖ്യം ചേരാന് തയ്യാറാണെന്ന് കഴിഞ്ഞ ദിവസം കമല് പ്രഖ്യാപിച്ചിരുന്നു. അതിന് ശേഷമാണ് കോണ്ഗ്രസിന്റെ ക്ഷണം. എന്നാല് കമലാഹാസന് ഇതിനെ കുറിച്ച് ഇതുവരെ പ്രതികരിച്ചിട്ടില്ല.
https://www.facebook.com/Malayalivartha