അര്ദ്ധരാത്രിയിലെ കസേരകളി; മോദിയെ വെല്ലുവിളിച്ച് റാഫേല് ഇടപാട് അന്വേഷിക്കാന് ഇറങ്ങിത്തിരിച്ച സി.ബി.ഐ ഡയറക്ടര് അലോക് വര്മയെ അര്ദ്ധരാത്രിയില് ഇറക്കിവിട്ട കേന്ദ്രസര്ക്കാര് സുപ്രീംകോടതിയില് നിന്ന് വടികൊടുത്ത് അടിവാങ്ങി
മോദിയെ വെല്ലുവിളിച്ച് റാഫേല് ഇടപാട് അന്വേഷിക്കാന് ഇറങ്ങിത്തിരിച്ച സി.ബി.ഐ ഡയറക്ടര് അലോക് വര്മയെ അര്ദ്ധരാത്രിയില് ഇറക്കിവിട്ട കേന്ദ്രസര്ക്കാര് സുപ്രീംകോടതിയില് നിന്ന് വടികൊടുത്ത് അടിവാങ്ങി. ആ വടി ഇനി കോണ്ഗ്രസ് ഉള്പ്പെടെയുള്ള പ്രതിപക്ഷനേതാക്കള് ആയുധമാക്കും എന്നത് രാഷ്ട്രീയമായും വലിയ തിരിച്ചടിയാകും. റാഫേല് ഇടപാടില് അന്വേഷണം വേണ്ടെന്ന കേന്ദ്രസര്ക്കാരിന്റെ തീരുമാനം മറികടന്നാണ് അലോക് വര്മ സുപ്രീംകോടതിയെ സമീപിക്കാന് തയ്യാറായത്. അതിനായി ഫയലുകള് പരിശോധിച്ചപ്പോഴാണ് പാതിരാത്രിയില് അട്ടിമറി നടന്നത്.
നിയമവ്യവസ്ഥയോടും ഭരണഘടനയോടുമുള്ള വെല്ലുവിളിയാണിതെന്ന് കോണ്ഗ്രസ് അധ്യക്ഷന് രാഹുല് ഗാന്ധി അന്നേ ആരോപിച്ചിരുന്നു. പ്രധാനമന്ത്രി, പ്രതിപക്ഷനേതാവ്, ചീഫ് ജസ്റ്റിസ് ഓഫ് ഇന്ത്യ എന്നിവരടങ്ങുന്ന സമിതിയാണ് സി.ബി.ഐ ഡയറക്ടറെ നിയമിക്കുന്നതും മാറ്റുന്നതും. എന്നാല് സമിതി കൂടാതെ മോദി സര്ക്കാര് ഏകപക്ഷീയമായ നിലപാട് എടുക്കുകയായിരുന്നു. ഇതേ തുടര്ന്ന് അലോക് വര്മ സുപ്രീംകോടതിയെ സമീപിക്കുകയായിരുന്നു. കോടതി വര്മയെ വീണ്ടും പ്രതിഷ്ഠിച്ചെങ്കിലും വിരമിക്കാന് ഏതാനും നാളുകള് മാത്രമുള്ളതിനാല് വര്മയ്ക്ക് പ്രത്യേകിച്ച് ഒന്നും ചെയ്യാനാവില്ല.
വര്മയെ ആയുധമാക്കി കോണ്ഗ്രസിന് തെരഞ്ഞെടുപ്പ് കളംമൂപ്പിക്കാനാകും. റാഫേലില് പ്രധാനമന്ത്രി നേരിട്ട് അഴിമതി നടത്തിയിട്ടുണ്ടെന്നും അനില് അംബാനിയെ സഹായിക്കാന് വഴിവിട്ട ഇടപാടുകള് നടത്തിയെന്നും രാഹുല്ഗാന്ധി പരസ്യമായി ആരോപിച്ചിരുന്നു. രാഹുലുന്റെ ചോദ്യങ്ങള്ക്ക് മറുപടി പറയാന് പോലും പ്രധാനമന്ത്രി തയ്യാറായില്ല. പ്രതിരോധമന്ത്രി നിര്മലാ സീതാരാമനാണ് പാര്ലമെന്റില് മോദിക്ക് പ്രതിരോധ കവചമൊരുക്കിയത്.
സി.ബി.ഐ ഡയറക്ടറെ മാറ്റിയതില് കേന്ദ്രസര്ക്കാരിന് നിയമപരമായി പിഴവ് പറ്റിയെന്നാണ് കോടതി പറഞ്ഞത്. അതേസമയം റാഫേല് ഇടപാട് സംബന്ധിച്ച് പ്രശാന്ത ഭൂഷണും മുന് ബി.ജെ.പി മന്ത്രി അരുണ്ഷൂരിയും നല്കിയ ഹര്ജിയില് സുപ്രീംകോടതി കേന്ദ്രസര്ക്കാരിന് അനുകൂല നിലപാടാണ് എടുത്തത്. പ്രതിരോധ വിഷയങ്ങളില് ഇടപെടുന്നതിന് കോടതിക്കുള്ള പരിധിയായാണ് ഹര്ജിക്കാരും കോണ്ഗ്രസും ഇതിനെ ചൂണ്ടിക്കാണിച്ചത്.
അലോക് വര്മയും ഉപഡയറക്ടര് രാഗേഷ് അസ്താനയും തമ്മിലുള്ള പോരാണ് അലോക് വര്മയുടെ കസേര തെറിപ്പിക്കുന്നതിലേക്ക് നീങ്ങിയത്. ഈ പോര് കേന്ദ്രസര്ക്കാര് മുതലെടുക്കുകയും ചെയ്തു. മാംസവ്യാപാരിയായ മോയിന് ഖുറേഷിയില് നിന്ന് അലോക് വര്മ കോഴ വാങ്ങിയെന്ന് രാഗേഷ് അസ്താന പരാതി നല്കിയിരുന്നു. മോദിയുടെ വിശ്വസ്തനായ അസ്താനയ്ക്കെതിരെയുള്ള പല കേസുകളിലും അലോക് വര്മ ഇടപെടാന് തുടങ്ങിയതോടെയാണ് സി.ബി.ഐ തലപ്പത്ത് പോര് തുടങ്ങിയത്.
കോഴ ഇടപാടില് അലോക് വര്മയ്ക്കെതിരെ കേന്ദ്ര വിജിലന്സ് കമ്മിഷന് അന്വേഷണം നടത്തിയിരുന്നു. പ്രാഥമിക റിപ്പോര്ട്ടില് അലോക് വര്മയ്ക്ക് ക്ലീന് ചിറ്റ് നല്കിയിട്ടില്ല. കേസില് വീണ്ടും അന്വേഷണം നടന്നു വരുകയാണ്. അതിനിടെയാണ് സുപ്രീംകോടതിയില് നിന്ന് തിരിച്ചടിയുണ്ടായത്. വര്മയെ മുന് നിര്ത്തി സി.ബി.ഐയെ മോദി രാഷ്ട്രീയ വല്ക്കരിക്കാന് ശ്രമിച്ചെന്നും സുപ്രീംകോടതി അതിന് തടയിട്ടെന്നും കോണ്ഗ്രസിന് വാദിക്കാനും തെരഞ്ഞെടുപ്പ് പ്രചരണമാക്കാനും കഴിയും.
https://www.facebook.com/Malayalivartha
